Read LAYIDUKURA ƆRƆMUKAW 5 Bible Online

ƆRƆMUKAW 5 - LAYIDUKURA bible

ƆRƆMUKAW 5

¹An jatira mɔgɔtilenninw ye jigi barika la, o cogo la, hɛrɛ sɔrɔla an ni Ala cɛ an Matigi Yezu Krista barika la.

²Ale Yezu barika la fana an ye niyɔrɔ sɔrɔ o nɛɛma nin na an ka jigi sababu la. An bɛ o min na, k'an yɛrɛ bonya Ala ka nɔɔrɔ koo la, bari an bɛna o nyɔgɔn sɔrɔ.

³O dama tɛ, an bɛ nisɔndiya an ka tɔɔrɔkow la, bari an lanin b'a la ko tɔɔrɔ kɔsɔn an bɛ munyu.

⁴Munyuli bɛ na ni sesɔrɔli ye, ni see sɔrɔla, jigi fana bɛ sɔrɔ.

⁵Jigi do tɛ taa ka mɔgɔ to bololakolon, bari Ala y'an kanu cogo min na, o b'an dusu la Nii Senuman barika la, a y'ale min d'an ma.

⁶Tinyɛ na, tuma min na barika tun tɛ an na, Krista sara mɔgɔjuguw kɔsɔn o waati latigɛnin na.

⁷A ka gwɛlɛ mɔgɔ dɔ ka sɔrɔ min bɛ sɔn ka sa mɔgɔtilennin kɔsɔn, nga n'a sɔrɔ dɔ bɛ sɔn ka sa mɔgɔnyuman dɔ kɔsɔn.

⁸Nga Ala y'a yira an na ko a b'an kanu, o le y'a to k'an to an ka kojugu la, Krista sara an kɔsɔn.

⁹An jatira mɔgɔtilenninw ye Krista ka saya barika la minkɛ, siga t'a la, an bɛna kisi Ala ka dimi ma fana ale kelen barika la.

¹⁰Bari an tun ye Ala juguw ye tuma min na, Ala sɔnna anw ka bɛn n'ale ye a Dencɛ ka saya barika la. An bɛnnin kɔ n'a ye, siga t'a la, an bɛna kisi a Deen barika la bari a bɛ nii na.

¹¹O dama tɛ, an bɛ nisɔndiya Ala koo la an Matigi Yezu Krista barika la, ale min sababu la, anw ni Ala cɛ bɛnna.

¹²Kojugu kɛko daminɛna mɔgɔ kelen le sababu la dinyɛ na, saya fana nana kojugu sababu la. O cogo la fana, saya sera mɔgɔ bɛɛ ma bari bɛɛ ye kojugu kɛ.

¹³K'a ta o waati la ka na se sariya sɔrɔwaati ma, kojuguko tun bɛ yen, nga kojugukɛla ma jalaki i n'a fɔ sariya sigira tuma min na.

¹⁴O bɛɛ n'a ta, k'a ta Adama ka waati ma fɔɔ ka na se Musa ka tile ma, mɔgɔw tun bɛ sa, hali min ma kojugu kɛ Adama ka kojugu kɛcogo la, ale min banna ka Ala ka kuma labato. Mɔgɔ min tun ka kan ka na, Adama tun ye o tigi jaa ye.

¹⁵Nga kojugu min kɛra, o ni Ala ka makari tɛ se ka suma, bari, ni mɔgɔ kelen ka kojugu kɛnin kɔsɔn mɔgɔ caaman sara, Ala ka nɛɛma ta tɛ se ka fɔ a y'o min kɛ mɔgɔ caaman ye mɔgɔ kelen barika la, o min ye Yezu Krista ye.

¹⁶Ala ka makari ni mɔgɔ kelen nin ka kojugu ka baara tɛ kelen ye, bari mɔgɔ kelen ka kojugu kɔsɔn, Ala ye kiti tigɛ ka jalaki ben mɔgɔw kan, nga kojugu caaman kɛnin kɔ, Ala makarila u la ka cogo di u ma u ka se ka jati mɔgɔtilenninw ye.

¹⁷Ni mɔgɔ kelen ka kojugu kɔsɔn, saya donna dinyɛ na, mɔgɔ minw sɔnna Ala ka nɛɛma ma n'a makarila u la k'u jati mɔgɔtilenninw ye, olu bɛna to hɛrɛ la ka kuntigiya kɛ Yezu Krista kelenpe barika la.

¹⁸Ayiwa, mɔgɔ kelen ka kojugu kɔsɔn jalaki sera mɔgɔ bɛɛ ma. O cogo la fana, mɔgɔ kelen ka konyuman sababu la mɔgɔ caaman bɛ jati mɔgɔtilenninw ye ka hɛrɛ sɔrɔ.

¹⁹Mɔgɔ caaman kɛra kojugukɛlaw ye, mɔgɔ kelen ka murutili kɔsɔn, o cogo la fana mɔgɔ kelen ka konyuman kɛli kɔsɔn, mɔgɔ caaman bɛna jati mɔgɔtilenninw ye.

²⁰Sariya sigira janko kojugu ka barika sɔrɔ, nga kojugu barika bonyana yɔrɔ min na, Ala y'a ka makari bonya o yɔrɔ la.

²¹Kojugu tun ye fanga sɔrɔ mɔgɔw kan saya barika la cogo min na, o cogo la fana, Ala ka tilenninya barika la, a ka makari bɛ fanga sɔrɔ ka hɛrɛ banbali di mɔgɔw ma an Matigi Yezu Krista barika la.