Read LAYIDUKURA KƐWALIW 5 Bible Online

KƐWALIW 5 - LAYIDUKURA bible

KƐWALIW 5

¹Nga cɛɛ dɔ tun bɛ yen min tɔgɔ tun ko Ananiyasi. A ka muso tɔgɔ tun ko Safira. U bɛnna k'u ka foro dɔ feere,

²ka dɔ bɔ a sɔngɔ la ka sɔrɔ ka ta'a tɔɔ di cidenw ma.

³O tuma na, Piyɛri y'a fɔ a ye ko: “Ananiyasi, a kɛra di i y'a to Sutana sera i kɔrɔ fɔɔ i bɛ galon tigɛ Nii Senuman ye? Mun na i ye foro sɔngɔ nin dɔ dogo?

⁴E tun tɛ se ka foro nin feereko to yen wa? Hali n'i y'a feere fana, e tun tɛ se ka to n'a sɔngɔ ye i yɛrɛ sago la wa? A do kɛra di miiriyajugu nin donna i dusu la? I ma galon tigɛ mɔgɔw ye dɛ, i y'a tigɛ Ala le ye.”

⁵Ananiyasi y'o kuma mɛn dɔrɔn, a benna ka sa. Mɔgɔ minw y'o kibaru mɛn, siranyaba ye olu bɛɛ minɛ.

⁶Kanbelenw y'a suu konya kɛ, ka ta'a suu don.

⁷Lɛrɛ saba nyɔgɔn tɛmɛnin kɔ, Ananiyasi ka muso sera o yɔrɔ la, nga a tun ma bɔ koo nin kala ma.

⁸Piyɛri y'a nyininga ko: “Tinyɛ fɔ n ye. Aw y'aw ka foro feere daa nin na wa?” Muso y'a jaabi ko ɔnhɔn.

⁹O tuma na, Piyɛri y'a fɔ a ye ko: “Mun na aw bɛnna ka Matigi[3] darabɔ? Ayiwa, mɔgɔ minw taara i cɛɛ suu don, u segitɔ filɛ nin ye. U bɛna taa n'i fana suu ye.”

¹⁰O yɔrɔnin bɛ, muso nin benna Piyɛri kɔrɔ ka sa. Kanbelen nunu donna k'a sanin sɔrɔ. U y'a ta ka ta'a suu don a cɛɛ kaburu gɛrɛfɛ.

¹¹Siranya ye Ala ka jama minɛ kosɛbɛ, mɔgɔ minw bɛɛ fana y'o kibaru mɛn, olu bɛɛ siranna kosɛbɛ.

¹²Cidenw tun bɛ kabako caaman kɛ jama nyana. U bɛ Alabatosoba donda min wele ko Solomani ka bolonda, kalandenw bɛɛ tun bɛ to ka nyɔgɔn lajɛn yen ni miiriya kelen ye.

¹³Nga mɔgɔ tɔw si tun tɛ sɔn ka taa jɛn n'u ye. O bɛɛ n'a ta, jama tun b'u tando.

¹⁴Cɛɛ ni musow caaman tun bɛ lara Matigi la ka fara kalanden jɛnkulu kan.

¹⁵Mɔgɔw tun bɛ bɔ n'u ka banabagatɔw yɛrɛ ye ka na u lala siradaw la dɛbɛ ni kalakaw kan, janko Piyɛri tɛmɛtɔ suma ka kɛ u dɔ kan waasa u ka kɛnɛya.

¹⁶Mɔgɔw tun bɛ bɔ hali Zeruzalɛmu dafɛ duguw la, k'u ka banabagatɔw ni jinatɔw ta ka na. U bɛɛ fana tun bɛ kɛnɛya.

¹⁷O la, sarakalasebagaw kuntigiba n'a ka dakɔrɔsigiw olu minw ye Sadusenyɛw ye, u bɛɛ dimininba

¹⁸wilila ka ciden nunu minɛ jama nyana k'u don kaso la.

¹⁹Nga Matigi y'a ka mɛlɛkɛ ci sufɛ ka na kasobon daa yɛlɛ ka bɔ ni ciden nunu ye k'a fɔ u ye ko

²⁰u ka taa Alabatosoba kɔnɔ, ka Ala ka sira taamacogo fɔ mɔgɔw ye.

²¹U ye mɛlɛkɛ ka kuma labato. Sɔgɔma joona, u sera Alabatosoba kɔnɔ k'a daminɛ ka mɔgɔw kalan. O tuma na, sarakalasebagaw kuntigiba n'a ka dakɔrɔsigiw taara u ka nyɔgɔnyeyɔrɔ la. U ye Zuwifuw ka kititigɛlaw bɛɛ lajɛn, ka sɔlidasiw bila k'u ka taa cidenw bɔ kaso la ka na n'u ye.

²²Nga u taara se, u ma cidenw sɔrɔ kasobon kɔnɔ. U segira ka taa o nyafɔ ko:

²³“An taara se ka daa yɛlɛ ka don, an ma mɔgɔ si sɔrɔ yen. K'a sɔrɔ dakɔlɔsibagaw tun bɛ daa la, a fana tun sɔgɔnin lo ka nya.”

²⁴Alabatosoba kɔlɔsibagaw nyamɔgɔ, ni sarakalasebagaw kuntigiw y'o kibaru nin mɛn, u bɛɛ kɔnɔnafilila kosɛbɛ o koo la. U tora ka nyɔgɔn nyininga ko koo nin laban bɛna kɛ cogo di.

²⁵K'u t'o la, mɔgɔ dɔ nan'a fɔ u ye ko: “A filɛ, aw ye mɔgɔ minw don kaso la dɛ, u b'a la ka jama kalan Alabatosoba kɔnɔ.”

²⁶O tuma na Alabatosoba kɔlɔsibagaw nyamɔgɔ n'a ka mɔgɔw taara yen ka cidenw wele. Nga u m'u jagoya, bari u tun bɛ siran ko jama kana na u bon ni kabakuruw ye.

²⁷U nana ni cidenw ye u ka kiti tigɛyɔrɔ la. Sarakalasebagaw kuntigiba y'u nyininga ko:

²⁸“An tun ma kangari la aw ye ko aw kana mɔgɔw kalan a koo la wa? Nga aw ye Zeruzalɛmukaw tulo fa n'aw ka kalan ye. O tuma na, aw b'a fɛ cɛɛ nin fagako hakɛ ka ben anw kan le wa?”

²⁹O la, Piyɛri ni ciden tɔw y'u jaabi ko: “Anw tɛ se ka ban Ala sago la ka adamadenw ta kɛ.

³⁰Aw tun ye Yezu min gwengwen k'a faga lɔgɔ kan dɛ, an bɛmaw ka Ala y'a kunun,

³¹k'a kɛ mɔgɔba ye, k'a sigi a yɛrɛ kɔrɔ masaya la, ani k'a kɛ kisibaga ye, janko ale sababu la, Isirayɛlidenw ka se k'u sɔɔn yɛlɛma, Ala ka yafa u ma.

³²Ala y'o koo minw kɛ, an y'o seerew ye ani Nii Senuman, Ala y'o min di a sagokɛlaw ma.”

³³Cidenw ka kuma nunu ye kititigɛlaw dusu gwan fɔɔ u y'a fɔ k'u ka kan ka faga.

³⁴Nga Farizinyɛ dɔ tun bɛ kititigɛlaw cɛma, a tɔgɔ tun ko Gamaliyɛli, sariya karamɔgɔ tun lo. Bɛɛ tun bɛ bonya la a kan. Ale wilila k'a fɔ ko cidenw ka bɔ kɛnɛma fɔlɔ.

³⁵O kɔ, a ko: “Eyi! Isirayɛlidenw, aw bɛna koo min kɛ mɔgɔ nunu na, aw y'a jati minɛ ka nya dɛ!

³⁶A ma mɛn kosɛbɛ, Tedasi wilila ko ale ye mɔgɔba ye. Mɔgɔw tugura a kɔ fɔɔ ka se mɔgɔ kɛmɛ naani nyɔgɔn ma. A fagara tuma min na, a kɔmɔgɔw bɛɛ ma jɛnsɛn ka tunu wa?

³⁷O kɔ, Ɔrɔmukaw tun bɛ jamanadenw jatira tuma min na, Zuda ka bɔ Galile wilila n'a kɔmɔgɔ caaman ye ka muruti. Ale fana fagara, a kɔmɔgɔw bɛɛ jɛnsɛnna.

³⁸Ayiwa, ne b'a fɔ aw ye, aw kana mɔgɔ nunu ka koo nin ta aw kuun na tugu, aw y'u to. N'o y'a sɔrɔ n'u ka ;naniya, walima u ka baara bɔra adamadenw na, a bɛna na cɛn.

³⁹Nga n'o y'a sɔrɔ ni Ala nɔɔ lo, aw tɛna se ka foyi kɛ o la. An k'an yɛrɛ kɔlɔsi an kana kɛ Ala juguw ye.” Ayiwa, u sɔnna Gamaliyɛli ka kuma na.

⁴⁰U ye cidenw wele k'u bugɔ ni golokamiw ye ka ban, u ye kangari la u ye k'u kana Yezu tɔgɔ wele abada. U y'u labila ka taa.

⁴¹Cidenw nisɔn diyanin bɔra kiti tigɛyɔrɔ la, bari Ala ye bonya la u kan o min kɛra u lɔgɔbɔko ye Yezu tɔgɔ kɔsɔn.

⁴²Loon o loon, Yezu min ye Ala ka Mɔgɔwolomanin ye, cidenw tun bɛ to ka taa ale ka kibaru diman fɔ mɔgɔw ye Alabatosoba kɔnɔ, ani u yɛrɛ ka soow kɔnɔ.