Read LAYIDUKURA KORƐNTIKAW FƆLƆ 3 Bible Online

KORƐNTIKAW FƆLƆ 3 - LAYIDUKURA bible

KORƐNTIKAW FƆLƆ 3

¹N balimaw, ne tun ma se ka kuma aw fɛ i n'a fɔ mɔgɔ minw taara nya Krista koo la, nga n kumana aw fɛ i n'a fɔ mɔgɔ minw ma taa nya kosɛbɛ, ani i n'a fɔ denmisɛnw Krista koo la.

²O la, ne ma dumuni gwiliman d'aw ma, fɔɔ nɔnɔ, bari aw tun tɛ se ka dumuni gwiliman dumu fɔlɔ, halibi aw tɛ se fana.

³Ni keliya ni kɛlɛ b'aw cɛma, aw k'a lɔn ko halibi adamadenya b'aw la, aw ni mɔgɔ tɔw bɛɛ bɛ kɛ kelen ye.

⁴N'aw dɔ y'a fɔ ko ale ye Pɔli ka kalanden ye, ani dɔ fana ko ale ye Apolɔsi ta ye, o tɛ adamadenya ye wa?

⁵Apolɔsi ye jon ye, ani Pɔli ye jon ye? Baarakɛlaw dama lo, minw sababu la aw sɔnna Matigi ma. U kelen kelen bɛɛ y'u ka baara kɛ Matigi ye min d'u ma.

⁶Ne ye tutuli kɛ, Apolɔsi y'o sɔn jii la, Ala le kɛra sababu ye u bonyana.

⁷O cogo la, mɔgɔ min ye tutuli kɛ, ale tɛ foyi ye, ani min b'u sɔn ni jii ye, ale fana tɛ foyi ye. Ala kelenpe le bɛ kɛ sababu ye n'u bɛ bonya. Ale lo bɛ jati.

⁸Mɔgɔ min bɛ tutuli kɛ ni min bɛ u sɔn ni jii ye, olu bɛɛ ka kan. U kelen kelen bɛɛ bɛna u ka sara sɔrɔ ka kɛnyɛ n'u ka baara ye,

⁹bari anw kɛra baarakɛnyɔgɔnw ye Ala ka baara la, aw ye Ala ka foro, n'a ka soo ye a bɛ min lɔra.

¹⁰Ala ka nɛɛma barika la a y'o min kɛ ne ye, ne kɛra solɔlanyuman ye, ne ye soo juu sigi, mɔgɔ dɔ wɛrɛ bɛ lɔli kɛ o kan, nga mɔgɔ kelen kelen bɛɛ ka kan k'a ka lɔcogo kɔlɔsi,

¹¹bari mɔgɔ si tɛ se ka soo juu wɛrɛ sigi min bɛ danna fɔlɔta la o min ye Yezu Krista ye.

¹²Ni mɔgɔ dɔ mana lɔli kɛ o juu nin kan ni sanu, walima warigwɛ, walima ni kabakuru sɔngɔgwɛlɛn ye, walima ni lɔgɔ ye, walima ni biin ye, walima ni kalaw ye,

¹³mɔgɔ kelen kelen bɛɛ ka baara cogoya bɛna lɔn laban loon na. Tasuma bɛna u bɛɛ cogoya yira, bari mɔgɔ kelen kelen bɛɛ ka baara bɛna sɛgɛsɛgɛ ni tasuma ye.

¹⁴Ni mɔgɔ min ta ma jɛni, o tigi bɛn'a sara sɔrɔ.

¹⁵Ni mɔgɔ min ta jɛnina, o tigi tɛn'a sara sɔrɔ, a kɔni bɛna kisi, i n'a fɔ mɔgɔ min bolila ka bɔ tasuma na.

¹⁶Aw m'a lɔn ko aw kɛra Ala sigiyɔrɔ ye wa, ani ko Ala ka Nii siginin bɛ aw kɔnɔ?

¹⁷Ni mɔgɔ dɔ ye Ala ka sigiyɔrɔ cɛn, Ala fana bɛna o tigi halaki, bari Ala ka sigiyɔrɔ saniyanin lo, o sigiyɔrɔ nin ye aw ye.

¹⁸Mɔgɔ si kan'a yɛrɛ nigɛ. Ni mɔgɔ dɔ b'aw cɛma min b'a yɛrɛ jati hakilitigi ye dinyɛ na, o tigi ka sɔn fatɔya ma fɔlɔ ka sɔrɔ ka kɛ hakilitigi ye,

¹⁹bari dinyɛ nin hakilitigiya, o ye fatɔya ye Ala nyakɔrɔ. A fɔra Ala ka kuma na ko: “A bɛ hakilitigiw minɛ u ka cekuya la.”

²⁰A fɔra tugu ko: “Matigi bɛ hakilitigiw ka miiriya lɔn, k'o kɛra gwansan ye.”

²¹O cogo la, mɔgɔ si kan'a yɛrɛ bonya adamadenw koo la, bari koo bɛɛ y'aw ta ye.

²²Pɔli wo, Apolɔsi wo, ni Sefasi[2] wo, walima dinyɛko wo, walima ka to nii na, walima ka sa, walima fɛɛn minw bɛ dinyɛ na yan bii wo, walima fɛɛn min bɛ na sini wo, olu bɛɛ y'aw ta ye.

²³Nga aw ye Krista ta ye ani Krista fana ye Ala ta ye.