Read LAYIDUKURA KORƐNTIKAW FILANAN 10 Bible Online

KORƐNTIKAW FILANAN 10 - LAYIDUKURA bible

KORƐNTIKAW FILANAN 10

¹U b'a fɔ ko ne Pɔli kɛra mɔgɔ majiginin ye ni ne bɛ aw cɛma, nga ni n tɛ aw cɛma, n ka fari. Ne yɛrɛ le b'aw dali Krista ka makari n'a ka nyumanya kɔsɔn,

²ko aw kan'a to ne bɛ fariya aw ma ni n sera aw fɛ tuma min na, bari, mɔgɔ minw b'a miiri ko an bɛ adamadenya baara le kɛra dɔrɔn, ne bɛ se ka fariya olu ma.

³K'an to adamadenya la, an tɛ kɛlɛ kɛ adamaden ka cogo la.

⁴An ka kɛlɛkɛminanw tɛ adamaden ta ye, Ala ta lo, barika b'u la ka juguw ka fanga cɛn k'u ka miirijuguw cɛn,

⁵ani yɛrɛbonyala minw bɛ muruti Ala sago kama, ne bɛ olu bɛɛ majigi. An bɛ mɔgɔw ka miiri bɛɛ yɛlɛma k'o sin Krista ma u k'a ka kuma labato.

⁶N'aw sɔnna ka mɛnni kɛ an fɛ tuma min na, an labɛnnin lo ka murutibagaw bɛɛ jalaki.

⁷An bɛ koow filɛ o kɔɔ kan dama. Ni mɔgɔ dɔ lanin b'a la ko ale kɛra Krista ta ye, o tigi ka kan k'a lɔn fana ko ni ale ye Krista ta ye, an fana ye a taw ye.

⁸Matigi ye see min d'an ma k'aw dɛmɛ ka taa nya, o ma d'an ma aw ka makosa kama. Hali ni ne ye n yɛrɛ bonya o koo la ka tɛmɛ dɔɔni, ne tɛ maloya o la.

⁹A ma kɛ ko ne b'a fɛ ka siranya bila aw la ni ne ka batakiw ye dɛ,

¹⁰bari u b'a fɔra ko ne Pɔli bɛ kuma gwɛlɛmanw n'a farimanw le fɔ ne ka batakiw kɔnɔ, nga ko ni ne yɛrɛ le nana, fanga tɛ ne ka kuma na ani ko mɔgɔ bɛ se k'o kɔɔ kari.

¹¹Mɔgɔ min b'o kuma nyɔgɔn fɔ, o tigi k'a faamu fana ko k'an to yɔrɔ wɛrɛ la, an ka kuma bɛ bataki kɔnɔ cogo min na, o cogo fana na n'an b'aw cɛma, an ka kɛwali bɛ ten.

¹²An tɛna an ka koo suma walima k'o kɛnyɛ ni mɔgɔ dɔ wɛrɛw ta ye, olu minw b'u yɛrɛ koo fɔ. Nalomanw lo, u b'u yɛrɛ ka koo suma ani k'o kɛnyɛ n'u yɛrɛ ye.

¹³An kɔni, an t'an yɛrɛ bonya ka taa tɛmɛ an lɔyɔrɔ kan, nga Ala ye lɔyɔrɔ min d'an ma, o min kɛra sababu ye, an sera aw fɛ, an b'an yɛrɛ bonya ka kɛnyɛ n'o ye.

¹⁴An sera aw fɛ ka Krista ka kibaru diman dama fɔ aw ye, an ma tɛmɛ an lɔyɔrɔ kan i n'a fɔ a latigɛra cogo min na.

¹⁵An tɛ tɛmɛ an lɔyɔrɔ kan. An t'an yɛrɛ bonya mɔgɔ wɛrɛ ka baara kɔsɔn. Nga an b'a fɛ aw ka taa nya le Krista ka koo la, an ka se ka baara caaman dɔ wɛrɛw kɛ aw cɛma, ka kɛnyɛ ni lɔyɔrɔ min dira an ma

¹⁶janko an ka se ka taa nya ni kibaru diman fɔko ye fɔɔ ka tɛmɛ aw la ka taa yɔrɔ wɛrɛ la. An tɛna an yɛrɛ bonya mɔgɔ wɛrɛ si ka baara kɔsɔn.

¹⁷A fɔra ko: “Ni mɔgɔ min b'a fɛ k'a yɛrɛ bonya, o tigi k'a yɛrɛ bonya Matigi barika la.”

¹⁸A ma kɛ ko mɔgɔ min b'a yɛrɛ koo fɔ, k'o tigi ta le ye tinyɛ ye, nga mɔgɔ min koo ka di Matigi ye, o lo.