Read LAYIDUKURA KORƐNTIKAW FILANAN 6 Bible Online

KORƐNTIKAW FILANAN 6 - LAYIDUKURA bible

KORƐNTIKAW FILANAN 6

¹An bɛ baara kɛra ni Ala ye, o le kɔsɔn an b'aw dali ko Ala ye nɛɛma min kɛ aw ye, aw kan'a to o bɛ kɛ gwansan ye,

²bari a fɔra Ala ka kuma na ko: “Waatinyuman na, ne y'i lamɛn, kisili sɔrɔlon na, ne y'i dɛmɛ.” Ayiwa, o waatinyuman le ye sisan ye, kisili sɔrɔlon le ye bii ye.

³An t'a fɛ mɔgɔ si k'an ka baara lɔgɔbɔyɔrɔ sɔrɔ, o la, an t'a fɛ ka mɔgɔ si kunna cɛn koo si la.

⁴An kɔni b'a yira koo bɛɛ la ko an ye Ala ka baarakɛlaw ye. An bɛ tɔɔrɔ caaman munyu, ni hakilinyagamikow ni dusucɛnko.

⁵U y'an bugɔ, u y'an don kaso la, u ye mɔgɔw dusu wili an kama, an ye baara gwɛlɛmanw kɛ, sinɔgɔ m'an labɔ, kɔngɔ y'an minɛ.

⁶An y'an yɛrɛ yira a ka baarakɛlaw ye an ka mɔgɔsɛbɛya fɛ, n'an ka lɔnniya, n'an ka munyuli, n'an ka nyumanya fɛ, Nii Senuman barika la, ani an ka kanuyasɛbɛ fɛ,

⁷an ka tinyɛ fɔli, ni Ala ka sebagaya fɛ. An bɛ kotilennin ta k'o kɛ i n'a fɔ an ka maramanfɛn, ka kɛlɛ kɛ n'o ye ani k'an yɛrɛ mara n'o ye fana.

⁸N ye n yɛrɛ yira Ala ka baarakɛla ye n bonyatuma ni n dɔgɔyatuma na. U b'an tɔgɔjugu fɔ, k'an tɔgɔnyuman fana fɔ. U bɛ miiri ko an ye galontigɛlaw ye, k'a sɔrɔ an ye tinyɛfɔlaw ye.

⁹U b'a jati ko mɔgɔ t'an lɔn, k'a sɔrɔ an lɔnnin lo, u b'a jati ko an sanin lo, k'a sɔrɔ an ma sa, u b'an nyaa gwan, nga u t'an faga.

¹⁰U b'an dusu cɛn, nga an bɛ nisɔndiya sɔrɔ tuma bɛɛ. U b'an jati faantanw ye, nga an bɛ mɔgɔ caaman kɛ fɛntigiw ye. U bɛ miiri ko foyi t'an fɛ, k'a sɔrɔ fɛɛn bɛɛ b'an fɛ.

¹¹Korɛntikaw, an y'an kɔnɔ gwɛ aw ye, ka kuma aw fɛ ni kɔnɔgwɛ ye.

¹²An kɔni, an m'an kɔnɔ dogo aw la, aw le y'aw kɔnɔ dogo an na.

¹³Ne bɛ kumana aw fɛ i n'a fɔ ne ka deenw, an y'aw minɛ cogo min na, aw fana k'aw kɔnɔ gwɛ an ye ten.

¹⁴Minw ma la Krista la, aw kana jɛn ni olu ye u ka koo si la. Bɛɛn sifa jumɛn le bɛ se ka sɔrɔ tilenninya ni kojugu cɛ? Yeelen ni dibi bɛ se ka bɛn wa?

¹⁵Bɛɛn jumɛn le bɛ sɔrɔ Krista ni Sutana cɛ? Min lara Krista la ni min ma la a la, jɛnnyɔgɔnya jumɛn bɛ sɔrɔ olu ni nyɔgɔn cɛ?

¹⁶Bɛɛn jumɛn le bɛ sɔrɔ Ala ka soo ni joow cɛ? Bari an ye Ala ka soo ye i n'a fɔ Ala yɛrɛ y'a fɔ cogo min na, a ko: “Ne bɛna sigi u cɛma ka to u fɛ, ne bɛna kɛ u ka Ala ye, u bɛna kɛ ne ka mɔgɔw ye.”

¹⁷O la, Matigi y'a fɔ ko: “Aw ye bɔ u cɛma, ka faran u la, fɛɛn min ma saniya, aw kana maga o la, ne bɛna aw ladon ne fɛ.”

¹⁸Matigi, min ye Setigi ye, tun y'a fɔ ko ale bɛna kɛ aw Faa ye, aw fana bɛna kɛ a dencɛw n'a denmusow ye.