Read LAYIDUKURA ƆRƆMUKAW 2 Bible Online

ƆRƆMUKAW 2 - LAYIDUKURA bible

ƆRƆMUKAW 2

¹E kɛra mɔgɔ o mɔgɔ ye, tinyɛ t'i fɛ k'i tɔnyɔgɔn jalaki, bari e b'i tɔnyɔgɔn jalaki koo minw na, e yɛrɛ b'o nyɔgɔn kɛ. O la, e yɛrɛ le b'e yɛrɛ jalakila.

²Minw b'o nyɔgɔn kɛ, an y'a lɔn ko Ala b'o tigi kiti ka kɛnyɛ ni tinyɛ ye.

³E min b'o koow kɛbaga nunu jalaki, k'a sɔrɔ ele fana b'o koow nyɔgɔn kɛ, e bɛ miiri ko i bɛna kisi Ala ka kiti ma wa?

⁴Walima e tɛ Ala ka nyumanya dafanin n'a ka munyuli, an'a ka timinadiyali jati foyi ye wa? K'a sɔrɔ a b'i dɛmɛ a ka nyumanya barika la ka nimisa ka faran i ka kojugu la.

⁵E ka dusukungwɛlɛya n'i ka murutili kɔsɔn, e bɛ dimi fara dimi kan Ala fɛ, k'a ka dimi bɔlon n'a ka kiti tilennin loon makɔnɔ.

⁶Ale le “bɛna mɔgɔ kelen kelen bɛɛ sara ka kɛnyɛ n'u ka kɛta ye.”

⁷Mɔgɔ minw jijanin lo ka baaranyuman kɛ n'u bɛ bonya, ni kunkɔrɔta ani hɛrɛ banbali le nyinina, sini hɛrɛ ye olu ta ye.

⁸Nga minw bɛ sɔsɔli kɛ ka muruti tinyɛ ma ka to kojugu la, olu ta ye dusubɔ ni dimi ye.

⁹Mɔgɔ minw bɛ kojugu kɛ, k'a ta Zuwifu ma fɔlɔ, o kɔ siya tɔw, tɔɔrɔ ni dusukasi bɛna kɛ olu bɛɛ ta ye.

¹⁰Minw bɛ konyuman kɛ, k'a ta Zuwifu ma fɔlɔ, o kɔ siya tɔw, olu bɛɛ bɛna bonya ni kunkɔrɔta ani hɛrɛ sɔrɔ.

¹¹Bari Ala tɛ mɔgɔ bɔ mɔgɔ la.

¹²Mɔgɔ o mɔgɔ ye kojugu kɛ ni u tɛ Musa ka sariya lɔn, olu bɛna halaki ni sariya niin t'o la, a bɛ minw fɛ, n'u ye kojugu kɛ, olu fana bɛna kiti ka kɛnyɛ ni sariya ye.

¹³A ma kɛ ko mɔgɔ minw bɛ sariya kuma lamɛn, k'olu le ye mɔgɔtilenninw ye Ala fɛ, mɔgɔ minw b'a sira taama, olu le bɛna jati mɔgɔtilenninw ye Ala fɛ.

¹⁴Ala tun ye sariya min di Musa ma, ale tɛ siya wɛrɛ minw fɛ, olu bɛ sariya sira taama, u ka cogo la, k'a sɔrɔ u ma Ala ka sariya lɔn.

¹⁵O b'a yira ko u ka kan ka min kɛ, u b'o lɔn. N'u bɛ to k'u yɛrɛ jalaki, ani ka tinyɛ di u yɛrɛ ma, u b'a yira ten ko sariya koo b'u hakili la.

¹⁶Ka kɛnyɛ ni ne ka kibaru diman ye, o le bɛna ye loon min na Ala bɛna mɔgɔw kiti u ka koo dogoninw kama, Yezu Krista barika la.

¹⁷E min b'i yɛrɛ wele ko Zuwifu, k'i jigi la sariya kan, ani ka to k'i yɛrɛ bonya i ka Ala koo la,

¹⁸e min bɛ Ala sago lɔn, ani e min bɛ konyuman lɔn sariya barika la,

¹⁹e min y'a fɔ ko e ye finyɛntɔw bere minɛbaga ye, ko mɔgɔ minw bɛ dibi la, e bɛ olu dɛmɛ k'u nyaa yɛlɛ,

²⁰ko i ye nalomanw ni kolɔnbaliw ka karamɔgɔ ye, bari lɔnniyasɛbɛ ni tinyɛ yɛrɛyɛrɛ bɛ sɔrɔ sariya barika la.

²¹Ayiwa, e min bɛ mɔgɔ wɛrɛw kalan, e t'i yɛrɛ kalan! E b'a fɔ k'u kana sonyali kɛ, e do b'a kɛra.

²²E min b'a fɔ k'u kana kakalaya kɛ, e yɛrɛ b'o kɛ! I ko joko man d'i ye fewu, e do bɛ josɔnfɛn sonya.

²³E min b'i yɛrɛ bonya sariya kɔsɔn, e bɛ Ala tɔgɔ cɛn i ka sariya labatobaliya sababu la.

²⁴I n'a fɔ a fɔra Ala ka kuma na cogo min na ko: “Ala tɔgɔ cɛnna aw sababu la siya wɛrɛw cɛma.”

²⁵Kɛnɛkɛnɛko ka nyi n'i bɛ sariya labato, nga n'i tɛ sariya labato, i ka kɛnɛkɛnɛko tɛ jati tugu, i bɛ jati kɛnɛkɛnɛbali ye.

²⁶Ni kɛnɛkɛnɛbali bɛ sariya sira taama, a tɛna jati i n'a fɔ mɔgɔkɛnɛkɛnɛnin ye wa?

²⁷Kɛnɛkɛnɛbali min bɛ sariya labato, ale bɛna i jalaki, e min bɛ sariya cɛn. K'a sɔrɔ a sɛbɛ b'i bolo, i kɛnɛkɛnɛnin lo fana.

²⁸Ka kɛ Zuwifu ye, o tɛ siyako dama ye, kɛnɛkɛnɛko fana ma kɛ farisogo yɔrɔ dɔ tigɛko dama ye.

²⁹Nga Zuwifuya yɛrɛ yɛrɛ ye kɔnɔnako ye, kɛnɛkɛnɛkonyuman ye dusulako ye Nii Senuman barika la, o ma kɛ sariyako dama ye. O Zuwifu nyɔgɔn ka bonyako tɛ bɔ mɔgɔ fɛ, nga Ala fɛ.