Read LAYIDUKURA ƆRƆMUKAW 10 Bible Online

ƆRƆMUKAW 10 - LAYIDUKURA bible

ƆRƆMUKAW 10

¹N balimaw, min bɛ ne dusu la, ani n bɛ min nyini Ala fɛ Isirayɛlidenw ye, o ye u ka kisiliko ye.

²Bari ne bɛ se k'a fɔ k'u jijanin bɛ kosɛbɛ Ala koo la, u jijanin bɛ kɔni, nga lɔnniyasɛbɛ t'u fɛ.

³Tilenninya min bɛ sɔrɔ Ala fɛ u m'o koo faamu, o la, o tun bɛ tilenninya nin nyini u yɛrɛ ka fanga la. O cogo la, tilenninya min bɛ sɔrɔ Ala fɛ, u ma se k'u yɛrɛ majigi Ala ye ka mɛnni kɛ o koo la.

⁴Bari sariya bɛ laban Krista le ma, janko ni mɔgɔ min sɔnna ka la Krista la Ala k'o tigi jati mɔgɔtilennin ye.

⁵Musa fana y'a sɛbɛn tilenninya koo la o min bɛ sɔrɔ sariya labatoli barika la ko: “Ni mɔgɔ min bɛ sariya sira taama, o tigi bɛna hɛrɛ sɔrɔ o barika la.”

⁶Tilenninya min bɛ sɔrɔ jigi barika la, ale b'a nyini i fɛ: “I kana miiri i dusu la ko: ‘Jon le bɛna yɛlɛ Ala fɛ?’ (N'i y'o miiri, i b'a fɛ Krista ka kɔsegi ka na le.)

⁷Walima ‘Jon bɛna jigi dingɛ dibiman kɔnɔ?’ ” (O ye Krista ka kununko ye tugu.)

⁸Mun le bɛ fɔ tugu? “Kuma nin b'i tulo kɔrɔ, a b'i daa la ani a b'i kɔnɔ.” An bɛ kuma min fɔra, o ye jigi koo ye.

⁹N'i sɔnna k'a fɔ ko Yezu ye Matigi ye ani ka l'a la ko Ala y'a kunun a sanin kɔ, e bɛna kisi.

¹⁰Tinyɛ na, n'i lar'a la i dusu la, Ala b'i jati mɔgɔtilennin ye, n'a bɔra i daa la, i bɛ kisi.

¹¹Bari a fɔra Ala ka kuma na ko: “Ni mɔgɔ min lara Ala la, o tigi tɛna maloya.”

¹²O cogo la, danfara bɔko tɛ Zuwifuw ni siya wɛrɛw cɛ, u bɛɛ ka Matigi ye kelen ye, min man'a dali, a bɛ mɛnni kɛ o tigi fɛ.

¹³Bari: “Mɔgɔ o mɔgɔ min mana Matigi dali, o tigi bɛna kisi.”

¹⁴U bɛ se ka kɛ cogo di ka Matigi dali, n'u ma l'a la? U fana bɛ se ka l'a la cogo di, n'u m'a koo mɛn? U fana bɛ se k'a koo mɛn cogo di, ni mɔgɔ m'a fɔ u ye?

¹⁵Mɔgɔ fana bɛ se k'a koo fɔ cogo di, n'u ma ci? O cogo la, a fɔra Ala ka kuma na ko: “Mɔgɔ minw bɛ kibaru diman fɔ,” ko: “Olu ta ka nyi!”

¹⁶Nga mɔgɔ bɛɛ ma sɔn kibaru diman ma, o le kɔsɔn Ezayi y'a fɔ ko: “Matigi, jon le lara an ka waajuli la?”

¹⁷O cogo la, mɔgɔ bɛ waajuli mɛn ka sɔrɔ ka la Krista la, waajuli le ye Krista ka koo nyafɔli ye.

¹⁸O la, ne bɛ n yɛrɛ nyininga ko u m'o mɛn wa? U kɔni y'o mɛn. A fɔra Ala ka kuma na ko: “Waajulikɛlaw kaan do mɛnna yɔrɔ bɛɛ la, u ka kuma sera dinyɛ faan bɛɛ la.”

¹⁹Ne bɛ n yɛrɛ nyininga tugu ko: “Isirayɛlidenw tun ma nin faamu wa?” Musa kɔnna ka Ala ka kuma nin fɔ ko: “Siya min ma kɛ foyi ye aw nyana, ne bɛna olu kɛ ka keliya don aw dusu la, hakili tɛ siya min fɛ, ne bɛn'a kɛ aw bɛ dimi o le kɔrɔ.”

²⁰Ezayi taara nya k'a fɔ yɛrɛ ko Ala y'a fɔ ko: “Mɔgɔ minw tun tɛ ne yɔrɔ nyinina, olu ye ne ye, minw ma ne dali, ne ye n yɛrɛ yira u la.”

²¹Nga Isirayɛlidenw koo la, a y'a fɔ ko Ala ko: “Tile kuturu kɔnɔ, ne b'a fɛ ka bɛn ni siya murutinin nin ye, olu minw tulo ka gwɛlɛ.”