Read LAYIDUKURA KORƐNTIKAW FILANAN 12 Bible Online

KORƐNTIKAW FILANAN 12 - LAYIDUKURA bible

KORƐNTIKAW FILANAN 12

¹Ne ka kan ka ne yɛrɛ bonya, hali n'o ma nyi. O n'a ta bɛɛ, Matigi ye fɛɛn minw yira ne la ani ne ye koo minw ye, ne bɛna olu koo fɔ.

²Ne bɛ mɔgɔ dɔ lɔn min lara Krista la, a saan tan ni naani filɛ nin ye, o tigi nin tara ka taa fɔɔ sankolo la.[2] A yɛrɛ le yɛlɛla yen wa, walima fɛɛn yirata lo wa, ne kɔni m'o lɔn, Ala kelen le b'o lɔn.

³Tinyɛ lo, ne y'a lɔn k'o mɔgɔ nin tun tara ka taa yen, a yɛrɛ yɛrɛ le tara ka taa wa, walima fɛɛn yirata lo wa, ne m'o lɔn, Ala kelen le b'o lɔn.

⁴O tigi nin tara ka yɛlɛ fɔɔ arijana na. O yɔrɔ la, a ye kuma dɔ mɛn, min tɛ se ka segi ka fɔ tugu, ani mɔgɔ man kan k'o min baro bɔ.

⁵Ne bɛ se ka n yɛrɛ bonya o mɔgɔ sugu le kɔsɔn, nga ne kɔni, ne tɛ n yɛrɛ bonya ne yɛrɛ ka kɛta kɔsɔn, fɔɔ ne ka dɛsɛ kɔsɔn.

⁶Ni ne tun b'a fɛ ka n yɛrɛ bonya, ne tun tɛna jati fatɔ ye, bari ne tun bɛna tinyɛ dama le fɔ. Nga ne banna k'o kɛ min kama, o ye nin ye, ne t'a fɛ mɔgɔ si ka ne bonya fɛɛn wɛrɛ la ni ne ka kuma ni n ka kɛwali tɛ.

⁷Bana dɔ ye ne sɔrɔ, ale min nana i n'a fɔ Sutana ka ciden waasa ne ye kabako minw ye, ne kana se ka ne yɛrɛ bonya olu kɔsɔn.

⁸O bana nin koo la ne ye Matigi dali sinyɛ saba ko a ka ne kɛnɛya.

⁹Nga a ye ne jaabi ko: “N ka nɛɛma b'i wasa, ne bɛ n ka sebagaya yira i ka dɛsɛwaati la.” O le y'a to ne bɛna n yɛrɛ bonya ne ka tɔɔrɔkow le la, waasa Krista ka sebagaya ka to ne fɛ.

¹⁰O le kɔsɔn, ne bɛ nisɔndiya ne ka dɛsɛ koow la, u bɛ ne nɛnina wo, ne dusu kasira wo, u bɛ ne tɔɔrɔla wo, ne bɛ nisɔndiya hali ni nisɔngoyako lo Krista kɔsɔn, bari ne y'a lɔn ko waati min na ne barika dɛsɛra, o waati yɛrɛ la ne bɛ fanga sɔrɔ.

¹¹Aw k'a filɛ, ne bɛ kumana i n'a fɔ ne kuun wilila, o bɔra aw le la. Aw le tun ka kan ka kuma ne nɔɔ na. Bari hali ni ne tɛ foyi ye, aw ka cidenbaba nunu man fisa ni ne ye.

¹²Kɛwali minw b'a yira ko ne ye ciden ye, olu bɛɛ yera aw cɛma. Ne ye kobaw ni kabako sifa bɛɛ kɛ. Ka fara o kan, ne munyuna koo bɛɛ la.

¹³Ne ma se k'aw minɛ ka nya koo jumɛn le la, ni ne y'o nyɔgɔn kɛ Ala ka jama tɔw ye? Ne ma sɔn aw ka lɔ ni ne ka kunko ye minkɛ n'o dɔrɔn tɛ. Aw ye yafa ne ma o fili nin koo la.

¹⁴Ayiwa, nin le bɛna kɛ a sabanan ye, ne labɛnnin lo ka taa aw fɛ. Ne ka kunko tɛna la aw kan, bari ne mako b'aw yɛrɛ le la, ne mako tɛ aw ka bololafɛnw na. Facɛman le b'a deenw ka sini nyasigi labɛn, deenw tɛ facɛ ta labɛn.

¹⁵Ne kɔni fɛ, ne labɛnnin lo ka n bololafɛnw bɛɛ ban aw kɔsɔn, ka tila ka n yɛrɛ di k'aw dɛmɛ. Ni ne y'aw kanu ten, o le bɛn'a to aw tɛ ne kanu sɛbɛ la wa?

¹⁶Aw y'a lɔn ko ne ma dɛmɛ sɔrɔ aw fɛ. Nga dɔw b'a fɔ ko ne ka cekuya kɔsɔn, ne ye nanbaran kɛ ka dɔ sɔrɔ sira wɛrɛ fɛ.

¹⁷Ne ye mɔgɔ minw ci aw fɛ, ne ye tɔnɔ dɔ sɔrɔ aw kun olu dɔ barika la wa?

¹⁸Ne ye Titi dali k'a ci aw fɛ n'an balimacɛ ye, ne y'o min koo fɔ ka tɛmɛ. O tuma na, Titi y'a ka doni dɔ la aw kan wa? Ne ni Titi jogo n'an ka miiriya tɛ kelen ye wa?

¹⁹Aw bɛ miiri kabini tumajan, ko an bɛ tinyɛ le nyinina, o tɛ wa? Ayi dɛ, ne terisɛbɛw, an b'a fɛ aw ka se ka taa nya le. O le y'a to Krista barika la an b'an ka kuma fɔ Ala nyakɔrɔ.

²⁰Ne bɛ siran ko ni ne sera aw fɛ waati min na, ne b'aw jati cogo min na, ne kana taa aw sɔrɔ cogo wɛrɛ la, aw tun bɛ ne jati cogo min na, aw fana kana ne ye cogo wɛrɛ la. N bɛ siran ko kɛlɛ ni keliya, ni dimiko, ni sɔnjuguya ni nyɔgɔnnɛni, ni kumakolonfɔ, ni yɛrɛbonya ni koferekenin kana sɔrɔ aw cɛma.

²¹Ne fana bɛ siran ko ne mana se aw fɛ tuma min na, ne ka Ala kana ne majigi aw cɛma. Mɔgɔ minw tun ye kojugu kɛ n'u ma sɔn ka nimisa u ka kakalaya la, n'u ka mɔgɔkolonya n'u ka malobaliya la, ne dusu kana kasi olu kɔsɔn.