Read LAYIDUKURA ƆRƆMUKAW 3 Bible Online

ƆRƆMUKAW 3 - LAYIDUKURA bible

ƆRƆMUKAW 3

¹O tuma na, ka kɛ Zuwifu ye, o tɔnɔ bɛ min sa? Kɛnɛkɛnɛko tɔnɔ ye jumɛn ye?

²O tɔnɔ ka bon cogo bɛɛ la. Ala ka kuma kalifara Zuwifuw le ma.

³Ayiwa, ni u dɔw ma kɛ mɔgɔsɛbɛw ye, Ala ka tilenninya bɛ se ka tunu olu kɔsɔn wa?

⁴Ayi dɛ! Hali ni adamadenw bɛ galon tigɛ, Ala bɛ tinyɛ fɔ, i ko a fɔra cogo min na ko: “I ka kuma ka kɛ tinyɛ ye, mɔgɔ si kana se k'i jalaki.”

⁵Nga ni Ala ka tilenninya bɛ lɔn adamaden ka tilenbaliya barika la, an bɛna mun le fɔ sa? O kɔrɔ ko ni Ala dimina an kɔrɔ, o ye kojugu ye wa? N bɛ kumana adamadenw kumacogo le la.

⁶Ayi dɛ! N'a kɛra ten, Ala bɛn'a kɛ cogo di ka dinyɛ kiti?

⁷Ni ne ye galon tigɛ, o min barika la Ala ka tinyɛ bɛ lɔn kosɛbɛ ani bonya bɛ la a kan fana, mun na ne bɛ jalaki i n'a fɔ kojugukɛla?

⁸O la, dɔw b'a fɔ ko: “An ka kojugu kɛ waasa konyuman ka sɔrɔ o la.” Mɔgɔ dɔw bɛ ne tɔgɔ cɛn ko ne b'o le fɔ. O mɔgɔ nunu ka jalakiko ka nyi.

⁹Nga, mun lo sa? An Zuwifuw ka fisa ni tɔw ye wa? Fewu, bari an y'a fɔ ka ban ko Zuwifu ni siya wɛrɛw bɛɛ bɛ kojugu ka fanga kɔrɔ.

¹⁰I ko a fɔra Ala ka kuma na cogo min na ko: “Mɔgɔtilennin si tɛ yen, hali mɔgɔ kelen yɛrɛ.

¹¹O si tɛ koo lɔn, o si tɛ Ala nyini fana.

¹²Mɔgɔ bɛɛ filila ka kɛ mɔgɔjuguw ye, o si tɛ konyuman kɛ, hali mɔgɔ kelen yɛrɛ.

¹³U gɔnɔ kɛra i n'a fɔ kaburudayɛlɛnin, u bɛ mɔgɔw lafili n'u daa ye, u dalakuma bɛ i n'a fɔ saa ka baga.

¹⁴U daa ka finyɛ mɔgɔ dangali ni kumajugufɔ la.

¹⁵U ka teli mɔgɔfagako la.

¹⁶U bɛ tɛmɛ yɔrɔ o yɔrɔ, u bɛ cɛnni ani bɔnɛ le to o kɔ.

¹⁷U mako tɛ hɛrɛko la.

¹⁸U tɛ siran Ala nya fewu.”

¹⁹An y'a lɔn ko sariya bɛ fɛɛn minw bɛɛ fɔ, a b'o fɔ mɔgɔw ye minw b'a ka fanga kɔrɔ, janko mɔgɔ si kana se ka foyi fɔ, ani mɔgɔ bɛɛ ka jalaki Ala nyakɔrɔ.

²⁰O le y'a to mɔgɔ si tɛ se ka kɛ mɔgɔtilennin ye Ala nyakɔrɔ sariya labatoli barika la, bari an bɛ kojugu lɔn sariya le barika la.

²¹Nga sisan, Ala y'a yira ko Ala bɛna mɔgɔw jati mɔgɔtilenninw ye sababu min na, sariya seen t'o la. Sariya ni kiraw ye o le fɔ.

²²Mɔgɔ o mɔgɔ lara Yezu Krista la, Ala bɛ olu bɛɛ jati mɔgɔtilenninw ye, wolomani t'o la.

²³Bari mɔgɔ bɛɛ ye kojugu kɛ, u yɔrɔ ka jan Ala la.[1]

²⁴Nga Ala makarila u la ka k'u jati mɔgɔtilenninw ye Yezu Krista sababu la, ale min y'u kunmabɔ.

²⁵Mɔgɔ minw lar'a la ko a sara olu kɔsɔn, Ala y'a kɛ olu kunmabɔ saraka ye, waasa k'ale Ala yɛrɛ ka tilenninya yira, bari mɔgɔ minw tun ye kojugu kɛ fɔlɔfɔlɔ, a ma olu jalaki

²⁶a ka munyuli waati la. O la, mɔgɔ minw lara Yezu la, Ala y'a ka tilenninya yira ni olu ye sisan, k'u kɛ mɔgɔtilenninw ye, janko a ka tilenninya ka ye.

²⁷Adamaden ka yɛrɛbonyayɔrɔ bɛ yen tugu wa? Ayi, a tɛ yen. Mun le ye o kɛ sa? A ka kɛwalinyuman wa? Ayi, a ka lanaya kɔsɔn lo.

²⁸Bari an b'a miiri ko adamaden bɛ jati mɔgɔtilennin ye a jigi le barika la. Kɛwalinyuman seen t'o la.

²⁹Walima Ala ye Zuwifuw dama ka Ala ye wa? Siya wɛrɛw ka Ala tɛ fana wa? Ɔnhɔn, siya wɛrɛw ta lo fana kɛ.

³⁰Bari Ala kelenpe le bɛ yen ale min bɛna mɔgɔkɛnɛkɛnɛninw jati mɔgɔtilenninw ye u jigi barika la, ka kɛnɛkɛnɛbaliw jati mɔgɔtilenninw ye o jigi kelen barika la.

³¹A ma kɛ ko an b'a fɛ ka sariya sanga burun jigi kama dɛ. Ayi! An b'a fɛ sariya koo ka taa nya kosɛbɛ.