Read LAYIDUKURA KORƐNTIKAW FƆLƆ 8 Bible Online

KORƐNTIKAW FƆLƆ 8 - LAYIDUKURA bible

KORƐNTIKAW FƆLƆ 8

¹Min ye josɔnsogo koo ye, an y'a lɔn ko an bɛɛ bɛ koo lɔn. Nga lɔnniya bɛ mɔgɔ don yɛrɛbonya na, kanuya b'an dɛmɛ ka taa nya.

²Ni mɔgɔ dɔ bɛ miiri ko ale ye koo lɔn, o tigi ma lɔnniya sɔrɔ i n'a fɔ a ka kan k'a sɔrɔ cogo min na.

³Ala koo ka di mɔgɔ min ye, Ala b'o tigi lɔn.

⁴Min ye josɔnsogow nyimiko ye, an y'a lɔn ko joo tɛ foyi ye dinyɛ na, an y'a lɔn fana ko Ala ye kelen ye.

⁵Hali n'u bɛ miiri ko dugukolo kan jinaw ni sankolo taw kɛra batofɛnw ye k'a kɛ i n'a fɔ batofɛn caaman ni matigi caaman bɛ yen tinyɛ na,

⁶an kɔni fɛ, Ala kelen le bɛ yen. Ale le y'an Faa ye, koo bɛɛ bɛ bɔ ale fɛ, an fana bɛ taa ale fɛ, ani Matigi kelenpe le bɛ yen, o ye Yezu Krista ye, ale min barika la fɛɛn bɛɛ bɛ yen, anw fana bɛ yen ale barika la.

⁷Nga bɛɛ t'o lɔn. Dɔw bɛ yen minw delila joko la kosɛbɛ, n'u b'o sogo nunu nyimi tuma min na, u b'o jati i n'a fɔ josɔnsogo lo. O cogo la, u ka barikatanya kɔsɔn, u bɛ miiri ko u ye kojugu kɛ.

⁸A ma kɛ ko dumunifɛn le b'an gwɛrɛ Ala la, hali n'an m'o dumu, foyi tɛ bɔ an na. N'an fana y'o dumu, foyi tɛ fara an kan.

⁹Nga aw k'aw yɛrɛ kɔlɔsi, aw ka yɛrɛsagokɛ kana barikatanw dɔ kunna cɛn.

¹⁰N'o bɛ ele ye, n'i bɛ dumuni kɛra jobon kɔnɔ, e min b'o koo faamuna, o koo miiri tɛn'a nyɔnti k'a don josɔnsogo nyimi na wa?

¹¹O cogo la, i balima min barika ka dɔgɔ, ale bɛna halaki ele ka lɔnniya barika la, Krista sara o min kɔsɔn.

¹²N'aw bɛ to k'aw balimaw hakɛ ta o cogo la ani k'o hakili cɛn ten, aw bɛ Krista fana le hakɛ ta.

¹³O la, ni dumuni dɔ bɛ kɛ sababu ye ne balima kunna bɛ cɛn, ne bɛ ban o sogo la pewu waasa n kan'a kunna cɛn.