Read LAYIDUKURA ƆRƆMUKAW 8 Bible Online

ƆRƆMUKAW 8 - LAYIDUKURA bible

ƆRƆMUKAW 8

¹Sisan kɔni, mɔgɔ minw sɔnna Yezu Krista ma, jalakiyɔrɔ si tɛ olu la.

²Bari Nii Senuman min bɛ hɛrɛ di Yezu Krista ka jɛnnyɔgɔnya barika la, ale ka see kɛra sababu ye ka ne hɔrɔnya ka bɔ kojugu ni halakili la.

³Sariya siginin tun tɛ se ka koo min kɛ, farisogo ka barikatanya kɔsɔn, Ala y'o kɛ, a y'a yɛrɛ Dencɛ ci, ale nana wolo i n'a fɔ kojugukɛla, ka kɛ saraka ye kojugu sara kɔsɔn. A ye kojugu ka baga faga ten,

⁴janko sariya bɛ tilenninya min fɛ, an ka se k'ale kɛ, an minw tɛ taama ka kɛnyɛ ni farisogo sago ye tugu, nga an bɛ taama ka kɛnyɛ ni Nii Senuman sago ye.

⁵Bari mɔgɔ min bɛ taama ka kɛnyɛ ni farisogo sago ye, o tigi ka miiriya bɛ to farisogo koo le kan, nga min bɛ taama ka kɛnyɛ ni Nii Senuman sago ye, o tigi ka miiriya bɛ to Ala ka koo le kan.

⁶Farisogo koo, o laban ye halakili ye, nga Nii Senuman ta ye lafiya ni hɛrɛ ye.

⁷Koo minw ka di farisogo ye, o tɛ bɛn Ala ma, farisogo fana tɛ sɔn Ala ka sariya ma, o fana tɛ se ka kɛ.

⁸Bari ka mɔgɔ to a yɛrɛ sago kɛ la, a koo tɛ se ka diya Ala ye.

⁹Aw kɔni, aw tɛ taama ka kɛnyɛ ni farisogo sago ye, aw bɛ taama ka kɛnyɛ ni Nii Senuman le sago ye, bari Ala Nii bɛ aw fɛ. Ni Krista ka Nii tɛ mɔgɔ min fɛ, o tigi tɛ Krista ta ye.

¹⁰Aw farisogo bilanin bɛ halakili kama kojugu sababu la, nga ni Krista b'aw dusu la, Nii Senuman bɛ hɛrɛ kɛ aw ye bari Ala y'aw jati mɔgɔtilenninw ye.

¹¹Ala min ye Yezu Krista kunun a sanin kɔ, n'ale ka Nii b'aw fɛ, ale kelen le bɛna nii don aw farisogo la, a ka Nii Senuman barika la ale min b'aw fɛ.

¹²O cogo la n balimaw, an ka kan ka fɛɛn min kɛ, o tɛ farisogo ka baara ye.

¹³Bari n'aw bɛ taama ka kɛnyɛ ni farisogo sago ye, aw bɛna halaki, nga n'aw y'aw jogo yɛlɛma pewu pewu Nii Senuman barika la, aw bɛna kisi.[5]

¹⁴Mɔgɔ minw bɛ taama ka kɛnyɛ ni Ala ka Nii sago ye, olu ye Ala deenw ye.

¹⁵Aw ye Nii min sɔrɔ, ale t'aw bila jɔnya ni siranya la dɛ, nga Nii Senuman lo, ale le barika la aw kɛra Ala ka deenw ye, ani ale barika la an b'a fɔ Ala ye ko Baba.[6]

¹⁶O Nii Senuman nin b'a yira an na ko an kɛra Ala deenw ye.

¹⁷N'an kɛra Ala ka deenw ye, an bɛna niyɔrɔ fana sɔrɔ Ala fɛ, Ala y'a daa di a ka mɔgɔw ma fɛɛn minw koo la, an ni Krista bɛna olu sɔrɔ nyɔgɔn fɛ, bari n'an y'a ka tɔɔrɔ nyɔgɔn sɔrɔ, an fana bɛn'a ka bonya nyɔgɔn sɔrɔ.

¹⁸Ne ka miiri la, an bɛna bonya min sɔrɔ sini, o tɛ se ka suma ni bii ka tɔɔrɔ ye.

¹⁹Bari Ala bɛna bonya la a ka deenw kan loon min na, dinyɛ kɔrɔtɔnin bɛ ka o loon makɔnɔ.

²⁰Dinyɛ kɛra fu ye, o ma kɛ a yɛrɛ sago ye, nga a Danbaga sago lo, o bɛɛ n'a ta, jigi layɔrɔ bɛ yen

²¹bari Ala bɛn'a bɔ kojugu bolo, k'a niin don a ka deenw ka yɛrɛsɔrɔ n'u ka bonya na.

²²An y'a lɔn ko halibi dinyɛ bɛɛ bɛ ;nunana i n'a fɔ muso min bɛ jigira.

²³Dinyɛ dama tɛ, nga Ala kɔnna ka an minw sɔn ni Nii Senuman ye fɔlɔ, an fana kɔnɔ gwannin lo k'an ka kunmabɔli kɔnɔ ka kɛ Ala ka deenw ye.

²⁴Bari an kisira, nga o ye jigiko ye. N'an nyaa lara fɛɛn kan ka sɔrɔ k'an jigi la o kan, a tɛ fɔ o ma ko jigi nyanaman. E nyaa bɛ fɛɛn na ka ban, e bɛn'a fɔ k'o ye jigiko ye cogo di?

²⁵Nga an nyaa ma la fɛɛn min kan fɔlɔ, n'an y'an jigi la o kan, an bɛna jija k'o fɛɛn nin makɔnɔ.

²⁶O cogo la fana, Nii Senuman b'an dɛmɛ an ka dɛsɛyɔrɔw la, bari an tɛ dalili cogo lɔn, nga Nii Senuman yɛrɛ le bɛ dalili kɛ an nɔɔ na ni ;nunakan ye min tɛ se ka fɔ.

²⁷Ala min bɛ adamaden dusulako lɔn, ale b'a lɔn Nii Senuman bɛ fɛɛn min fɛ, bari Nii Senuman bɛ dalili kɛ Ala ka mɔgɔw ye k'o kɛnyɛ ni Ala sago ye.

²⁸An y'a lɔn ko Ala bɛ baara kɛ ni fɛɛn bɛɛ ye a kanubagaw ka makonya le kama, a y'o minw wele ka kɛnyɛ n'a ka koo latigɛnin ye.

²⁹Ala kɔnna ka mɔgɔ minw woloma kabini fɔlɔfɔlɔ, a kɔnna k'a latigɛ fana k'olu cogo ka kɛ i n'a fɔ a Dencɛ ta, janko a Dencɛ nin ka kɛ mɔgɔ caaman kɔrɔ ye.

³⁰A kɔnna ka minw ka koo latigɛ, a ye olu wele fana, a ye minw wele fana, a ye olu jati mɔgɔtilenninw ye, a ye minw jati mɔgɔtilenninw ye, a ye bonya la olu kan.

³¹An bɛ mun fɔ tugu? Ni Ala b'an fɛ, jon bɛ wili an kama tugu?

³²Ale min ma ban k'a yɛrɛ Dencɛ di ka sa an bɛɛ kɔsɔn, a bɛ kɛ cogo di n'a tɛna fɛɛn bɛɛ di an ma ka fara a Dencɛ nin kan?

³³Ala ye mɔgɔ minw woloma, jon le bɛna se ka olu jalaki? Ala yɛrɛ le y'u jati mɔgɔtilenninw ye.

³⁴Jon le bɛna u jalaki? Bari Yezu Krista sara, o dama tɛ fana, a kununna, a siginin bɛ Ala kinibolo fɛ, ka to ka Ala dali an ye.

³⁵Mun le bɛ se k'an faran ka bɔ Krista la ale min y'an kanu? Sɛgɛnko wa? Walima hakilinyagamiko, walima tɔɔrɔ, walima kɔngɔ, walima dɛsɛko, walima kojugu, walima n'o b'an faga wa?

³⁶Ka kɛnyɛ ni Ala ka kuma ye, a ko: “E Ala kɔsɔn, u b'an faga tile kuturu bɛɛ kɔnɔ, u y'an jati i n'a fɔ saga fagataw.”

³⁷Nga o bɛɛ n'a ta an kɛra sesɔrɔlaw ye kosɛbɛ, Ala barika la, ale min y'an kanu.

³⁸Bari ne jigi b'a la ko hali saya yɛrɛ, walima sijan, walima mɛlɛkɛw, walima jinaw, walima fɛɛn minw bɛ dinyɛ na bii, walima minw bɛna kɛ yen sini, walima setigiw,

³⁹hali fangatigi minw bɛ sanfɛ, walima minw bɛ dugukolo jukɔrɔ, walima danfɛn wɛrɛw, fɛɛn si tɛ yen min bɛ se k'an faran ka bɔ Ala la ale min b'an kanu an Matigi Yezu Krista barika la.