Read LAYIDUKURA ƆRƆMUKAW 11 Bible Online

ƆRƆMUKAW 11 - LAYIDUKURA bible

ƆRƆMUKAW 11

¹Ne bɛ n yɛrɛ nyininga k'o tuma na, Ala y'a ka Isirayɛli jama fili wa? Ayi dɛ! Ne fana y'u dɔ ye, Ibrayima deen dɔ, ka bɔ Bɛnzamɛn kɔmɔgɔw la.

²Ala kɔnna ka siya min kɛ a ta ye, a m'o fili dɛ! N'aw bɛ Ala ka kuma kalan Eli koo fɔra yɔrɔ min na, a ye Ala dali Isirayɛlidenw koo la cogo min na, aw m'o faamu wa?

³A ko: “Matigi, u ye i ka kiraw faga k'i ka sarakabɔyɔrɔw bɛɛ cɛn, a tora ne kelen u b'a fɛ ka ne fana faga.”

⁴Nga Ala y'a jaabi ko di? A y'a fɔ a ye ko: “Ne ye mɔgɔ waa wolonwula mara ne yɛrɛ ye, olu minw ma sɔn ka Baali bato.”

⁵O cogo la, bii fana dɔw bɛ yen minw kɛra u tɔɔ ye, Ala makarila minw na k'u woloma.

⁶Nga ni wolomani nin bɛ kɛ Ala ka makari barika la, kɛwali niin t'o la tugu, n'o tɛ, o tɛ kɛ makariko ye tugu.

⁷An bɛna mun le fɔ? Isirayɛlidenw tun bɛ fɛɛn min nyinina, u m'o sɔrɔ, nga minw wolomana olu y'o sɔrɔ, tɔ nunu dusu gwɛlɛyara

⁸ka kɛnyɛ ni Ala ka kuma ye ko: “Ala y'u kɛ hakilitanw ye, ka nyaa d'u ma, u tɛ se ka yeli kɛ ni minw ye, ka tulo d'u ma, u tɛ se ka mɛnni kɛ ni minw ye fɔɔ ka na se bii ma.”

⁹Masacɛ Dawuda fana y'a fɔ ko: “U ka dumuni ka kɛ u jaan, ni jɔɔ ye k'u minɛ, a ka kɛ u ka seen talonfɛn ye, ka kɛ u ka baarajugu sara ye!”

¹⁰Ko: “U nyaaw ka cɛn, u kana yeli kɛ tugu, A kɛ u birinin bɛ to tuma bɛɛ la.”

¹¹Ne bɛ n yɛrɛ nyininga tugu ko Isirayɛlidenw talonna ka ben minkɛ, ko u bɛna to ten wa? Ayi dɛ! Nga u filila, o le y'a to siya wɛrɛw sera ka kisili sɔrɔ, o fana kɛra sababu ye ka keliya don Isirayɛlidenw dusu la.

¹²N'u ka filiko kɛra dinyɛ ka hɛrɛ sɔrɔ sababu ye, ani u ka dɛsɛko ka kɛ siya wɛrɛw ka nafa ye, n'u nana segi Ala ma pewu pewu, o bɛna kɛ hɛrɛ ye kosɛbɛ.

¹³Ne b'o fɔ aw siya wɛrɛw ye, ne cira ka baara kɛ aw le ye, ne bɛ bonya la o baara nin kan,

¹⁴waasa ka keliya wili ne ka siya dusu la, janko dɔw ka se ka kisi u cɛma.

¹⁵Ala y'u bila gɛrɛfɛ minkɛ, n'o le kɛra sababu ye dinyɛ mɔgɔw sera ka bɛn ni Ala ye, u ka kɔsegiko ka bɛn ni Ala ye, o tɛna kɛ i n'a fɔ mɔgɔ le sara ka kunun wa?

¹⁶Sumankun fɔlɔ min mɔna, n'o dira Ala ma, o b'a yira ko a tɔɔ bɛɛ bɛ kɛ Ala ta ye. Ni yiri lili ka nyi, yiri bolow ka nyi.[8]

¹⁷Isirayɛlidenw bɛ i n'a fɔ olivuyiri min tutunin bɛ foro kɔnɔ, aw siya wɛrɛw bɛ i na fɔ waga kɔnɔ ta. U ye foro kɔnɔ ta bolo dɔw tigɛ, k'aw ta ka nɔrɔ o nɔɔ na janko aw ka nɛɛma sɔrɔ o juu fɛ.

¹⁸O kama, i kana i yɛrɛ bonya, ka bolotigɛninw lɔgɔbɔ bari i tɛ yiri juu ye, i ye bolo le ye.

¹⁹I bɛ se k'a fɔ fana ko bolo dɔ nunu tigɛra waasa i ka se ka nɔrɔ juu la.

²⁰O ye tinyɛ ye, olu tigɛra u ka lanabaliya le kama, aw nɔrɔla lanaya le barika la. O la, aw kana aw yɛrɛ bonya, aw ka siran le.

²¹Bari ni Ala ma se ka makari yiribolo kɔrɔman nunu na, aw ta tɛna kɛ ten fana wa?

²²Aw ka Ala ka nyumanya n'a ka fariyako filɛ, a fariyara Isirayɛlidenw ma olu minw benna, ani a ka nyi aw faan fɛ. Fɔɔ aw nɔrɔnin ka to a la, n'o tɛ aw bɛna tigɛ i n'a fɔ dɔ nunu.

²³Olu fana, n'u ma to u ka lanabaliya la, u niin bɛna don tugu, bari see bɛ Ala ye k'u niin don.

²⁴Aw minw ye siya wɛrɛw ye, n'aw niin donna, minw tun ye siya nin yɛrɛ ye n'u niin bɔra, olu ka kɔsegi ka don, o bɛ kɛ baasi ye wa?

²⁵N balimaw, ne t'a fɛ aw ka to kodogonin nin faamubaliya la, janko aw kana aw yɛrɛ jati kolɔnbagaw ye. Isirayɛliden dɔw bɛna to u ka dusukungwɛlɛya la fɔɔ siya tɔw ka donyɔrɔ sɔrɔ Ala fɛ.[9]

²⁶O cogo la fana, Isirayɛlidenw bɛɛ bɛna kisi, i n'a fɔ a fɔra Ala ka kuma na cogo min na ko: “Min bɛna mɔgɔw hɔrɔnya, ale bɛna bɔ Siyɔn dugu kɔnɔ, a bɛn'a kɛ Yakuba kɔmɔgɔw bɛ siran Ala nya.”

²⁷“Ni ne y'u ka kojugu yafa u ma tuma min na, o le bɛn'a yira ko ne bɛnna ni olu ye.”

²⁸Kibaru diman faan fɛ, u kɛra Ala juguw ye, o kɛra aw siya wɛrɛw ka dagamu ye, nga Ala ka wolomani faan fɛ, u koo ka di Ala ye u faaw kɔsɔn,

²⁹bari Ala ka makari n'a ka weleli tɛ se ka yɛlɛma.

³⁰Fɔlɔfɔlɔ, aw tun tɛ Ala ka kuma labato, sisan olu t'a labato, o le y'a to Ala makarila aw la.

³¹Olu banna k'a ka kuma labato sisan, o le y'a to a makarila aw la. A makarila aw la cogo min na, a bɛna makari olu la ten fana.

³²Bari Ala ye mɔgɔ bɛɛ to u ka murutili la, janko a ka se ka makari u bɛɛ la.

³³Ala dafanin lo, hakilitigiya ni lɔnniya la! Mɔgɔ tɛ se k'a ka kolatigɛninw faamu, a ka koo fana tɛ se ka faamu.

³⁴A fɔra Ala ka kuma na ko: “Jon le ye Matigi ka miiriya lɔn? Walima jon le kɛra a ladibaga ye?”

³⁵Walima: “Jon le kɔnna ka Ala sɔn, a ka sɔrɔ k'o sara?”

³⁶Bari fɛɛn bɛɛ bɔra ale le la, ale lo y'u bɛɛ dan, u kɛra a ta ye. Bonya ka la ale kan tuma bɛɛ la! Amiina.