Read LAYIDUKURA ƆRƆMUKAW 15 Bible Online

ƆRƆMUKAW 15 - LAYIDUKURA bible

ƆRƆMUKAW 15

¹Fanga b'an minw na, an ka kan ka barikatanw dɛmɛ, an kana an diyanakow dama kɛ.

²An kelen kelen bɛɛ k'an tɔnyɔgɔn diyanakow kɛ a ka nya kama, janko ka se k'a dɛmɛ a ka taa nya.

³Fɛɛn min tun ka di Krista ye a m'o kɛ, i n'a fɔ a fɔra Ala ka kuma na cogo min na ko: “I tɔgɔ cɛnbagaw ka tɔgɔcɛn le sera ne ma.”

⁴Koo minw bɛɛ tun fɔra Ala ka kuma na kabini fɔlɔfɔlɔ, o fɔra ka hakili d'an ma, janko an jaa ka gwɛlɛya ani ka munyu, ka jigi sɔrɔ o barika la.

⁵Ala min bɛ munyuli di mɔgɔ ma ani k'a jigi tugu, ale k'aw ka miiriya kɛ kelen ye i n'a fɔ Yezu Krista b'a nyini cogo min na,

⁶janko aw kɔnɔ ka kɛ kelen ye, ka jɛn ka Ala tando ale min ye an Matigi Yezu Krista Faa ye.

⁷Aw ka nyɔgɔn minɛ kosɛbɛ i n'a fɔ Krista y'aw minɛ cogo min na, janko bonya ka la Ala tɔgɔ kan.

⁸Ne b'a fɔ tinyɛ na ko Ala ka kantigiya kɔsɔn, Krista ye baara kɛ Zuwifuw ye, janko Ala tun ye layidu minw ta an faaw ye o ka kɛ.

⁹A nakun fana ye nin ye: janko siya wɛrɛw ka Ala bonya a ka makari kɔsɔn, ka kɛnyɛ ni Ala ka kuma ye min fɔra ko: “O le y'a to ne bɛna i tando siya wɛrɛw cɛma, n bɛna dɔnkili la i ye k'i tɔgɔ bonya.”

¹⁰Ani a fɔra tugu ko: “Siya wɛrɛw, aw ye nisɔndiya n'a ka jama ye.”

¹¹A fɔra tugu ko: “Siyaw bɛɛ, aw ka Matigi tando, jama bɛɛ k'a bonya.”

¹²Kira Ezayi fana y'a fɔ ko: “Zese kɔmɔgɔ dɔ bɛna wili, ale bɛna sigi siyaw kunna. Siyaw bɛna u jigi la ale kan.”

¹³Ala min bɛ mɔgɔ jigi tugu, ale ka kɛ aw bɛ nisɔndiya kosɛbɛ, ka hɛrɛ kɛ aw ye aw ka lanaya kɔsɔn, janko aw ka jigisɛbɛ sɔrɔ Nii Senuman barika la.

¹⁴N balimaw, aw yɛrɛ ta faan fɛ kɔni, ne jigi b'a la ko aw ye mɔgɔnyumanw ye, lɔnniyadafanin b'aw fɛ, aw bɛ se ka nyɔgɔn ladi.

¹⁵Ne bɛ sɛbɛ min cira aw ma, ne ye o yɔrɔ dɔw sɛbɛn ni jagwɛlɛya ye koo dɔw kama, janko ka se k'aw hakili jigi kotɛmɛnin na Ala ka nɛɛma barika la,

¹⁶a ye o min kɛ ne ye ka ne kɛ Yezu Krista ka baarakɛla ye siya wɛrɛw cɛma. Ne bɛ Ala ka kibaru diman fɔ u ye, janko olu fana ka kɛ saraka diman ye Ala fɛ, min saniyanin bɛ Nii Senuman barika la.

¹⁷O la, ne bɛ se ka ne yɛrɛ bonya Yezu Krista barika la, Ala ka baara kɔsɔn.

¹⁸Krista ye ne dɛmɛ ka baara min kɛ ka siya wɛrɛw dɛmɛ ka mɛnni kɛ Ala fɛ, ne tɛ foyi fɔ n'o tɛ. Ne y'u dɛmɛ ni kuma ni kɛwali ye

¹⁹ani kabako sifa caaman ye Nii Senuman barika la. O cogo la, k'a ta Zeruzalɛmu fɔɔ ka taa se Iliri mara la, ne ye Krista ka kibaru bɛɛ fɔ o yɔrɔw la.

²⁰Nga ne ka ;naniya tun ye ka kibaru diman fɔ yɔrɔ la, Krista tɔgɔ tun ma fɔ yɔrɔ min na fɔlɔ, janko ne kana ne ka baara kɛ k'a la mɔgɔ dɔ ka baarakɔrɔ kan.

²¹O cogo la, ne ka baara bɛnna Ala ka kuma ma o min b'a fɔ ko: “A koo ma fɔ mɔgɔ minw ye, olu bɛn'a ye, mɔgɔ minw m'a koo mɛn ka ye, olu bɛn'a ka koo faamu.”

²²O le ye ne bali tuma caaman ka taa aw fɛ.

²³Nga a saan damani filɛ nin ye, ne tun b'a fɛ ka se aw fɛ. Sisan ne ka baara nɔgɔyara o mara nunu na.

²⁴Ni ne bɛ taa Ɛsipanyɛ tuma min na, ne b'a fɛ ka lɔ aw fɛ o tuma na k'aw filɛ ka waati dɔɔni kɛ n'aw ye ne taatɔ aw ka ne dɛmɛ.

²⁵Nga sisan ne bɛ taa Zeruzalɛmu ka dɛmɛ kɛ Ala ka mɔgɔw ye.

²⁶Bari Krista kɔmɔgɔw minw bɛ Maseduwani mara ni Akayi mara la, olu b'a fɛ ka Ala ka jama dɛmɛ Zeruzalɛmu, o minw dɛsɛnin bɛ.

²⁷U y'o latigɛ, u fana tun ka kan k'o kɛ. Bari ni olu siya tɔw ye niyɔrɔ sɔrɔ u ka Ala koo la, olu fana ka kan k'u dɛmɛ ni u bololafɛnw ye.

²⁸O la, ni ne nana tila o koo la tuma min na, ni n taara o dɛmɛ nin di ka ban, ne bɛna tɛmɛ aw fɛ ka taa Ɛsipanyɛ jamana na.

²⁹Ne lanin b'a la ko ne bɛna se aw fɛ tuma min na, n bɛna se ni Krista ka duba ye aw fɛ.

³⁰Ne b'aw dali n balimaw, an Matigi Yezu Krista kɔsɔn ni Nii Senuman ka kanuya kɔsɔn, ko aw ka ne dɛmɛ kɛlɛ nin na, n'aw ka Aladali ye aw b'o minw kɛ ne ye,

³¹janko ne ka se ka kisi Zude mara Alanyasiranbaliw ma, ani ne bɛ taa ni dɛmɛ min ye Zeruzalɛmu, o koo ka se ka diya Ala ka mɔgɔw ye o yɔrɔ la.

³²O cogo la, ne bɛna se aw fɛ ni nisɔndiya ye, Ala sago la, ani ka se ka lafinyɛ dɔɔni aw fɛ.

³³Hɛrɛtigi Ala ka to aw bɛɛ fɛ! Amiina.