Read LAYIDUKURA KORƐNTIKAW FILANAN 9 Bible Online

KORƐNTIKAW FILANAN 9 - LAYIDUKURA bible

KORƐNTIKAW FILANAN 9

¹Min ye bolomafara ka koo ye, min bɛ kɛra Ala ka jama kɔsɔn, kuun t'a la ne ka bataki ci aw ma o koo la.

²Ne b'a lɔn ko aw sɔnnin lo, o le y'a to ne ye n yɛrɛ bonya aw koo la Ala ka mɔgɔw cɛma. Olu minw bɛ Maseduwani mara la. Ne y'a fɔ u ye ko aw Akayikaw ka bolomafara labɛnna ka ban kabini salon. O cogo la, aw ka jijali y'a kɛ Ala ka jama caaman banbana.

³Ne y'an balima nunu ci aw fɛ, janko an b'an yɛrɛ bonya aw koo la koo minw na, o kana kɛ gwansan ye, ani aw labɛnnin ka sɔrɔ i n'a fɔ ne tun y'a fɔ cogo min na.

⁴Ne bɛ siran ni Maseduwanika dɔw taara ni ne ye aw fɛ, u kana ta'a sɔrɔ n'aw labɛnnin tɛ, o bɛna kɛ maloya ye an fɛ, n t'a fɛ k'aw ta fɔ.

⁵Ne y'a ye ko a ka fisa ne k'an balima nunu dali u bɛ taa an nya aw fɛ. Aw ye bolomafara min layidu ta, aw k'o labɛn an nyafɛ, janko a kana kɛ i n'a fɔ jagoyako, nga diyanako.

⁶Aw k'a lɔn ko ni mɔgɔ min ye danni kɛ dɔɔni dɔrɔn, o tigi bɛna suman dɔɔni le sɔrɔ. Ni min ye danni kɛ caaman, ale bɛ suman caaman sɔrɔ fana.

⁷Mɔgɔ kelen kelen bɛɛ ka dili kɛ a yɛrɛ sago la, u kan'a kɛ ni nisɔngoya ye, a kana kɛ jagoyako ye, bari mɔgɔ min bɛ sɔnni kɛ ni nisɔndiya ye, o tigi koo le ka di Ala ye.

⁸See bɛ Ala ye ka fɛɛn bɛɛ d'aw ma aw mako bɛ fɛɛn minw na, n'aw y'olu sɔrɔ, aw ka se ka jija ka baaranyuman sifa bɛɛ kɛ tuma bɛɛ,

⁹i n'a fɔ a fɔra Ala ka kuma na ko: “A y'a ka fɛɛn caaman tilan faantanw cɛ, a ka nyumanya tɛ ban abada.”

¹⁰Ala min bɛ sumansi di sɛnɛkɛla ma, ale min bɛ dumuni di, ale kelen le bɛna aw sɔn fana k'a caya, ani k'aw ka baaranyuman nin sabati.

¹¹Ale le bɛna aw kɛ fɛntigiw ye tuma bɛɛ, o min sababu la, an bɛna se ka nyumanya kɛ, mɔgɔ caaman ka barika la Ala ye aw ka bolomafara barika la.

¹²Bari aw bɛ baara min kɛ, o tɛ dan Ala ka mɔgɔw ka makonya dama ma, o fana bɛ kɛ sababu ye mɔgɔ caaman bɛ barika la Ala ye.

¹³N'u y'aw ka dɛmɛ nin ye tuma min na, u bɛn'a lɔn ko aw ye mɔgɔ sifa min ye, o la, u bɛna Ala tando aw koo la, bari aw sɔnna Krista ka kibaru diman ma ka mɛnni kɛ a fɛ, ani aw ka timinadiya kɔsɔn, aw sɔnna ka olu dɛmɛ ani tɔ nunu bɛɛ.

¹⁴Olu fana bɛna Ala dali aw ye, ani k'u ka kanuya yira aw la, Ala ye nɛɛma min kɛ aw ye, o kɔsɔn.

¹⁵An bɛ Ala tando a ka nɛɛma kɔsɔn o min nyɔgɔn tɛ.