Read LAYIDUKURA KORƐNTIKAW FƆLƆ 13 Bible Online

KORƐNTIKAW FƆLƆ 13 - LAYIDUKURA bible

KORƐNTIKAW FƆLƆ 13

¹Hali ni ne bɛ se ka kaan wɛrɛw fɔ, minw kɛra adamadenw ta ye ani mɛlɛkɛw ta, ni kanuya tɛ ne dusu la, ne kɛra i n'a fɔ dundun mankan, ani gongokolon mankan.

²Hali ni ne ye kiraya kɛ see sɔrɔ, ka kodogoninw, ni fɛɛn bɛɛ lɔnniya sɔrɔ, hali ni ne lara Ala la kosɛbɛ, fɔɔ ka se ka kuluw wili k'o bɔ u lɔyɔrɔ la, ni kanuya tɛ ne dusu la, o bɛɛ ye gwansan ye.

³Hali ni ne ye n bololafɛnw bɛɛ di k'o kɛ faantanw ka dumuni ye, hali ni ne sɔnna u ka ne jɛni yɛrɛ, ni kanuya tɛ ne dusu la, o tɛna foyi nya ne ye.

⁴Kanuya bɛ mɔgɔ min dusu la, o tigi bɛ munyuli kɛ, a bɛ konyuman kɛ, keliya t'a dusu la. A t'a yɛrɛ yira, a t'a yɛrɛ bonya fana.

⁵A tɛ malobaliyako kɛ, a t'a yɛrɛ dama nafa nyini, a dusu tɛ bɔ, a tɛ dimi mara.

⁶A tɛ nisɔndiya tilenbaliyako la, a bɛ nisɔndiya tinyɛko le la.

⁷A bɛ koo bɛɛ yafa, a bɛ la bɛɛ la, a bɛ la koo bɛɛ la, a bɛ koo bɛɛ munyu.

⁸Daan tɛ kanuya la. Kiraya bɛna ban, kaan wɛrɛ fɔ bɛna dabila, lɔnniya fana bɛna ban.

⁹Bari daan b'an ka lɔnniya la, daan b'an ka kiraya fana na.

¹⁰Nga ni fɛɛn dafanin mana na tuma min na, fɛɛn dafabali bɛna ban.

¹¹Ne tun ye denmisɛn ye tuma min na, n tun bɛ kuma i n'a fɔ denmisɛn, ka miiri i n'a fɔ denmisɛn, ka koo faamu i n'a fɔ denmisɛn. N nyana tigɛra tuma min na, n ye denmisɛnya dabila.

¹²Sisan an bɛ koo minw yera, a kɛra i n'a fɔ an b'u yera dubalen na le, u tɛ ye ka nya. Nga an bɛna u ye nyaa ni nyaa. Sisan, daan bɛ ne ka lɔnniya la, nga ne bɛna koo lɔn i n'a fɔ Ala bɛ ne lɔn cogo min na.

¹³Sisan fɛɛn saba nunu le bɛ yen: lanaya, jigi, ani kanuya, nga o fɛɛn saba nunu na, kanuya le bɛ nyafɛ.