Read LAYIDUKURA KORƐNTIKAW FILANAN 4 Bible Online

KORƐNTIKAW FILANAN 4 - LAYIDUKURA bible

KORƐNTIKAW FILANAN 4

¹Ala ka nyumanya kɔsɔn a ye baara nin kalifa an ma, o la, an jigi tɛ tigɛ fewu.

²An banna dibidibiko ma maloya b'o min na, an tɛ koo kɛ ni nanbaran ye, an fana tɛ Ala ka kuma kɔrɔ yɛlɛma fewu. An kɔni, an bɛ tinyɛ yɛrɛ yɛrɛ le fɔ, janko mɔgɔw k'u jigi la an kan Ala nyakɔrɔ.

³Halibi anw bɛ kibaru diman min fɔ, n'ale gwɛnin tɛ mɔgɔ minw fɛ, olu bɛ halakili sira kan.

⁴Minw tɛ la Ala la, dinyɛ kuntigi Sutana ye olu hakili dibi waasa u kana se ka kibaru diman yeelen ye o min bɛ Krista ka nɔɔrɔ yira, ale min ye Ala jaa ye.

⁵An t'an yɛrɛ koo fɔra aw ye dɛ, Yezu Krista min ye Matigi ye, an bɛ ale le koo fɔra. Anw kɔni bɛ baara kɛ aw ye Yezu kɔsɔn.

⁶Bari Ala min tun y'a fɔ ko kɛnɛ ka bɔ dibi cɛma, ale kelen le ye yeelen bɔ an dusu la, waasa mɔgɔw k'a ka nɔɔrɔ ye, o min bɛ manamana Krista nyada kan.

⁷Nga o baara nafaman dira an ma, an minw fanga ka dɔgɔ i n'a fɔ bɔgɔdaga, waasa mɔgɔw k'a lɔn k'o sebagaya kabakoman nin ma bɔ an na, fɔɔ Ala la.

⁸An dɛrɛnin bɛ tɔɔrɔw fɛ faan bɛɛ la, nga an bɛ yen. An hakili nyagaminin bɛ, nga an jigi ma tigɛ.

⁹U y'an tɔɔrɔ kosɛbɛ, nga Ala m'an bila. U y'an bugɔ k'an ben, nga an tɔɔ ma laban.

¹⁰Tuma o tuma an bɛ fagasira kan i n'a fɔ Yezu sara cogo min na, waasa an ka se ka Yezu tɔgɔ yira.

¹¹K'an to nii na, an kɔni labilanin lo saya kama tuma bɛɛ Yezu kɔsɔn. An minw ye farisogo ye n'an bɛna sa, n'an tora nii na halibi, o b'a yira ko Yezu nyanaman lo.

¹²O cogo la, saya bɛ munumunu an cɛma, aw ta, o ye hɛrɛko ye.

¹³A fɔra Ala ka kuma na ko: “Ne lar'a la, o le y'a to ne kumana.” O jigi kelen nin le y'a to an fana lar'a la, o le y'a to an bɛ kuma.

¹⁴An lanin b'a la ko ale min ye an Matigi Yezu kunun, ale fana bɛna an kunun ni Yezu ye, ani k'an bɛɛ jɛn nyɔgɔn fɛ a nyakɔrɔ.

¹⁵O koo nunu bɛɛ kɛra aw le kɔsɔn, o la, Ala bɛ nɛɛma kɛ mɔgɔ caaman ye, waasa u k'a tando ani ka bonya la a kan.

¹⁶O le y'a to an jigi tɛ tigɛ fewu, hali n'an yɛrɛ farisogo bɛ taa cɛnyɔrɔ, an jigi kɔni, ale bɛ fangakura sɔrɔla loon o loon.

¹⁷Waati dɔɔni tɔɔrɔ minw b'an sɔrɔ, o tɛ foyi ye, an bɛna bonya min sɔrɔ o tɔɔrɔ nin kɔsɔn, o ka bon haali.

¹⁸An ka miiriya tɛ fɛɛn yetaw kan, fɔɔ fɛɛn yebaliw. Fɛɛn minw bɛ ye, olu bɛ tɛmɛ, nga fɛɛn yebaliw tɛ tɛmɛ abada.