Read LAYIDUKURA KƐWALIW 4 Bible Online

KƐWALIW 4 - LAYIDUKURA bible

KƐWALIW 4

¹Ka Piyɛri ni Zan to kuma na jama fɛ, sarakalasebagaw ni Alabatosoba nyamɔgɔ, ani Sadusenyɛ dɔw sera.

²U y'a ye ko mɔgɔ fila nunu bɛ jama kalanna Yezu ka koow, ani suuw kununko la minkɛ, o ma diya u ye fewu.

³U y'u fila minɛ ka taa u datugu kaso la fɔɔ a dugusagwɛ, bari tile tun banna.

⁴O bɛɛ n'a ta, mɔgɔ minw tun ye ciden fila nunu ka kuma lamɛn, olu caaman lara o la. Dɔ farala kalandenw kan. Cɛɛw bɛɛ lajɛnnin taara se mɔgɔ waa duuru nyɔgɔn na.

⁵O dugusagwɛ, Zuwifuw ka kititigɛla minw bɛ Zeruzalɛmu dugu kɔnɔ, olu ye nyɔgɔn lajɛn: cɛkɔrɔba fara sariya karamɔgɔw kan.

⁶Sarakalasebagaw kuntigiba Ana n'a ka somɔgɔw bɛɛ tun bɛ yen, ni Kayifu, ni Zan ani Alɛkisandiri.

⁷O tuma na, u nana ni Piyɛri ni Zan ye u cɛma. U y'u nyininga ko: “Aw ye cɛmurukunin nin kɛnɛya ni dalilu jumɛn ye, walima aw y'a kɛnɛya jon barika la?”

⁸O tuma na, Nii Senuman tun bɛ Piyɛri fɛ kosɛbɛ, a y'u jaabi ko:

⁹“An ka cɛkɔrɔbaw, n'an nyamɔgɔw, aw ye anw wele kiti la bii, bari an ye konyuman kɛ. Aw b'an nyininga ko an ka nanbara nin kɛnɛya cogo fɔ.

¹⁰O tuma na, a ye tulo malɔ ka nya ani k'a faamu, Isirayɛli jama bɛɛ fana k'a faamu ko Yezu Krista Nazarɛtika nin barika lo, aw tun y'o min gwengwen k'a faga lɔgɔ kan. Ala y'a kunun. Ale barika la cɛɛ nin kɛnɛyara.

¹¹Aw bonlɔlaw tun banna kabakuru min na dɛ, o le nana tila ka kɛ jigilakabakuru ye. O ye Yezu ye.

¹²Bari Ala ma mɔgɔ wɛrɛ ci dinyɛ kɔnɔ, adamaden bɛ se ka kisi min barika la.”

¹³Kititigɛla nunu y'a ye ko Piyɛri ni Zan hakili siginin lo u ka kuma na. U kabakoyara bari u y'u jati mɔgɔfufafu ni minw ma kalan bɛrɛ kɛ. O kɔ, u nan'a lɔn ko Yezu ka kɔmɔgɔw dɔw lo.

¹⁴U ye cɛɛ filɛ u gɛrɛfɛ, a dafaninba, fɔta ma sɔrɔ u fɛ.

¹⁵O la, u y'a fɔ u ye ko u ka bɔ kɛnɛma, u dama ye nyɔgɔn ye koo nin na.

¹⁶U y'a fɔ ko: “An bɛna mun le kɛ mɔgɔ nunu na? Tinyɛ kɔni na, u ye koba kɛ. Zeruzalɛmuka bɛɛ b'a kala ma. A gwɛnin lo, an tɛ se ka ban a ma.

¹⁷Nga, n'an t'a fɛ koo nin kibaru ka jɛnsɛn ka taa nya, an ka kan k'u bali, k'u bagabaga k'u kana Yezu tɔgɔ fɔ mɔgɔ si nyana tugu.”

¹⁸O la, u ye Piyɛri ni Zan wele ka kangari la ko Yezu tɔgɔ kana mɛn u daa la loon si walima ka mɔgɔw kalan n'a ka koow ye.

¹⁹Nga Piyɛri ni Zan y'u jaabi ko: “Jumɛn ka di Ala ye koo fila nunu na: k'a ka fɔta labato, walima k'aw ka fɔta labato? Aw yɛrɛ k'o jaabi nyini aw yɛrɛ ma.

²⁰“Anw kɔni fɛ, anw ye min ye, ka min mɛn, anw tɛ se ka to o fɔbali ye.”

²¹U ma bolo layɔrɔ sɔrɔ k'u tɔɔrɔ minkɛ, u y'u sɔngɔ kosɛbɛ, ka sɔrɔ k'u bila. U y'o kɛ bari u siranna jama nya, bari mɔgɔ bɛɛ tun bɛ Ala tɔgɔ tandora u ka kokɛnin nin kama.

²²Cɛɛ min ka kɛnɛya kɛra kabako ye, o sii tun tɛmɛna saan bi naani kan.

²³Piyɛri ni Zan bilanin kɔ, sarakalasebagaw ni cɛkɔrɔbaw ye kuma min bɛɛ fɔ, u segira ka n'o bɛɛ nyafɔ u tɔnyɔgɔnw ye.

²⁴Olu y'u ka kuma mɛn. O kɔ, u y'u kaan kɛ kelen ye ka Ala dali ko: “Matigi, e le ye sankolo ni dugukolo dan. E le ye kɔgɔji n'a kɔnɔnafɛnw bɛɛ dan.

²⁵E le y'a kɛ i ka baarakɛla an bɛma Dawuda ye kuma nin fɔ Nii Senuman barika la, ko: ‘Mun na siya nunu murutira? Mun na ;naniyajugu b'u fɛ?

²⁶Masacɛw y'u kaan bɛn, jamana nyamɔgɔw lajɛnna janko ka kɛ kelen ye ka Matigi n'a ka Mɔgɔwolomanin kɛlɛ.’

²⁷Tinyɛ na, Pɔnsi Pilati, ni Erɔdi, ni Isirayɛli jama ani siya wɛrɛw ye nyɔgɔn lajɛn dugu nin kɔnɔ i ka Sagokɛla bɛrɛbɛrɛ Yezu kama i y'o min kɛ dinyɛ kisibaga ye.

²⁸Ayiwa, i tun ye koo minw bɛɛ latigɛ, u y'o bɛɛ kɛ.

²⁹Sisan kɔni Matigi, i janto u ka bagabagaliw la, a to i ka baarakɛlaw k'i ka kuma fɔ mɔgɔw ye ni jagwɛlɛya ye.

³⁰A to an ka se ka mɔgɔw kɛnɛya, ka kabakow kɛ Yezu barika la, ale min ye i ka Sagokɛla bɛrɛbɛrɛ ye.”

³¹U tun bɛ yɔrɔ min na, dalili bantɔ, o yɔrɔ nin yɛrɛyɛrɛla. Nii Senuman jigira u bɛɛ kan, u tora ka Ala ka kuma fɔ ni jagwɛlɛya ye.

³²Mɔgɔ minw tun lara Yezu la, u bɛnnin tun lo kosɛbɛ, miiriya kelen le tun b'u bɛɛ fɛ. U si tun t'a fɔ ko: “N ta.” Nga u ka fɛɛn bɛɛ tun ye foroba ye.

³³Cidenw tun bɛ kobaw kɛ k'a yira ko Matigi Yezu kununna. Ala ka duba tun bɛ u bɛɛ kan.

³⁴O la fana, dɛsɛ tun tɛ u si kan, bari forow, walima soow tun bɛ minw fɛ, u tun b'u feere ka n'u bɛɛ sɔngɔ di cidenw ma.

³⁵U tun b'o tilan ka kɛnyɛ n'u kelen kelen bɛɛ ka makoya ye.

³⁶O cogo la, Levi kɔmɔgɔ dɔ tun bɛ yen min tɔgɔ ko Yusufu ka bɔ Sipɔrɔ jamana na, cidenw y'a tɔgɔ la ko Barinabasi, (o kɔrɔ ko mɔgɔ min bɛ mɔgɔ ladiya).

³⁷Foro dɔ tun bɛ ale fɛ fana. A y'o feere ka na a wari di cidenw ma.