Read LAYIDUKURA KORƐNTIKAW FILANAN 13 Bible Online

KORƐNTIKAW FILANAN 13 - LAYIDUKURA bible

KORƐNTIKAW FILANAN 13

¹Nin taama bɛna kɛ ne taako sabanan ye aw fɛ. “Koo o koo minw bɛ yen, u bɛna latigɛ, ka kɛnyɛ ni mɔgɔ fila walima mɔgɔ saba ka seereya ye” i n'a fɔ a fɔra Ala ka kuma na cogo min na.

²Mɔgɔ minw ye kojugu kɛ fɔlɔfɔlɔ, ne bɛ olu ni tɔ nunu lasɔmina, ne tun y'a fɔ olu ye ka kɔrɔ ne tɛmɛko filanan na aw fɛ, ne bɛ tila k'a fɔ u ye tugu, hali ni ne t'aw cɛma yen. Ni ne sera aw fɛ tuma min na, ne tɛna makari mɔgɔ si la tugu dɛ,

³bari aw ko aw mako b'a la ka koo ye min b'a yira ko ne bɛ kuma Krista le barika la. See bɛ Krista ye aw cɛma. A b'a ka sebagaya le kɛra aw cɛma.

⁴Hali ni Krista sara lɔgɔ kan barikatanya la, a nyanaman lo Ala ka sebagaya barika la bii. An fana, halibi, an kɛra barikatanw ye i n'a fɔ ale tun bɛ cogo min na, nga Ala barika la k'an to n'ale ye, Ala b'an kɛ setigiw ye aw faan fɛ.

⁵Aw k'aw yɛrɛ sɛgɛsɛgɛ k'a filɛ yala n'aw lanin bɛ Krista la sɛbɛ la. Walima aw t'a lɔn ko Krista b'aw fɛ wa? N'o tɛ sigasigako nin b'aw le la.

⁶Ne lanin b'a la ko aw b'a lɔn ko sigasiga tɛ an ka koo la.

⁷An bɛ Ala dali ko aw kana kojugu si kɛ, an t'o kɛra janko k'a yira ko see b'an ye. An b'o kɛ janko an k'aw ye n'aw bɛ konyuman le kɛ, hali n'a bɛ kɛ i n'a fɔ anw dɛsɛra.

⁸Bari an tɛ se ka tinyɛ bali, an b'a kɔ le.

⁹Ni an bɛ dɛsɛ, aw bɛ fanga sɔrɔ, o tuma na an bɛ nisɔndiya. An bɛ Ala dali ko aw ka se ka taa nya ka kɛ mɔgɔdafaninw ye.

¹⁰O le y'a to ne bɛ to yɔrɔjan na, ka sɛbɛ ci aw ma, waasa ni ne sera aw fɛ, ne kana fariya aw ma ni kuntigiya ye Matigi y'o min di ne ma. A y'o di waasa ne k'aw dɛmɛ ka taa nya, a m'o di ne ma k'aw mako sa.

¹¹Sisan n balimaw, aw ka to nisɔndiya la, ka jija ka kɛ mɔgɔ dafaninw ye, ka nyɔgɔn jaa gwɛlɛya, ka bɛn kosɛbɛ, ani ka to hɛrɛ la nyɔgɔn fɛ. N'o kɛra, kanuyatigi Ala, min ye hɛrɛtigi ye, ale bɛna to aw fɛ.

¹²Aw ka nyɔgɔn fo kosɛbɛ ni kɔnɔgwɛ ye. Ala ka jama bɛɛ b'aw fora.

¹³An Matigi Yezu Krista ka nɛɛma ni Ala ka kanuya, ani Nii Senuman ka jɛnnyɔgɔnya ka kɛ aw bɛɛ fɛ.