Read LAYIDUKURA GALATIKAW 6 Bible Online

GALATIKAW 6 - LAYIDUKURA bible

GALATIKAW 6

¹N balimaw, ni mɔgɔ minɛna kojugu dɔ kɛyɔrɔ la, Nii Senuman bɛ aw minw fɛ, aw k'o tigi dɛmɛ ni dusunyuman ye a ka kɔsegi siranyuman kan tugu. Nga aw kelen kelen bɛɛ k'aw yɛrɛ kɔlɔsi, janko a nyɔgɔn kana aw sɔrɔ.

²Aw ka nyɔgɔn dɛmɛ ka nyɔgɔn ka doni ta. O cogo la, aw bɛna Krista ka sariya labato.

³Bari ni mɔgɔ dɔ bɛ miiri ko ale ka fisa, k'a sɔrɔ a tɛ foyi nya, a b'a yɛrɛ nigɛra le.

⁴Mɔgɔ kelen kelen bɛɛ k'a yɛrɛ ka koo sɛgɛsɛgɛ, n'i ye koo dɔ ye n'i bɛ se k'i yɛrɛ bonya o koo la, i k'i yɛrɛ bonya, o ka kɛ i yɛrɛ koo la, mɔgɔ si kan'a ta kɛnyɛ n'a tɔnyɔgɔn ta ye ka sɔrɔ k'a yɛrɛ bonya.

⁵Bari mɔgɔ kelen kelen bɛɛ bɛna lɔ n'a ka kunko ye.

⁶Ni mɔgɔ dɔ b'i kalan Ala ka koo la, o tigi ka kan k'a niyɔrɔ sɔrɔ i bololafɛnw na.

⁷Aw kana aw yɛrɛ nigɛ. Mɔgɔ tɛ se ka yɛlɛ Ala ma. Mɔgɔ o mɔgɔ mana fɛɛn min dan, a bɛna o le tigɛ.

⁸Mɔgɔ min y'a ka koo bɛɛ kɛ farisogo koo ye, o tigi bɛna halaki. Nga min ta kɛra Nii Senuman ka koo ye, o tigi bɛna hɛrɛ banbali sɔrɔ.

⁹An kana sɛgɛn konyuman kɛli la, bari n'an ma dɛsɛ k'o dabila, an bɛn'a tɔnɔ sɔrɔ n'a waati sera tuma min na.

¹⁰O cogo la, ni konyuman kɛ see b'an ye tuma min na, an k'o kɛ mɔgɔ bɛɛ ye sankofɛrɛ Krista kɔmɔgɔw.

¹¹Aw k'a filɛ yan yɔrɔ sɛbɛnɔ ka bonbon cogo min na, ne yɛrɛ bolo le y'o sɛbɛn.

¹²Yɛrɛyirabagaw le b'a fɛ aw ka kɛnɛkɛnɛ wajibi. U ka koo bɛɛ kuun ye nin ye: waasa u kana tɔɔrɔ sɔrɔ Krista kɔsɔn.[6]

¹³Bari minw kɛnɛkɛnɛna, olu yɛrɛ tɛ sariya labato. Nga u b'a fɛ aw ka kɛnɛkɛnɛ janko u ka tɔgɔ sɔrɔ aw kɔsɔn.

¹⁴Ne yɛrɛ ta faan fɛ kɔni, ne bɛ ne yɛrɛ bonya an Matigi Yezu Krista ka saya koo le la lɔgɔ kan. Ne kɔni fɛ, Krista ka saya barika la, dinyɛ tɛ foyi ye ne fɛ, ani ne fana tɛ foyi ye dinyɛ fɛ.

¹⁵Kɛnɛkɛnɛko, walima kɛnɛkɛnɛbaliya, o si tɛ foyi ye. Min ye fɛɛn ye, o ye i ka kɛ danfɛnkura ye.

¹⁶Mɔgɔ minw bɛɛ b'o koo nin sira taama, Ala ka makari ni hɛrɛ kɛ olu ye, ani a ka mɔgɔw bɛɛ ye.

¹⁷Ayiwa, mɔgɔ si kana ne tɔɔrɔ tugu, bari jolinɔ minw bɛ ne fari la, olu b'a yira ko ne ye Yezu ka baarakɛla ye.

¹⁸N balimaw, an Matigi Yezu Krista ka nɛɛma kɛ aw ye. Amiina.