Read LAYIDUKURA KƐWALIW 6 Bible Online

KƐWALIW 6 - LAYIDUKURA bible

KƐWALIW 6

¹Kalandenw tora ka buguya dɔrɔn. Waati dɔ la, Zuwifu minw bɔra yɔrɔ wɛrɛ, n'u bɛ girɛkikan fɔ, olu tora ka tɔw kɔrɔfɔ k'u tɛ to k'u mako don olu ka firiyamusow la kosɛbɛ dumuni tilantuma na loon o loon.

²O la, ciden tan ni fila nunu ye kalandenw bɛɛ lajɛnnin wele k'a fɔ u ye ko: “Anw man kan ka to dumuni tilanko la, ka Ala ka kuma fɔko bila gɛrɛfɛ.

³O kama, aw yɛrɛ ka mɔgɔ wolonwula woloma aw cɛma minw sɔɔn ka nyi, ni hakili b'u fɛ, ni Nii Senuman. O la, anw bɛna dumuni tilanko don olu bolo.

⁴Anw kɔni bɛna to ka Ala ka kuma fɔ, ani ka bila Ala daliko nyafɛ.”

⁵O kuma nin diyara jama ye. O tuma na, u ye mɔgɔw woloma, olu tɔgɔw filɛ nin ye: Etiyɛni, min jigi tun bɛ Ala kan kosɛbɛ ni Nii Senuman tun b'a fɛ, ni Filipi, ani Porokɔri, Nikanɔri ni Timɔn, ani Parimenasi, ani Nikola ka bɔ Antiyɔsi, min donna Zuwifuya la.

⁶O y'u yira cidenw na, olu y'u bolo la u kuun na kelen kelen ka Ala dali u ye.

⁷Ala ka kuma tora ka jɛnsɛn, kalandenw tora ka caya kosɛbɛ Zeruzalɛmu kɔnɔ. Sarakalasebaga caaman sɔnna ka la Yezu la.

⁸Barika tun bɛ Etiyɛni na, Ala ka duba tun b'a kan kosɛbɛ. A tora ka kabako caaman kɛ mɔgɔw nyana.

⁹O bɛɛ kama, Alabatoso min bɛ wele ko Jɔnhɔrɔnyaninw ka Alabatoso, o ka mɔgɔ dɔw nana sɔsɔli daminɛ ni Etiyɛni ye. Sirɛnikaw ni Alɛkisandirikaw ni Silisikaw, ani Azikaw fana nii tun b'o la.

¹⁰Nga u daa tun tɛ sera Etiyɛni kɔrɔ, bari a tun bɛ kuma ni hakilitigiya ye Nii Senuman barika la.

¹¹O la, u ye mɔgɔ dɔw daa san k'u k'a fɔ ko a tun bɛ Ala ni Musa tɔgɔ cɛnna.

¹²O kama cɛkɔrɔbaw ni sariya karamɔgɔw ani jama bɛɛ murutira Etiyɛni kama ka girin k'a minɛ ka taa n'a ye u ka kititigɛlaw fɛ.

¹³U taara n'u ka galontigɛla dɔw fana ye o yɔrɔ la. Olu y'a fɔ ko: “Cɛɛ nin bɛ to k'a dajugu la an ka yɔrɔ senuman ni sariya kan.

¹⁴An y'a mɛn a daa la ko Nazarɛti Yezu tɔgɔla nin bɛna yɔrɔ senuman nin ci, sariya min sigira Musa ka waati la, k'o yɛlɛma.”

¹⁵O tuma na, kititigɛlaw bɛɛ nyaa basanin tun bɛ Etiyɛni kan. A nyaa kɛra i n'a fɔ mɛlɛkɛ ta u nyakɔrɔ.