Read LAYIDUKURA KORƐNTIKAW FILANAN 11 Bible Online

KORƐNTIKAW FILANAN 11 - LAYIDUKURA bible

KORƐNTIKAW FILANAN 11

¹Ayiwa, n'aw tun bɛ se ka ne ka fatɔya kuma munyu dɔɔni tugu. Aw bɛ se k'o munyu.

²Ne bɛ keliya aw koo la, o keliya nin bɔra Ala fɛ, bari aw kɛra i n'a fɔ sungurusɛbɛw, ne y'o minw maminɛ cɛɛ kelen ye, o ye Krista ye.

³Nga ne bɛ siran ko aw hakili kana nyagami, k'aw jigi kana bɔ Krista kan, i n'a fɔ saa ye Awa nanbaran n'a ka cekuya ye cogo min na.

⁴Mɔgɔ wɛrɛ bɛ na ka Yezu wɛrɛ koo fɔ aw ye, a ka fɔta bɛ danna an ta la, aw bɛ sɔn o ma, ka sɔn nii wɛrɛ ma, min bɛ danna Nii Senuman na, ka sɔn kibaru diman wɛrɛ ma, min bɛ danna ni aw tun sɔnna min na.

⁵Ne ka miiri la, ne k'o cidenbaba nunu man fisa ni ne ye foyi si la.

⁶Hali ni ne tɛ se kuma na, lɔnniya faan fɛ kɔni, ne bɛ se, an y'o bɛɛ yira aw la ka gwɛ tuma bɛɛ, koo bɛɛ la.

⁷Ne tun ye n yɛrɛ majigi ka kibaru diman fɔ aw ye gwansan waasa aw mako ka nya, o tuma na ne ye kojugu le kɛ wa?

⁸Ne ye Ala ka jama dɔw bololafɛnw le minɛ ka sɔrɔ ka baara kɛ aw cɛma.

⁹Tuma min na ne tun b'aw fɛ yen, ni fɛɛn dɔ makoya tun bɛ ne la, ne tun t'o minɛ aw si fɛ, bari an balima minw bɔra Maseduwani mara la ka na, olu le lɔra ni ne ka koo ye. Ne banbana janko ne kana kɛ aw si ka doni ye koo si la, a fana tɛna kɛ aw ta ye.

¹⁰Krista ka tinyɛ kɔsɔn, ne b'a fɔ ko bonya min bɛ ne kan, o tɛna bɔ ne kan Akayi mara la fewu.

¹¹Mun na ne y'o fɔ aw ye? Bari ne t'aw kanu wa? Ayi, Ala yɛrɛ b'o lɔn.

¹²Ne ye baara min kɛ, ne bɛna o nyɔgɔn kɛ tugu, janko minw bɛ cogoya nyini k'u yɛrɛ bonya k'a fɔ k'olu b'an ka baara nyɔgɔn le kɛra, u kana se k'o kɛ.

¹³O mɔgɔ nunu bɛ galon tigɛ k'olu ye cidenw ye, u kɛra galontigɛlaw ye, k'u yɛrɛ kɛ Krista ka cidenw ye.

¹⁴O ma kɛ kabako ye, bari, Sutana yɛrɛ b'a yɛrɛ kɛ i n'a fɔ mɛlɛkɛnyuman.[1]

¹⁵O la, n'a ka baaradenw fana b'u yɛrɛ kɛ i n'a fɔ konyumankɛlaw, o tɛ kabako ye. Nga u ka koo bɛɛ bɛna laban ka kɛnyɛ n'u ka baara ye.

¹⁶Ne b'a fɔ tugu ko mɔgɔ si kana miiri ko ne ye fatɔ ye. Nga n'a bɛ dɔ kɔnɔ ten, o tuma na, aw ka ne kɛ fatɔ ye, ne ka se ka n yɛrɛ bonya dɔɔni fana.

¹⁷Ne bɛ kuma min fɔra sisan, o ma kɛ Matigi sago ye, nga sababu le y'a to, ne bɛ n yɛrɛ bonya, o la ne bɛ kuma i n'a fɔ fatɔ.

¹⁸Mɔgɔ dɔw b'u yɛrɛ bonya ka kɛnyɛ ni adamadenya ye minkɛ, o la, ne fana bɛ n yɛrɛ bonya.

¹⁹Aw minw nyamalɔnin bɛ, aw bɛ sɔn ka fatɔw ka koo munyu!

²⁰Aw bɛ sɔn u b'aw minɛ i n'a fɔ jɔɔnw, ani u ka ben aw kan k'aw tɔnyɔ, ani k'aw dɔgɔya, hali n'u b'aw tulo ci, aw b'o bɛɛ munyu.

²¹Ne yɛrɛ bɛ maloya ka kuma nin fɔ, a kɛra i n'a fɔ an kɛra barikatanw ye. Ni mɔgɔ wɛrɛw b'u jaa gwɛlɛya k'u yɛrɛ bonya, ne fana bɛ sɔn k'o nyɔgɔn kɛ, ne bɛ kumana i n'a fɔ fatɔ.

²²Olu ye eburu ye kɛ? Ne fana ye dɔ ye. Olu ye Isirayɛlidenw ye kɛ? Ne fana ye dɔ ye! Olu ye Ibrayima deenw ye kɛ? Ne fana ye dɔ ye!

²³Olu ye Krista ka baarakɛlaw ye kɛ? Ne bɛna kuma i n'a fɔ ne fatɔyara le. Ne tɛmɛna olu kan o baara la yɛrɛ, ne donna kaso la ka tɛmɛ olu kan, u ye ne bugɔ ka tɛmɛ olu kan fana. Waati caaman na ne tun bɛ nyini ka sa,

²⁴Zuwifuw ye ne minɛ ka golokami nyaa bi saba ni kɔnɔntɔn bɔ ne la, sinyɛ duuru bɛɛ.

²⁵U ye ne bugɔ ni bere ye sinyɛ saba, ka ne bon ni kabakuruw ye sinyɛ kelen, kurun cɛnna ni ne ye sinyɛ saba. Ne ye suu kelen ni tile kelen kɛ jii kɔnɔ.

²⁶Ne ye n ka taama caaman kɛ seen na. Ka ne to taama na, waati caaman na gwɛlɛya sera ne ma, baji tun bɛ nyini ka n ta, benkannikɛlaw fana fɛ, gwɛlɛya sera ne ma, ne ka siya yɛrɛ ye gwɛlɛya lase ne ma, ani siya wɛrɛw fana, ne ye gwɛlɛya sɔrɔ dugubaw kɔnɔ, ani kongo kɔnɔ fana, gwɛlɛya fana sera ne ma kɔgɔji kan, ani ne balimajuguw y'a kɛ gwɛlɛya sera ne ma fana.

²⁷Ne sɛgɛnna baara gwɛlɛman bolo, ne ma sinɔgɔ sinyɛ caaman, ne tɔɔrɔla kɔngɔ ni minnɔgɔ bolo, ne tun tɛ dumuni sɔrɔ tuma caaman, ne tɔɔrɔla nɛnɛ bolo kosɛbɛ, ne tun tɛ fani sɔrɔ k'a don fana.

²⁸Ka fara o bɛɛ kan, loon o loon ne bɛ hami Ala ka jama bɛɛ koo la.

²⁹Ni mɔgɔ dɔ dɛsɛra, a bɛ kɛ ne kɔnɔ i n'a fɔ ne yɛrɛ le dɛsɛra. Ni dɔ ye kojugu kɛ, ne hakili bɛɛ bɛ cɛn.

³⁰Ni ne ka kan ka n yɛrɛ bonya, ne bɛna n yɛrɛ bonya ne ka dɛsɛyɔrɔ le la.

³¹Ala min ye an Matigi Yezu Faa ye, ale min tɔgɔ ka kan ka bonya tuma bɛɛ, ale b'a lɔn ko ne tɛ galon tigɛra.

³²Ka ne to Damasi dugu kɔnɔ, masacɛ Aretasi ka lasigiden ye sira di k'u ka dugu dondaw bɛɛ kɔlɔsi, waasa u ka ne minɛ.

³³Nga n balimaw ye ne dɛmɛ ka ne jigi ni kogo woo ye dugu kɔfɛ sinsin kɔnɔ. O cogo la, ne kisira a ma.