Read LAYIDUKURA KORƐNTIKAW FƆLƆ 9 Bible Online

KORƐNTIKAW FƆLƆ 9 - LAYIDUKURA bible

KORƐNTIKAW FƆLƆ 9

¹Ne tɛ n yɛrɛ ta ye wa? Ne ma kɛ ciden ye wa? Ne ma Yezu an Matigi ye wa? Aw ma kɛ ne ka baara nɔɔ ye Matigi Yezu barika la wa?

²Hali ni mɔgɔ dɔw tɛ ne lɔn ko n ye ciden ye, aw ka kan ka ne lɔn bari aw kɛra ne ka cidenya baara nɔɔ ye Matigi barika la.

³O le ye ne ka kuma ye k'o fɔ n jalakibagaw ye.

⁴An man kan ka dumuni kɛ ani ka minni kɛ fana wa?

⁵An man kan ka balimamuso dɔ ta k'an bila sira an ka taamaw na wa, i n'a fɔ Matigi dɔgɔcɛw ni Sefasi[6] ani ciden tɔw?

⁶Walima ne ni Barinabasi dama ka kan ka baara kɛ janko k'an daladumuni sɔrɔ wa?

⁷Mɔgɔ jumɛn le bɛ yen n'a bɛ sɔlidasiya kɛ n'a tɛ sara sɔrɔ? Mɔgɔ jumɛn bɛ yiriforo bɔ n'o tigi t'a deenw nɛnɛ? Walima mɔgɔ jumɛn bɛ begɛnw mara n'o tigi t'o ka nɔnɔ sɔrɔ ka min?

⁸Aw kan'a miiri k'o ye adamaden miiriya dama ye, Ala ka sariya t'o koo kelen fɔ fana wa?

⁹Bari Ala ye sariya min di Musa ma, a fɔra o la ko: “I kana misi daa siri n'a bɛ sɛnɛ kɛra suman kɔnɔ.”[7] Ala bɛ hami misi koo la fana wa?

¹⁰Kuma min fɔra, o ma fɔ anw le kɔsɔn wa? Ɔnhɔn, o koow sɛbɛnna an le kɔsɔn, bari sɛnɛkɛla ka kan ka l'a la ko a bɛn'a niyɔrɔ sɔrɔ, ani sumangosibaga fana bɛ l'a la ko a bɛn'a niyɔrɔ sɔrɔ.

¹¹N'an ye Ala ka baara kɛ aw cɛma, n'anw b'o baara nin tɔnɔ sɔrɔla aw fɛ tuma min na, o ye kojugu ye wa?

¹²Ni mɔgɔ dɔw b'o tɔnɔ minɛna aw fɛ, anw do? Anw ka kan n'o ye ka tɛmɛ olu kan, nga anw m'o jati. Anw bɛ koo bɛɛ munyu, waasa sababu dɔ kana Krista ka kibaru diman fɔli bali.

¹³Aw b'a lɔn ko mɔgɔ minw bɛ baara kɛ Alabatosoba kɔnɔ, olu ka dumuni bɛ bɔ o yɔrɔ la le, ani minw ye sarakalasebagaw ye, olu niyɔrɔ bɛ bɔ sarakaw la.

¹⁴O cogo la fana, Matigi y'a fɔ ko mɔgɔ minw bɛ kibaru diman fɔ, olu ka balo kibaru diman barika la.

¹⁵Nga ne kɔni m'o tɔnɔ nin si sɔrɔ. A fana ma kɛ ko ne b'a fɛ k'o sɔrɔ aw fɛ, k'o le y'a to ne bɛ nin koo sɛbɛn aw ye dɛ. Yan ni ne b'o koo nyini, ne ka sa o ka fisa n ma,

¹⁶bari kibaru diman fɔko ma kɛ tɔgɔnyiniko ye ne fɛ, wajibiko lo ne ma. Bɔnɛ ye ne ta ye ni ne ma kibaru diman fɔ.

¹⁷Ni ne y'o baara kɛ ni dusudiya ye, ne bɛna o sara sɔrɔ, nga ni ne b'o kɛ ni jagoya ye, o ye karabako ye n ma.

¹⁸Ne ka tɔnɔ ye jumɛn ye sa? O ye nin ye: ne ka kibaru diman fɔ gwansan n kana miiri a tɔnɔ na.

¹⁹Ne ma kɛ jɔɔn ye mɔgɔ si fɛ, nga ne ye n yɛrɛ kɛ jɔɔn ye mɔgɔ bɛɛ faan fɛ, waasa ne ka se ka mɔgɔ caaman sɔrɔ u ka sɔn kibaru diman ma.

²⁰Ka ne to Zuwifuw cɛma, ne tun kɛra i n'a fɔ olu, waasa ne ka se ka Zuwifuw sɔrɔ. Ni ne bɛ ni Ala ka sariya sirataamabagaw ye, n kɛra i n'a fɔ olu, waasa n ka se ka olu sɔrɔ fana k'a sɔrɔ n t'u dɔ ye.

²¹Ka ne to siya wɛrɛw cɛma, Ala ka sariya t'o minw fɛ, ne tun kɛra i n'a fɔ olu, waasa n ka se k'olu sɔrɔ. Nga a ma kɛ i n'a fɔ ne tɛ Ala ka sariya kɔrɔ! Krista le ye ne ka sariya ye.

²²Barika tɛ mɔgɔ minw na, ka ne to olu cɛma, ne tun bɛ n yɛrɛ kɛ barikatan ye, waasa ka olu sɔrɔ. Ne ye n yɛrɛ kɛ cogo bɛɛ la mɔgɔ bɛɛ kɔsɔn waasa ka se ka dɔw sɔrɔ cogo bɛɛ la.

²³Ne b'o bɛɛ kɛ kibaru diman kɔsɔn, waasa ne ka se ka n niyɔrɔ sɔrɔ.

²⁴Aw b'a lɔn ko mɔgɔ minw bɛ nyɔgɔndanboli kɛ farikolo tolonkɛyɔrɔ la, mɔgɔ bɛɛ bɛ boli, nga mɔgɔ kelen le bɛ sara nin sɔrɔ dɛ. Aw ka boli ten fana ka o sara nin sɔrɔ.

²⁵Farikolo tolonkɛlaw b'u yɛrɛ tanga fɛɛn caaman ma, waasa u ka se ka sara sɔrɔ min bɛna ban, nga an kɔni b'a kɛ sara kɔsɔn min tɛ ban ka ye.

²⁶O le y'a to ne fana b'o boli la, nga n tɛ boli n kunfɛ. N bɛ i n'a fɔ bolokuru tolonkɛla, n tɛ bugɔri kɛ fu.

²⁷Nga ne bɛ sɔn ka n yɛrɛ farikolo tɔɔrɔ ani ka n yɛrɛ minɛ waasa ni ne ye kibaru diman fɔ ka ban mɔgɔ wɛrɛw ye, o kɔ, Ala kana ban ne yɛrɛ la.