Read LAYIDUKURA KORƐNTIKAW FILANAN 3 Bible Online

KORƐNTIKAW FILANAN 3 - LAYIDUKURA bible

KORƐNTIKAW FILANAN 3

¹An b'a la k'an yɛrɛ koo fɔ aw ye tugu le wa? Walima an mako bɛ mɔgɔ dɔ wɛrɛ ka sɛbɛ la min b'an koo fɔ wa? Walima aw ta, i n'a fɔ mɔgɔ dɔw b'a kɛ cogo min na wa?

²Aw le y'an ka sɛbɛ ye. A sɛbɛnnin bɛ an dusukun na, mɔgɔ bɛɛ b'a ye, ani k'a lɔn.

³Aw kɛra Krista ka bataki ye, o min cira an barika la. A m'a sɛbɛn ni sɛbɛnnikala ye, nga a sɛbɛnna Ala ka Nii Senuman le barika la, a fana ma sɛbɛn walaka kabakurulaman kan, nga adamaden dusukun kan.

⁴An y'o jigi sɔrɔ Krista barika la Ala nyakɔrɔ.

⁵An tɛ miiri ko an sera ka fɛɛn minw kɛ, k'o bɔra an yɛrɛ la dɛ, o bɔra Ala le la.

⁶Ale le ye see d'an ma ka layidukura koo fɔ mɔgɔw ye, o ma kɛ sariyako ye, nga Nii Senuman koo lo. Sariya ka koo laban ye saya ye, nga Nii Senuman ta ye hɛrɛ ye.

⁷Sariya min ka koo laban ye saya ye, o tun sɛbɛnna walaka kabakurulaman kan tuma min na, ni Ala ka nɔɔrɔ yera o waati la fɔɔ Isirayɛlidenw tun tɛ se ka Musa nyada filɛ, o nɔɔrɔ kɔsɔn min tun kɛra fɛɛn tɛmɛta ye,

⁸min kɛra Nii Senuman ka baara ye, ale ka nɔɔrɔ man kan ka bonya wa?

⁹Baara min laban ye halakili ye, n'o ye bonya sɔrɔ, baara min bɛ mɔgɔw kɛ mɔgɔtilenninw ye, ale ka bonya tɛna tɛmɛ o ta kan wa?

¹⁰Fɛɛn min tun ye bonya sɔrɔ, ale ka bonya ma kɛ bonya ye sisan ta nyana, sisan ta ka barika bonya kɔsɔn.

¹¹Fɛɛn min tun kɛra fɛɛn tɛmɛta ye, n'ale ye bonya sɔrɔ, fɛɛn min tɛ tɛmɛ abada, ale ta ka bon.

¹²O jigi le b'an fɛ, o le y'a to an hakili siginin lo.

¹³An t'a kɛ i n'a fɔ Musa tun b'a kɛ cogo min na, ale min tun bɛ to ka fani biri a nyada kan, waasa Isirayɛlidenw kan'a ka nɔɔrɔ daan ye, o min ye tɛmɛta ye.

¹⁴Nga u ma se ka foyi faamu, i n'a fɔ fani birinin bɛ u nyada kan. Hali fɔɔ bii yɛrɛ, n'u bɛ layidukɔrɔ kalan tuma min na, u tɛ foyi faamu, bari o fani nin bɛ bɔ Krista le barika la.

¹⁵Hali fɔɔ bii, n'u bɛ Musa ka kitabu kalan, o fani nin b'u nyada kan.

¹⁶Ni min sɔnna Matigi ma, fani nin bɛ bɔ o tigi nyada kan.

¹⁷Matigi min koo bɛ fɔra yan, o ye Nii Senuman ye. Matigi ka Nii Senuman bɛ yɔrɔ min na, yɛrɛsɔrɔ le b'o yɔrɔ la.

¹⁸An minw ka fani bɔra, Matigi ka nɔɔrɔ b'an kan. O cogo la, an bɛ yɛlɛma ka kɛ i n'a fɔ ale, ka nɔɔrɔ sɔrɔ kosɛbɛ min bɛ to ka bonya tuma bɛɛ Matigi barika la, o min ye Nii Senuman ye.