Read LAYIDUKURA KORƐNTIKAW FILANAN 1 Bible Online

KORƐNTIKAW FILANAN 1 - LAYIDUKURA bible

KORƐNTIKAW FILANAN 1

¹Ne Pɔli min ye Yezu Krista ka ciden ye Ala sago la, n'an balimacɛ Timote, an bɛ bataki nin ci Ala ka jama ma min bɛ Korɛnti dugu kɔnɔ, ani minw bɛɛ bɛ Akayi mara la.

²An Faa Ala n'an Matigi Yezu Krista ka nɛɛma ni hɛrɛ kɛ aw ye.

³Ne bɛ Ala tando, ale min ye an Matigi Yezu Krista Faa ye, makaritigi lo, ale le bɛ mɔgɔ bɛɛ jigi tugu.

⁴Ale le b'an jigi tugu an ka tɔɔrɔko bɛɛ la, waasa an fana ka se k'an tɔnyɔgɔnw jigi tugu an y'o min sɔrɔ Ala fɛ.

⁵An bɛ Krista ka tɔɔrɔ nyɔgɔn caaman sɔrɔ cogo min na, o cogo kelen na fana Krista b'an jigi tugu kosɛbɛ.

⁶Ni tɔɔrɔ b'an sɔrɔ, o bɛ kɛ waasa aw jigi ka tugu, ani ka se ka kisi. N'an jigi tugura, o bɛ kɛ waasa aw jigi ka tugu ka se ka tɔɔrɔ munyu an b'o tɔɔrɔ minw nyɔgɔn na.

⁷An jigi b'aw kan kosɛbɛ, bari an y'a lɔn ko n'an ye tɔɔrɔ sɔrɔ nyɔgɔn fɛ, an fana bɛna jigitugu sɔrɔ nyɔgɔn fɛ.

⁸Tɔɔrɔ min y'an sɔrɔ Azi mara la, an t'a fɛ k'aw to o lɔnbaliya la. O tun digira an na fɔɔ ka se an barika daan ma, fɔɔ an yɛrɛ tun t'a miiri ko an bɛna to yen n'an ma sa.

⁹Tinyɛ na, an yɛrɛ tun y'a lɔn ko an bɛna sa wajibi. O le y'a to, an y'an jigi bɔ an yɛrɛ kan, k'a la Ala kan, ale min bɛ suuw kunun.

¹⁰Ale le y'an kisi o sayajugu nin ma, a bɛna an kisi tugu. An jigi b'a kan, ko a bɛna an kisi halibele.

¹¹Aw fana b'aw niyɔrɔ ta n'aw ka dalili ye anw koo la. O cogo la, an bɛna o nɛɛma sɔrɔ mɔgɔ caaman ka Ala dali sababu la, mɔgɔ caaman bɛna barika la Ala ye o kɔsɔn.

¹²An ka kunkɔrɔta ye min ye: o ye an ka taamacogo ye, aw cɛma, ani yɔrɔ bɛɛ, an y'o min kɛ ni kɔnɔgwɛ ye Ala nyasiran na. O ma kɛ adamaden ka lɔnniya sababu la, nga Ala ka nɛɛma nɔɔ lo.

¹³An tɛ koo si sɛbɛn k'o ci aw ma n'aw tɛ se ka minw kalan ani k'o faamu. Ne lanin b'a la ko aw bɛna se k'an faamu kosɛbɛ.

¹⁴Bari aw y'an ka koo faamu dɔɔni k'a lɔn ko an kɛra aw ka kunkɔrɔtafɛn ye, i n'a fɔ aw fana bɛna kɛ an ka kunkɔrɔtafɛn ye cogo min na an Matigi Yezu kɔsegilon na.

¹⁵N lanin tun b'o la minkɛ, o la, ne tun b'a fɛ ka taa aw fɛ fɔlɔ, waasa aw ka se ka nisɔndiya tugu a sinyɛ filanan na.

¹⁶Ne tun b'a fɛ ka tɛmɛ aw fɛ fɔlɔ ka sɔrɔ ka taa Maseduwani mara la, ka bɔ Maseduwani ka na aw fɛ tugu, waasa aw ka se ka ne dɛmɛ ne ka taamako la ka taa Zude mara la.

¹⁷O tuma na, ne tun y'o koo latigɛ waati min na, ne tun m'o jati koba ye wa? Walima ne ka koo latigɛtaw ye adamaden ka miiriya dama ye, ni n bɛ kaan fila fɔ wa? K'a fɔ ɔnhɔn ka tila k'a fɔ ayi.

¹⁸Ala ye ne seere ye, an ye kuma min fɔ aw ye, o tɛ ten.

¹⁹Bari ne ni Silivɛn ani Timote, anw ye Ala Dencɛ Yezu Krista min kibaru fɔ aw ye, o ma kɛ ɔnhɔn, ni ayi koo ye, nga o ye Ala ka tinyɛ ye.

²⁰Ala ka layidu bɛɛ kɛra tinyɛ ye Yezu Krista barika la, o cogo la fana an b'a fɔ “amiina” ka bonya la Ala tɔgɔ kan.

²¹Ale Ala le bɛ barika don anw ni aw la Krista sababu la. Ale fana le y'an woloma,

²²k'a ka taamasinyɛ la an kan, ani ka Nii Senuman d'an ma k'a ka nyumanya nata yira an na.

²³Ala le ye ne seere ye ni ne bɛ galon tigɛra. Ne tun b'a fɛ k'aw kuun bɔ koo la le, o le y'a to, ne ma segi Korɛnti tugu.

²⁴A ma kɛ ko anw b'a fɛ ka koo dɔ wajibiya aw kunna lanaya faan fɛ dɛ, bari aw banbanin lo o la, nga an b'aw dɛmɛna le janko aw ka nisɔndiya.