Read LAYIDUKURA KORƐNTIKAW FILANAN 2 Bible Online

KORƐNTIKAW FILANAN 2 - LAYIDUKURA bible

KORƐNTIKAW FILANAN 2

¹Ne y'a latigɛ ko ne tɛna kɔsegi aw fɛ k'aw dusu kasi.

²Ni ne y'aw dusu kasi, ne bɛna nisɔndiya sɔrɔ min, n'aw fɛ tɛ?

³Ne ye bataki ci aw ma waasa ni ne nana se aw fɛ, ne dusu kana kasi aw kɔsɔn aw minw ka kan ka ne nisɔn diya. Ne fana lanin b'a la ko ne ka nisɔndiya, o le y'aw bɛɛ ka nisɔndiya ye.

⁴Ne tun b'o bataki cira aw ma tuma min na, ne y'o ci ni hakilinyagami, ani dusucɛn ye, ne tun kasira kosɛbɛ. O ma kɛ k'aw dusu kasi dɛ, nga waasa aw ka se k'a lɔn ko ne b'aw kanu kosɛbɛ.

⁵Ni mɔgɔ dɔ ye dusukasiko dɔ kɛ, a ma ne dusu kasi, a y'aw bɛɛ le dusu kasi, walima aw dɔw.

⁶Aw ye min kɛ a la ka ban, o b'a bɔ.

⁷Sisan, aw ka yafa a ma k'a jigi tugu, waasa dusukasi kan'a sɔrɔ fɔɔ a hakili bɛ nyagami a bɛ tunu.

⁸O la, ne b'aw dali ko aw ka banba k'a yira a la ko a koo diyara aw ye.

⁹Ne y'o koo sɛbɛn k'o ci aw ma, k'a filɛ n'aw bɛ se ka mɔgɔ ka kuma bɛɛ labato.

¹⁰N'aw yafara mɔgɔ dɔ ma, ne fana bɛ yafa o tigi ma. N'aw y'a ye ne y'o nyɔgɔn kɛ, ne y'o kɛ aw le kɔsɔn, Krista nyakɔrɔ,

¹¹waasa an kana sira di Sutana ma a ka see sɔrɔ an kan bari an b'a ka miiriya lɔn.

¹²Ne sera Torowasi tuma min na ko n bɛna Krista ka kibaru diman fɔ yen, Matigi tun ye cogo di ne ma ka se ka baara kɛ kosɛbɛ.

¹³O n'a ta bɛɛ, ne hakili tun ma sigi, bari ne ma n balimacɛ Titi sɔrɔ yen. O la, ne ye sira dali u fɛ ka taa Maseduwani mara la.

¹⁴Ne bɛ barika la Ala ye ale min b'a to an bɛ niyɔrɔ sɔrɔ Krista ka sesɔrɔko la tuma bɛɛ, ale le b'an ta ka baara kɛ n'an ye ka Krista yira yɔrɔ bɛɛ, i n'a fɔ wusulan.

¹⁵Mɔgɔ minw bɛ kisili sira kan, ani minw bɛ halakili sira kan, olu fɛ an kɛra Krista ka wusulan ye Ala ma.

¹⁶Mɔgɔ minw bɛ halakili sira kan, olu fɛ, an kɛra sababujugu ye min bɛ mɔgɔ faga. Minw bɛ kisili sira kan, olu fɛ, an kɛra sababunyuman ye min bɛ mɔgɔ kisi. Mɔgɔ jumɛn le bɛ se o baara nin nyɔgɔn kɔrɔ?

¹⁷Mɔgɔ caaman bɛ Ala ka kuma kɛ jagokun ye. An tɛ i n'a fɔ olu. Ala le y'an ci, o la, an bɛ kuma a nyakɔrɔ ni kɔnɔgwɛ ye Krista barika la.