Read LAYIDUKURA KORƐNTIKAW FILANAN 5 Bible Online

KORƐNTIKAW FILANAN 5 - LAYIDUKURA bible

KORƐNTIKAW FILANAN 5

¹An farikolo, min ye an nii ka soo ye dugukolo kan, o bɛna cɛn. Nga, an b'a lɔn ko Ala ye dɔ wɛrɛ labɛn an ye arijana na, min tɛ cɛn abada, o ma dilan adamaden barika la.

²Sisan an bɛ ;nuna, an b'a fɛ kosɛbɛ ka sankolo ta sɔrɔ,

³n'an y'o sɔrɔ, an fari lakolon tɛna to yen.

⁴Bari k'an to nii na, an bɛ ;nuna. An dɛrɛnin lo, a ma kɛ ko an b'a fɛ ka sa dɔrɔn dɛ, nga an b'a fɛ ka farisogo sɔrɔ ka bɔ Ala fɛ fana waasa saya ka ban.

⁵Ala le y'an labɛn o kɔsɔn, ale le ye Nii Senuman d'an ma k'a yira an na ko a bɛna nyumanya kɛ an ye sini.

⁶O le y'a to, jigi b'an fɛ tuma bɛɛ. An lanin b'a la ko k'an to farisogo la kɔni, an yɔrɔ ka jan Matigi la.

⁷An bɛ sɔn o koo bɛɛ la lanaya le barika la, nga an nyaa ma la o kan.

⁸Jigi b'an fɛ kosɛbɛ, a ka di an ye kosɛbɛ ka bɔ farisogo nin na, ka taa to Matigi gɛrɛfɛ yen.

⁹O le y'a to an kɔni fɛ, an sara wo, an ma sa wo, min ka di an ye, o ye ka Matigi sago kɛ,

¹⁰bari an bɛɛ ka kan ka lɔ Krista nyakɔrɔ a k'an kiti, waasa mɔgɔ kelen kelen bɛɛ ye baara min kɛ k'u to farisogo la, a kɛra baaranyuman ye wo, baarajugu lo wo, u k'o sara sɔrɔ.

¹¹Matigi nyasiran b'an dusu la minkɛ, o la, an bɛ banba ka mɔgɔw dɛmɛ u k'a lɔn. Ala b'an lɔn kosɛbɛ, ne bɛ miiri ko aw fana b'an lɔn ten.

¹²An t'an yɛrɛ koo fɔ aw ye tugu, nga an bɛ cogoya le d'aw ma aw ka se k'aw yɛrɛ bonya an koo la, waasa mɔgɔ minw b'u yɛrɛ bonya fɛɛn yetaw koo la k'a sɔrɔ foyi t'u kɔnɔ, aw ka se ka olu jaabi.

¹³N'a kɛra ko an ta kɛra fatɔya ye, o ye Ala yɛrɛ ka koo ye, nga n'an ta ma kɛ fatɔya ye, o ye aw ka tɔnɔ ye.

¹⁴Bari Krista ka kanuya sera an kɔrɔ, an minw lara a la ko ale kelen le sara bɛɛ kɔsɔn, o kɔrɔ ko bɛɛ fana sara.

¹⁵A sara mɔgɔ bɛɛ le kɔsɔn, waasa mɔgɔ minw bɛ nii na, olu kana taama u yɛrɛ sago la tugu, nga u k'o kɛ ale kɔsɔn, min sara ka kunun u ka nafa kɔsɔn.

¹⁶O cogo la, an tɛ mɔgɔ si jati adamadenw ka jaticogo la tugu. Hali n'an tun ye Krista lɔn ten, sisan an t'a lɔn o cogo la tugu.

¹⁷Ni mɔgɔ dɔ jɛnna ni Krista ye, o tigi kɛra danfɛnkura ye. A ka kokɔrɔw bɛɛ tɛmɛna, ayiwa, o tigi kɛra mɔgɔkura ye.

¹⁸O koo bɛɛ bɔra Ala fɛ, ale le bɛnna n'an ye Krista barika la, ka tila k'o baara kalifa an ma,

¹⁹bari a ma mɔgɔw ka kojugu jati, a tun bɛ cogoya nyini ka bɛn n'u ye Krista barika la. A y'o kuma fɔko baara d'an ma.

²⁰An kɛra Krista ka lasigidenw ye aw cɛma, a kɛra i n'a fɔ Ala yɛrɛ le b'aw wele an barika la. An b'aw dali Krista tɔgɔ kɔsɔn, ko aw ka sɔn ka bɛn ni Ala ye.

²¹Krista min ma kojugu kɛ, Ala y'a kɛ a sɛgɛnna an ka kojugu kɔsɔn waasa an ka kɛ mɔgɔtilenninw ye ale nyakɔrɔ Krista barika la.