Read LAYIDUKURA KƐWALIW 8 Bible Online

KƐWALIW 8 - LAYIDUKURA bible

KƐWALIW 8

¹Etiyɛni ka fagako kɔni tun diyara Sɔli ye. O loon kelen yɛrɛ la, u y'a daminɛ ka Ala ka jama tɔɔrɔ kosɛbɛ. U ye dugu bila jagoya la, ka jɛnsɛn kongoduguw la, Zuda mara, ani Samari mara la, fɔɔ cidenw dɔrɔn.

²Mɔgɔnyuman dɔw ye Etiyɛni suu don k'a sanga kɛ kosɛbɛ.

³Nga Sɔli kɔni, ale tun tora ka Ala ka jama tɔɔrɔ dɔrɔn, ka to ka taa u minɛ soow kɔnɔ, cɛɛ fara musow kan, ka taa u don kaso la.

⁴Ayiwa, minw tun bolila ka bɔ Zeruzalɛmu, ni olu sera yɔrɔ o yɔrɔ, u tun bɛ Yezu ka kibaru diman fɔ o yɔrɔ la.

⁵O cogo la, Filipi fana sera dugu dɔ la Samari mara la, ka Ala ka Mɔgɔwolomanin koo fɔ u ye.

⁶Mɔgɔw ye Filipi ka kabakokɛninw kibaru mɛn ani k'u ye fana, u bɛɛ jɛnna k'a lamɛn kosɛbɛ.

⁷Jinatɔ caaman ka jinaw tun bɛ bɔ u la ni kule ye. Nanbaraw, ni senkelennin caaman kɛnɛyara.

⁸Dugu mɔgɔw nisɔn diyara kosɛbɛ.

⁹Cɛɛ dɔ tun b'o dugu nin kɔnɔ, min tɔgɔ tun ko Simɔn. A tun bɛ jinamoriya kɛ ka dugu mɔgɔw bɛɛ kabakoya, k'a yɛrɛ kɛ mɔgɔba ye.

¹⁰Mɔgɔw bɛɛ, denmisɛn fara mɔgɔkɔrɔbaw kan, u bɛɛ tun bɛ mɛnni kɛ Simɔn fɛ, ani k'a bonya. U tora k'a fɔ ko: “Batofɛnba ka sebagaya le bɛ cɛɛ nin bolo.”

¹¹Mɔgɔw tun bɛ mɛnni kɛ a fɛ, bari a tun b'u dabari ban n'a ka jinamoriya ye kabini tumajan.

¹²Nga, Filipi nana Yezu ka kibaru diman ni Ala ka masaya sigiko fɔ u ye minkɛ, u lara Yezu la. Filipi y'u batize, cɛɛ fara musow kan.

¹³Ale Simɔn yɛrɛ fana lara Yezu la, a batizera. O kɔ, a ma sɔn ka bɔ Filipi kɔ tugu. Filipi tun bɛ koba ni kabako minw kɛ, olu tun ye Simɔn dabari ban.

¹⁴Cidenw tora Zeruzalɛmu k'a mɛn ko Samarikaw sɔnna Ala ka kuma ma minkɛ, u ye Piyɛri ni Zan ci u fɛ yen.

¹⁵Olu taara yen, ka Ala dali u ye, janko u ka se ka Nii Senuman sɔrɔ,

¹⁶bari u tun batizera Matigi Yezu tɔgɔ la dɔrɔn. U tun ma Nii Senuman sɔrɔ fɔlɔ.

¹⁷O tuma na, Piyɛri ni Zan y'u bolo la u kelen kelen kuun na, u bɛɛ ye Nii Senuman sɔrɔ.

¹⁸Simɔn y'a ye ko cidenw y'u bolo la mɔgɔ nunu kuun na n'u ye Nii Senuman sɔrɔ minkɛ, a tun b'a fɛ ka wari d'u ma,

¹⁹a y'a fɔ u ye ko: “Aw ka sebagaya nin dɔ di ne ma, waasa ni ne ye n bolo la mɔgɔ min kuun na, o tigi ka Nii Senuman sɔrɔ.”

²⁰Nga Piyɛri y'a jaabi ko: “E n'i ka wari bɛɛ ka danga, bari i ka miiri la ko Ala ka sebagaya bɛ se ka san ni wari ye.

²¹Ayiwa, niyɔrɔ t'i fɛ koo nin na, lɔyɔrɔ tɛna d'i ma, bari i kɔnɔ gwɛnin tɛ Ala nyakɔrɔ.

²²I ka nimisa ka yafa dali Matigi fɛ i ka miirijugu nin kɔsɔn, n'a sɔrɔ a bɛna yafa i ma.

²³N'o tɛ, i sɔɔn ka jugu, i kɛnin bɛ halibi kojugu ka jɔɔn ye.”

²⁴Simɔn y'a jaabi ko: “Aw yɛrɛ ka Matigi dali ne ye, waasa aw ye min fɔ, o kana n sɔrɔ.”

²⁵Piyɛri ni Zan tun bɛ min lɔn Yezu koo la, u y'o fɔ mɔgɔw ye ka ban, u kɔsegitɔ Zeruzalɛmu, u tora ka Yezu ka kibaru diman fɔ Samari mara dugu caaman na.

²⁶Ayiwa, Matigi ka mɛlɛkɛ kumana Filipi fɛ ko: “Filipi, i labɛn ka taa worodugu nyafan fɛ. Sira min bɛ bɔ Zeruzalɛmu ka taa Gaza, i k'o minɛ, a taamabagaw man ca.”

²⁷O la, Filipi wilila k'o sira minɛ. A taara Etiyopika dɔ sɔrɔ sira kan, min tun bɔra Ala batoyɔrɔ la Zeruzalɛmu. O cɛɛ nin tun ye Etiyopi jamana ka masamuso Kandasi ka baaranyamɔgɔw dɔ ye. Ale tun bɛ masamuso ka nafolo bɛɛ kunna.

²⁸A segitɔ, a tun siginin bɛ a ka wotoro kɔnɔ ka to ka kira Ezayi ka kitabu kalan.

²⁹Nii Senuman y'a fɔ Filipi ye ko a ka gwɛrɛ wotoro nin na.

³⁰Filipi bolila ka gwɛrɛ, k'a ye ko cɛɛ bɛ kira Ezayi ka kitabu kalanna. A y'a kaan to a ma ko: “I bɛ yɔrɔ min kalanna ten wo, i b'a kɔrɔ lɔnna wa?”

³¹A y'a jaabi ko: “N bɛ se k'a kɔrɔ lɔn cogo di ni mɔgɔ ma n dɛmɛ?” O la, a y'a nyini Filipi fɛ ko a ka yɛlɛ ka sigi ale gɛrɛfɛ.

³²A tun bɛ yɔrɔ min kalanna, a sɛbɛnnin tun bɛ yen ko: “A kɛra i n'a fɔ saga, u bɛ taara ni min ye fagayɔrɔ la, walima u bɛ min siiw tigɛtigɛra. A ma kasi.

³³Yɛrɛmajigi fɛ, a ma joo sɔrɔ. Jon bɛn'a tɔgɔ wele tugu, bari a ye dinyɛ to a ma sii sɔrɔ, k'a bila a kɔ.”

³⁴Cɛɛ nin y'a fɔ Filipi ye ko: “O tuma na kira nin bɛ kuma jon le koo la? Sabali k'o fɔ ne ye. A yɛrɛ koo lo wa, walima mɔgɔ wɛrɛ koo lo?”

³⁵O la, Filipi y'a bolo tintin o yɔrɔ nin kan, ka Yezu ka kibaru diman fɔ cɛɛ ye.

³⁶K'u to sira kan, u sera yɔrɔ dɔ la jii tun bɛ o yɔrɔ la. Cɛɛ ko: “Jii filɛ nin ye, mun bɛ se k'i bali ka ne batize?” [

³⁷Filipi y'a jaabi ko: “N'i lara Yezu la kosɛbɛ, ne bɛ se k'i batize.” Cɛɛ ko: “Ne lara a la ko Yezu Krista ye Ala Deen ye.”]

³⁸A y'a fɔ ko wotoro bolibaga ka wotoro lalɔ. Filipi ni cɛɛ jigira ka don jii kɔnɔ, Filipi y'a batize.

³⁹U bɔra jii kɔnɔ tuma min na, Nii Senuman[4] ye Filipi fosi ka bɔ yen. Cɛɛ m'a ye tugu. Nga a nisɔn diyanin taara n'a ka sira ye.

⁴⁰Filipi kɔni, ale nan'a ye ko a bɛ Azɔti. A tora ka taa duguw la, ka kibaru diman fɔ o yɔrɔw la, fɔɔ ka na se Sezare.