Read LAYIDUKURA KORƐNTIKAW FƆLƆ 7 Bible Online

KORƐNTIKAW FƆLƆ 7 - LAYIDUKURA bible

KORƐNTIKAW FƆLƆ 7

¹Aw ye nyiningali min kɛ aw ka bataki kɔnɔ, an k'o filɛ sisan. O la, min ka fisa cɛɛ ma, a kana muso furu.

²Nga, kakalaya kɔsɔn, a ka nyi cɛɛ kelen kelen bɛɛ ka muso furu, muso kelen kelen bɛɛ ka sigi cɛɛ fɛ.

³Cɛɛ ka kan k'a ka kɛtaw kɛ a ka muso faan fɛ, ani muso fana k'a ka kɛtaw kɛ a ka cɛɛ faan fɛ.

⁴Muso t'a yɛrɛ farisogo kunna fɔɔ a cɛɛ. O cogo la fana, cɛɛ t'a yɛrɛ farisogo kunna fɔɔ a muso.

⁵Aw kana ban nyɔgɔn ma, fɔɔ n'aw fila bɛɛ bɛnn'a la ko aw bɛna waati dɔɔni kɛ ka Ala dali. O kɔ, aw ka segi nyɔgɔn ma tugu, waasa aw ka se k'aw yɛrɛ minɛ Sutana ka nigɛli tuma na.

⁶Ne ye kuma min fɔ aw ye, o ma kɛ sariya ye n ye min sigi aw ye, nga sira lo, n ye min yira aw la.

⁷A ka di ne ye ni mɔgɔ bɛɛ tun bɛ se ka kɛ i n'a fɔ ne. Nga Ala ye seko min di bɛɛ ma, o ma kɛ kelen ye. Dɔ ta ye nin ye, dɔ wɛrɛ ta ye fɛɛn wɛrɛ ye fana.

⁸Minw ma furu fɔlɔ ni firiyamusow, ne bɛ min fɔ u ye, a ka fisa u ka to ten n'u ma furu i n'a fɔ ne.

⁹Nga ni min y'a lɔn ko a tɛ se k'a yɛrɛ minɛ, o tigi ka furu kɛ. O ka fisa a ma a 'bɛ tɔɔrɔ o nigɛ fɛ.

¹⁰Minw furunin bɛ, ne b'a nyini olu fɛ, nga ne tɛ dɛ, Matigi le ko ten, ko muso kana bɔ a cɛɛ fɛ.

¹¹Nga ni muso min banna a cɛɛ la, a kana furu cɛɛ wɛrɛ fɛ tugu, walima a ka kɔsegi ka taa bɛn n'a cɛɛ ye. Cɛɛ fana kan'a muso bila.

¹²Ne bɛ min fɔ tɔw ye, o ye ne yɛrɛ ka kuma ye, Matigi ta tɛ. N'aw balima dɔ ka muso ma la Krista la, n'o muso nin y'a latigɛ ko a bɛ to a fɛ, a kan'a bila.

¹³N'aw balimamuso dɔ cɛɛ ma la Krista la, n'o cɛɛ nin y'a latigɛ k'u bɛna to nyɔgɔn fɛ ten, muso nin kana bɔ a fɛ.

¹⁴Bari cɛɛ min ma la Krista la, ale saniyanin bɛ a muso barika la, muso min ma la Krista la, ale fana saniyanin bɛ a cɛɛ barika la. N'o tɛ, u ka deenw tɛna kɛ densaniyaninw ye, k'a sɔrɔ u ye deen senumanw ye.

¹⁵Mɔgɔ min kɛra Krista ta ye, n'o tigi ka muso, walima a cɛɛ min ma la Krista la b'a fɛ ka faran a la, o tɛ baasi ye, bari Ala y'aw wele ka to hɛrɛ la.

¹⁶E min ye muso ye, i t'a lɔn n'i bɛna kɛ sababu ye i cɛɛ ka kisi. Cɛɛ, e fana t'a lɔn n'i bɛna kɛ sababu ye i muso ka kisi.

¹⁷Matigi ye see min di mɔgɔ kelen kelen bɛɛ ma, bɛɛ ka kan ka taama ka kɛnyɛ n'o le ye. Sanni Ala k'i wele, i tun bɛ cogo min na, i ka to ten. Ne b'o le nyinina Ala ka jama bɛɛ fɛ.

¹⁸Ala ye mɔgɔ dɔ wele n'a kɛnɛkɛnɛnin lo wa? A ka to ten. A ye dɔ wele n'a ma kɛnɛkɛnɛ wa? O tigi kan'a yɛrɛ kɛnɛkɛnɛ tugu.

¹⁹Kɛnɛkɛnɛko t'a kuun ye, kɛnɛkɛnɛbaliya fana ma kɛ a kuun ye. A kuun ye nin ye: i ka Ala ka sariyaw labato.

²⁰Mɔgɔ kelen kelen bɛɛ, sanni Ala k'a wele, a tun bɛ cogo min, a ka to ten.

²¹A y'i wele k'i to jɔnya la wa? I hakili kana nyagami, nga n'i bɛ se ka hɔrɔnya, i ka banba.

²²Bari Ala ye mɔgɔ min wele k'o tigi to jɔnya la, ale kɛra hɔrɔn ye Matigi fɛ. O cogo la, a ye mɔgɔ min wele n'o tigi tun ye hɔrɔn ye, ale bɛ kɛ jɔɔn ye Krista fɛ.

²³Ala le y'aw kunmabɔ sɔngɔ dɔ la, aw kana tila ka kɛ adamadenw ka jɔɔnw ye tugu.

²⁴N balimaw, min ka fisa, mɔgɔ kelen kelen bɛɛ tun bɛ cogo min na sanni Ala k'a wele, u ka to o cogo kelen na Ala nyakɔrɔ.

²⁵Sisan, minw ma furu kɛ fɔlɔ, n kaan bɛ olu le ma. Matigi ka kuma tɛ, nga ne yɛrɛ ka miiriya lo, n bɛ min d'u ma. Matigi ka makari barika la, mɔgɔ bɛ se k'a jigi la a kan.

²⁶Ka kɛnyɛ ni waati ka gwɛlɛya ye, ne bɛ miiri ko ni mɔgɔ tora ten, o ka fisa.

²⁷Muso b'i fɛ wa? I kana ban a la. I ma muso furu fɔlɔ wa? I kana dɔ nyini.

²⁸Nga n'i ye muso furu, o tɛ kojugu ye. Ni sunguru furula fana, ale ma kojugu kɛ. Nga mɔgɔ minw ye furu kɛ ka ban, olu bɛna tɔɔrɔba sɔrɔ. Ne b'a fɛ k'aw dɛmɛ ka kisi o ma.

²⁹Ayiwa n balimaw, n b'a fɔ aw ye ko waati caaman t'an bolo. Kabini sisan, cɛɛ minw furunin bɛ, olu ka kɛ i n'a fɔ musow t'u fɛ.

³⁰Mɔgɔ minw bɛ kasira, olu ka kɛ i n'a fɔ u tɛ kasira. Minw bɛ nisɔndiyara, olu ka kɛ i n'a fɔ u tɛ nisɔndiyara. Minw bɛ sanni kɛra, olu ka kɛ i n'a fɔ u tɛ foyi le sɔrɔla.

³¹Mɔgɔ minw bɛ dinyɛ nin tɔnɔ dumuna, olu ka kɛ i n'a fɔ u tɛ foyi sɔrɔla, bari dinyɛ bɛ cogo min na, a tɛ mɛn tugu a bɛna ban.

³²Ne b'a fɛ aw kana aw hakili nyagami. Mɔgɔ min ma furu kɛ, ale ka hami ye ka Matigi ka baara kɛ, a b'a fɛ ka Matigi sago kɛ.

³³Nga min ye muso furu, ale ka hamiko ye dinyɛ ta ye, a bɛ cogoya nyini k'a ka muso ladiya.

³⁴O cogo la, a ka miiriya bɛ tilan ka kɛ fila ye. Cɛɛ tɛ min fɛ ani sunguru, olu ka hami ye ka Matigi ka baara kɛ, waasa u ka se k'u yɛrɛ di Matigi ma koo bɛɛ la. Nga muso min furula, ale ka hamiko ye dinyɛko ye. A bɛ cogoya nyini k'a cɛɛ ladiya.

³⁵Ne bɛ nin koo fɔ aw ye, a ma kɛ ko ne b'a fɛ k'aw tɔɔrɔ, nga aw ka tɔnɔ kɔsɔn lo, n b'a fɛ aw ka kobɛnnin kɛ, ani aw ka se ka nɔrɔ Matigi la ni miiriya kelen ye.

³⁶Ni kanbelen dɔ y'a ye ko a tɛ se k'a yɛrɛ minɛ a ka maminɛmuso faan fɛ, a k'a furu ka kɛnyɛ n'a yɛrɛ ka miiriya ye, o tɛ kɛ kojugu ye.[5]

³⁷Nga ni kanbelen min y'a latigɛ a yɛrɛ dusu la, ni degunyɔrɔ t'a la fewu, n'a bɛ se a yɛrɛ kɔrɔ fana, k'a latigɛ a yɛrɛ kɔnɔ ko a tɛna se a ka maminɛmuso ma fewu, ale bɛ baaranyuman kɛ.

³⁸O cogo la, mɔgɔ min bɛ furu kɛ, o tigi ye konyuman kɛ. Min ma furu kɛ fana, o tigi ye konyuman kɛ kosɛbɛ.

³⁹Ka muso cɛɛ to sii la, muso nin sirinin b'a la. Nga ni cɛɛ nin sara, muso lafoninin bɛ. A bɛ se ka furu cɛɛ wɛrɛ ma nga fɔɔ ale ka kɛ mɔgɔ ye min lara Krista la.

⁴⁰O bɛɛ n'a ta, n'a tora ten, o tun ka fis'a ma kosɛbɛ. O ye ne ka miiriya ye. N bɛ miiri fana ko Ala ka Nii Senuman bɛ n fɛ.