Read LAYIDUKURA KORƐNTIKAW FƆLƆ 6 Bible Online

KORƐNTIKAW FƆLƆ 6 - LAYIDUKURA bible

KORƐNTIKAW FƆLƆ 6

¹Ni koo donna dɔ n'a balima cɛ, mun na aw tɛ taa n'o koo ye Ala ka jama fɛ fɔɔ faamaw fɛ minw tɛ siran Ala nya?

²Aw m'a lɔn ko Ala ka jama le bɛna dinyɛ mɔgɔw kiti wa? Ni aw bɛna dinyɛ mɔgɔw kiti, aw bɛ se ka dɛsɛ ka kofitiniw nyanabɔ wa?

³Aw m'a lɔn ko an bɛna mɛlɛkɛw kiti wa? Sankofɛrɛ dinyɛ koo!

⁴O la, n'o koo nyɔgɔn b'aw fɛ min ka kan ka nyanabɔ, Ala ka jama tɛ mɔgɔ minw jati, aw bɛ taa o tigiw fɛ ka koo nin nyanabɔ.

⁵Aw yɛrɛ tɛ malo, o tuma na, mɔgɔ si tɛ aw cɛma min bɛ koo lɔn ka se ka balima fila ka koo nyanabɔ wa?

⁶Fɔɔ balima fila ye nyɔgɔn wele faamaw fɛ, olu k'u ka koo nyanabɔ, olu minw tɛ Ala lɔn.

⁷N'aw ye nyɔgɔn wele kiti la ka ban, o ye aw ka dɛsɛyɔrɔ dɔ ye. Mun na aw tɛ sɔn ka tilenbaliyakow munyu, ani ka sɔn mɔgɔ ka ben aw kan?

⁸Nga aw le bɛ tilenbaliyakow, ni benkanni kɛ mɔgɔ tɔw la, o minw ye aw ka balimaw ye.

⁹Aw m'a lɔn ko mɔgɔ minw bɛ tilenbaliyakow kɛ, olu tɛna don arijana na wa? Aw kana aw yɛrɛ nigɛ. Nyamɔgɔyakɛlaw, walima josɔnlaw, walima kakalaw, walima kakalaya sifa bɛɛ kɛbagaw,

¹⁰walima soonw, walima sɔnjuguw, walima dɔrɔtɔw, walima mɔgɔ tɔgɔcɛnlaw, walima benkannikɛlaw, olu si tɛna arijana sɔrɔ.

¹¹Aw dɔw tun bɛ ten fana, nga aw saniyara ka kɛ Ala taw ye, ani ka kɛ mɔgɔtilenninw ye, an Matigi Yezu Krista tɔgɔ la ani an ka Ala ka Nii Senuman barika la.

¹²Dɔw ko mɔgɔ bɛ se ka koo bɛɛ kɛ. Nga koo bɛɛ tɛ mɔgɔ mako nya. Tinyɛ lo, ne bɛ se ka koo bɛɛ kɛ. Nga ne t'a fɛ ka kɛ fɛɛn si ka jɔɔn ye.

¹³U fana ko dumunifɛn dilanna kɔnɔbara kama, kɔnɔbara fana bɛ yen dumuni kama. Nga Ala do bɛna u fila bɛɛ halaki. Mɔgɔ farisogo ma kɛ kakalaya kama, o ye Matigi ta ye ani Matigi bɛ janto a la.

¹⁴Ala min ye Matigi kunun k'a bɔ kaburu la, ale fana le bɛna anw kunun a ka sebagaya barika la.

¹⁵Aw m'a lɔn ko aw farisogo ye Krista fari yɔrɔ dɔ ye wa? N bɛ sɔn ka Krista fari yɔrɔ dɔ ta k'o kɛ kakalayakɛfɛn ye wa? Ayi, o tɛ se ka kɛ.

¹⁶Aw m'a lɔn fana ko ni mɔgɔ dɔ bɛ jɛn ni kakala ye, u fila bɛ kɛ kelen ye wa? Bari a fɔra Ala ka kuma na ko: “U fila bɛɛ bɛ kɛ farisogo kelen ye.”

¹⁷Nga mɔgɔ min sɔnna Matigi ma, o tigi ni Matigi bɛ jɛn ka kɛ kelen ye miiriya la.

¹⁸Aw ka kakalaya dabila, mɔgɔ bɛ kojugu minw bɛɛ kɛ, o si tɛ se a farisogo ma fɔɔ. Nga min bɛ kakalaya kɛ, o tigi b'a yɛrɛ hakɛ le ta.

¹⁹Aw m'a lɔn ko aw farisogo ye Nii Senuman sigiyɔrɔ ye wa? O min bɛ aw fɛ ni Ala y'o d'aw ma. Aw m'a lɔn ko aw tɛ aw yɛrɛ ta ye tugu wa?

²⁰Ala le y'aw kunmabɔ, o la, aw ka bonya la Ala tɔgɔ kan sisan n'aw farisogo ye.