Read LAYIDUKURA KORƐNTIKAW FILANAN 7 Bible Online

KORƐNTIKAW FILANAN 7 - LAYIDUKURA bible

KORƐNTIKAW FILANAN 7

¹Ne teriw, layidu nunu tara an ye minkɛ, o kama, an k'an yɛrɛ saniya ka bɔ nɔgɔ sifa bɛɛ la, farisogo ta, ni dusukun ta. An ka kɛ mɔgɔdafaninw ye Ala nyasiran barika la.

²Aw k'an koo diya aw yɛrɛ ye. An ma mɔgɔ si hakɛ ta, an ma mɔgɔ si mako sa, an fana ma mɔgɔ si ka fɛɛn nanbaran.

³Ne t'o kuma fɔ k'aw jalaki, bari ne tun y'o fɔ ka tɛmɛ ko aw koo ka d'an ye fɔɔ ka taa se saya ma.

⁴Ne jigi b'aw kan kosɛbɛ, ne fana bɛ n yɛrɛ bonya aw koo la kosɛbɛ, k'an to tɔɔrɔ la ne jigi tugu lo, ne fana bɛ nisɔndiya kosɛbɛ.

⁵An sera Maseduwani mara la tuma min na, an ma lafinyɛyɔrɔ sɔrɔ tɔɔrɔ sifa bɛɛ bolo. An tun bɛ kɛlɛ kɛ ni dɔw ye, ani siranya tun bɛ anw na.

⁶Nga Ala min bɛ sɛgɛnbagatɔw jigi tugu, ale le y'an jigi tugu Titi ka nali kɔsɔn.

⁷A ma kɛ ko an jigi tugura Titi ka nali dama le kɔsɔn dɛ, nga ale yɛrɛ ye jigitugu min sɔrɔ aw fɛ, o kɔsɔn lo fana. Ne nyanafin b'aw la cogo min na, a y'o le fɔ an ye n'aw ka hami, ani ne koo b'aw dusu la cogo min na, fɔɔ ne nisɔn diyara kosɛbɛ tugu.

⁸Ne ye bataki min ci aw ma, n'o ye aw dusu cɛn, a ma kɛ ko ne bɛ nimisara o koo la dɛ. Ne kɔni tun nimisara, o kɛra bari ne y'a ye ko bataki nin y'aw nyanasisi waati dɔɔni kɔnɔ.

⁹Sisan ne bɛ nisɔndiya, ne tɛ nisɔndiya aw ka dusukasi kɔsɔn dɛ. Nga aw ka dusukasi nin y'aw dɛmɛ ka nimisa, k'aw sɔɔn yɛlɛma, bari aw ka dusukasi nin kɛra Ala sago ye. O la, an ma kojugu si kɛ mɔgɔ si la.

¹⁰Bari dusukasi min bɛ bɔ Ala fɛ, ale bɛ mɔgɔ dɛmɛ ka nimisa ka kisi, “tun ka lɔn” tɛ ale kɔfɛ. Dusukasi min kɛra dinyɛ ta ye, ale bɛ taa ni mɔgɔ ye saya la.

¹¹Dusukasi min y'aw sɔrɔ ka bɔ Ala fɛ, ale ye baara min kɛ, aw y'o ye. O le y'a to aw siranna Ala nya, ka sin ka koo nin ta ni sɛbɛ ye, k'a yira ko a tun man d'aw ye fana, fɔɔ aw dimina. Ne koo donna aw kɔnɔ kosɛbɛ, ani aw banbana kosɛbɛ ka kojugukɛla nin jalaki. Aw y'a yira cogo bɛɛ la ko aw seen tun tɛ o koo la fana.

¹²Ni ne y'o sɛbɛ ci aw ma, mɔgɔ min ye kojugu nin kɛ, ne m'a ci ale kɔsɔn, a y'a kɛ min na, ne m'a ci ale fana kɔsɔn, nga ne y'o ci waasa aw k'a lɔn Ala nyakɔrɔ ko aw jijanin bɛ anw ka koo la.

¹³O le y'an jigi tugu, ka fara o kan, an nisɔn diyara kosɛbɛ Titi ka nisɔndiya kɔsɔn, aw ye ale min hakili sigi kosɛbɛ.

¹⁴Ne ye ne yɛrɛ bonya aw koo la ale nyana ka ye, ne kɔni ma maloya sɔrɔ o koo la. An delila ka tinyɛ fɔ aw ye tuma bɛɛ cogo min na, o cogo kelen na fana an y'aw koo fɔ Titi ye. Ale fana taara o sɔrɔ ten.

¹⁵Aw y'a kunbɛn ka nya ni siranya ye fɔɔ aw yɛrɛyɛrɛla, ani aw bɛɛ ye mɛnni kɛ a fɛ cogo min na, n'a miirila o la tuma min na, aw koo bɛ diya a ye kosɛbɛ.

¹⁶Ne bɛ nisɔndiya bari ne bɛ se ka n jigi la aw kan koo bɛɛ la.