Read LAYIDUKURA ƆRƆMUKAW 13 Bible Online

ƆRƆMUKAW 13 - LAYIDUKURA bible

ƆRƆMUKAW 13

¹Mɔgɔ kelen kelen bɛɛ k'a yɛrɛ majigi faamaw kɔrɔ olu minw b'an kunna, bari fangatigiya bɔra Ala fɛ, faama minw siginin bɛ yen, Ala le ye olu bɛɛ sigi.

²O la, mɔgɔ min bɛ ban faama ta ma, o tigi fana banna Ala ka fɔta le ma, o tigi fana bɛ jalaki ben a yɛrɛ kan.

³Ni mɔgɔ min bɛ konyuman kɛ, o tigi man kan ka siran kititigɛlaw nya, min bɛ kojugu kɛ, ale le bɛ siran. E b'a fɛ e kana siran faama nya wa? Banba ka konyuman kɛ, faama bɛna tila k'i tɔgɔnyuman fɔ.

⁴Bari a bɛ yen Ala ka baara le kama janko k'i seen bila siranyuman na, nga n'i ye kojugu kɛ i ka siran, bari a sigikun ka maramanfɛn d'a ma tɛ dɔ wɛrɛ ye, ka kojugukɛlaw jalaki. N'a b'o kɛ tuma min na, a bɛ Ala ka baara le kɛra k'a ka dimiko yira o tigi la.

⁵O la do, a kɛra wajibi ye mɔgɔ k'a yɛrɛ majigi faamaw kɔrɔ, o kana kɛ ko u bɛna i jalaki dama, nga o ka kɛ Alanyasiran kɔsɔn.

⁶O le kama, aw bɛ nisɔngɔ sarala, bari mɔgɔ minw b'a minɛna, olu ye Ala ka baarakɛlaw ye.

⁷Fɛɛn min ka kan ka di mɔgɔ min ma, aw k'o di o tigi ma, nisɔngɔ, ni wusuru ka kan ka di min ma, o ka di o tigi ma. Aw ka kan ka siran mɔgɔ min nya, aw bɛ siran o tigi nya, min ka kan ni bonya ye, aw k'o bonya.

⁸Foyi kana sɔrɔ i n'i mɔgɔnyɔgɔn cɛ fɔɔ nyɔgɔnkanuya, bari mɔgɔ min y'a mɔgɔnyɔgɔn kanu, o tigi ye sariya labato.

⁹Sariya kuma minw b'a yira ko: “I kana kakalaya kɛ, i kana mɔgɔ faga, i kana sonyali kɛ, i nyaa kana bɔ i tɔnyɔgɔn ka fɛɛn na,” ani o tɔ nunu bɛɛ bɛ taa kɛ kuma kelen nin ye ko: “I k'i mɔgɔnyɔgɔn kanu i n'a fɔ i yɛrɛ.”

¹⁰Kanuya bɛ mɔgɔ min dusu la, o tigi tɛ kojugu kɛ a mɔgɔnyɔgɔn na, o la sariya bɛ se ka labato kanuya barika la.

¹¹An bɛ waati min na, aw b'o lɔn. Sisan aw sinɔgɔbagatɔw, aw ye wili ka banba, an kisiwaati surunyana bii yɛrɛ ka tɛmɛ an y'an jigi la Krista kan waati min na.

¹²Dugu gwɛra ka ban, kɛnɛ cira. O la, an ka dibidibiko dabila ka kogwɛnin kɛ.

¹³An ka taama tilenninya la i n'a fɔ mɔgɔ bɛ taama cogo min na tile fɛ. An kana kɛ nugubatɔw ni dɔrɔtɔw ye. An k'an yɛrɛ kɔlɔsi kakalaya sifa bɛɛ ma, an kana kɛ kɛlɛtigɛlaw ye, ani keliya kana sɔrɔ an dusu la.

¹⁴Aw k'a to Matigi Yezu Krista ka koo ka sigi aw kɔnɔ, aw kana miiri farisogo koo la ka tɛmɛ janko nigɛjugu kana se aw kɔrɔ.