Read LAYIDUKURA GALATIKAW 1 Bible Online

GALATIKAW 1 - LAYIDUKURA bible

GALATIKAW 1

¹Ne Pɔli min ye ciden ye, o ma kɛ mɔgɔw sababu la, walima adamaden dɔ barika la, nga o ye Yezu Krista sago ye n'a Faa Ala min y'a kunun a sanin kɔ.

²Ne n'an balima minw bɛɛ bɛ yan, an le bɛ bataki nin ci Ala ka jama ma minw bɛ Galati mara la.

³An Faa Ala n'an Matigi Yezu Krista ka nɛɛma ni hɛrɛ kɛ aw ye.

⁴Ale Krista min y'a yɛrɛ nii di k'an kunmabɔ an ka kojugu la, waasa k'an tilan ka bɔ bii dinyɛ juguman nin bolo, ka kɛnyɛ n'an Faa Ala sago ye.

⁵Bonya ka la ale kan waati bɛɛ la. Amiina.

⁶Ala min y'aw wele Krista barika la, aw banna ale la joona joona, ka tugu kibaru diman wɛrɛ kɔ, o ye ne kabakoya kosɛbɛ.

⁷Tinyɛ lo, kibaru diman wɛrɛ tɛ yen, nga mɔgɔ dɔw bɛ sɔrɔ aw cɛma minw b'aw nyagami. U b'a fɛ ka Krista ka kibaru diman koo yɛlɛma.

⁸Ni mɔgɔ dɔ, hali anw yɛrɛ, walima Ala ka mɛlɛkɛ dɔ, ye kibaru diman wɛrɛ fɔ aw ye, o min bɛ danna an ka fɔlɔta la, o tigi danganin lo.

⁹An tun y'o fɔ ka kɔrɔ, ne fana b'a fɔ tugu ko ni mɔgɔ dɔ ye kibaru diman wɛrɛ fɔ aw ye, n'o ma kɛ kelen ye n'an ka fɔlɔta ye aw tun sɔnna o min ma, o tigi danganin lo.

¹⁰O tuma na, sisan a fɔra ko ne b'a fɛ ne koo ka diya mɔgɔ ye wa, walima Ala ye? Walima ne b'a fɛ ka mɔgɔ diyanako le kɛ? Ni ne tun b'a fɛ k'o kɛ, ne tun tɛna kɛ Krista ka baarakɛla ye.

¹¹N balimaw, ne b'a fɛ aw k'a lɔn ko ne ye kibaru diman min fɔ aw ye, o ma bɔ adamaden na.

¹²Ne m'o sɔrɔ mɔgɔ si fɛ, mɔgɔ si fana ma ne kalan o la, nga Yezu Krista yɛrɛ le y'o koo yira ne la.

¹³Ne tun bɛ cogo min na fɔlɔfɔlɔ, Zuwifu ka Alasira taama na, aw y'o mɛn cɔ! Ne tun bɛ Ala ka jama tɔɔrɔ kosɛbɛ. Hali ne tun b'a fɛ a koo ka dabila pewu.

¹⁴Zuwifuw ka Alasira taamako faan fɛ, ne fana tun tɛmɛna ne tɔnyɔgɔn caaman kan, bari ne jijanin tun bɛ ne faaw ka landakow la kosɛbɛ.

¹⁵Kabini ne ma wolo fɔlɔ, Ala ye ne woloma ka bila, a diyara ale ye ka ne wele fana a ka nɛɛma barika la,

¹⁶a y'a Dencɛ yira ne la, waasa ne k'a koo fɔ siya wɛrɛw ye. O la, o yɔrɔnin bɛ, ne ma adamaden ka ladili kɔnɔ.

¹⁷Ne fana ma taa Zeruzalɛmu, ka ciden fɔlɔw ye. Ne ye sira minɛ ka taa Arabi jamana na fɔlɔ, o kɔ, ne segira ka na Damasi tugu.

¹⁸O kɔ, saan saba tɛmɛna ne ka sɔrɔ ka taa Zeruzalɛmu, waasa n ka se ka Piyɛri[1] lɔn. Ne ye tile tan ni duuru dama kɛ n'a ye.

¹⁹Ni ale tɛ, ne ma ciden wɛrɛ ye tugu, n'a ma kɛ Matigi dɔgɔcɛ Zaki dama ye.

²⁰Ne bɛ koo minw bɛɛ fɔra aw ye, Ala b'a lɔn ko ne tɛ galon tigɛra.

²¹O kɔ, ne tɛmɛna ka taa Siri ni Silisi jamana na.

²²Krista kɔmɔgɔ minw tun bɛ Zude mara la, olu tun tɛ ne lɔn.

²³U tun y'a mɛn dɔrɔn ko mɔgɔ min tun bɛ olu tɔɔrɔla fɔlɔfɔlɔ n'a tun b'a fɛ o koo ka dabila pewu, ko ale fana b'o koo fɔra sisan.

²⁴O cogo la, u tun bɛ Ala tando ne koo la.