Read LAYIDUKURA KORƐNTIKAW FILANAN 8 Bible Online

KORƐNTIKAW FILANAN 8 - LAYIDUKURA bible

KORƐNTIKAW FILANAN 8

¹Ne balimaw, Ala ye nɛɛma min kɛ a ka jama ye Maseduwani mara la, an b'a fɛ aw k'o lɔn.

²K'u to tɔɔrɔba la, u n'u ka faantanyajugu bɛɛ, u nisɔndiyaninba y'u tigɛ yɛlɛ kosɛbɛ.

³Ne y'u seere ye ko a diyara u ye, u ye dili kɛ n'u seko ye, ani fɔɔ ka tɛmɛ u seko yɛrɛ kan.

⁴U y'an dali kosɛbɛ ko an ka sira d'u ma fana u ka se k'u niyɔrɔ ta Ala ka jama dɛmɛko la o min bɛ Zude mara la.

⁵U kɔnna k'u yɛrɛ di Matigi ma, ka mɛnni kɛ an fana fɛ ka kɛnyɛ ni Ala sago ye, fɔɔ u sera ka koo kɛ an yɛrɛ ka miiriya tun ma se o min ma.

⁶O cogo la fana, an ye Titi dali ko a y'o baaranyuman min daminɛ aw cɛma, a ka taa nya k'o laban.

⁷Aw ka nyi: jigi b'aw fɛ, aw fana bɛ se kuma na, aw bɛ koo lɔn, aw fana jijanin lo kosɛbɛ, ani an koo ka d'aw ye. O cogo la, anw b'a fɛ aw k'aw ka sɔnnyuman yira dɛmɛko nin na.

⁸A ma kɛ ko ne b'a fɔ aw ye ko wajibi lo aw k'a kɛ o cogo la dɛ, nga ne b'aw tɔnyɔgɔnw ka jijali koo fɔ aw nyana, janko aw ka se k'a yira ko kanuya b'aw fɛ tinyɛ na.

⁹Bari aw b'an Matigi Yezu Krista ka makari lɔn, ale min tun ye fɛntigi ye, a y'a yɛrɛ kɛ faantan ye aw kɔsɔn, waasa aw ka se ka kɛ fɛntigiw ye.

¹⁰Nin ye ne ka miiriya ye o koo la, a fana bɛ bɛn aw ma, kabini salon, aw minw kɛra fɔlɔ ye k'o koo ;naniya ta, o dama tɛ, aw y'aw bolo don o baara la fana.

¹¹Sisan aw ye taa nya k'o baara nin laban. Aw y'o ;naniya ni timinadiya min ye, aw ye taa nya k'a laban k'o kɛ ni seko damayira ye.

¹²Bari see min b'i ye, n'i y'i yɛrɛ di ka sɔnni kɛ ka kɛnyɛ n'o ye, o le ka nyi. Ni fɛɛn t'i bolo, baasi tɛ.

¹³A ma kɛ ko an b'a fɛ aw k'aw tɔnyɔgɔnw dɛmɛ, ka tila ka nimisa dɛ, nga an b'a fɛ aw bɛɛ ka kɛ kelen ye.

¹⁴O la, aw ye sɔrɔli caaman min kɛ, aw k'o kɛ ka dɛsɛbagatɔw dɛmɛ. N'aw nana dɛsɛ loon dɔ la, olu fana ka se k'aw dɛmɛ n'u ta ye, o cogo la aw bɛɛ ka koo bɛ kɛ kelen ye,

¹⁵i n'a fɔ a fɔra Ala ka kuma na cogo min na ko: “Mɔgɔ min ye sɔrɔli kɛ kosɛbɛ, ale ta ma tɛmɛ a daan kan, mɔgɔ min ye dɔɔni sɔrɔ, ale fana ta ma dɛsɛ.”

¹⁶An bɛ Ala tando bari a y'aw koo diya Titi ye i n'a fɔ anw.

¹⁷Bari a sɔnna an ka dalikan ma. A diyara a ye kosɛbɛ, a sɔnna ka taa aw fɛ tugu.

¹⁸An balimacɛ min tɔgɔ bɔra Ala ka jama cɛma kibaru diman fɔli baara kɔsɔn, an y'ale fara Titi kan k'u ci aw fɛ.

¹⁹Ala ka jama dɔw y'a woloma k'a fara an kan, a ka kɛ an taamanyɔgɔn ye nin baaranyuman na, an b'o min kɛra Matigi tɔgɔ bonya kama, ani an ka dusunyuman kɔsɔn.

²⁰An b'o kɛ janko an kana tɔgɔcɛn sɔrɔ baaranyuman nin kɛli la o min ye bolomafara ye.

²¹An t'a fɛ ka tilenninya kɛ Matigi dama nyakɔrɔ, an b'a fɛ k'a kɛ mɔgɔw nyakɔrɔ fana.

²²Mɔgɔ minw wolomana ka ci aw ma, an y'an balimacɛ nin fana fara u kan, an y'ale min lɔn mɔgɔ timinadiyanin ye baara caaman seen fɛ. A fana y'o yira an na sisan tugu, bari a y'a jigi la aw kan kosɛbɛ.

²³Titi kɔni, ale kɛra ne ka taamanyɔgɔn ye ni n ka baarakɛnyɔgɔn ye aw cɛma. An balima minw bɛ n'a ye, olu ye Ala ka jama ka cidenw ye, minw kɛra Krista ka bonyafɛnw ye.

²⁴Aw k'olu minɛ ka nya ni kanuya ye, janko Ala ka jama bɛɛ k'o ye k'a lɔn ko tinyɛ b'an fɛ n'an y'an yɛrɛ bonya aw koo la.