Read LAYIDUKURA EFƐZIKAW 1 Bible Online

EFƐZIKAW 1 - LAYIDUKURA bible

EFƐZIKAW 1

¹Ne Pɔli min kɛra Yezu Krista ka ciden ye ka kɛnyɛ ni Ala sago ye, ne bɛ bataki nin ci Ala ka jama ma, min bɛ Efɛzi dugu kɔnɔ, aw minw kɛra mɔgɔsɛbɛw ye Yezu Krista ka jɛnnyɔgɔnya barika la.

²An Faa Ala, ni an Matigi Yezu Krista ka nɛɛma ni hɛrɛ kɛ aw ye.

³An ka barika la Ala ye, ale min ye an Matigi Yezu Krista Faa ye. A y'an dɛmɛ k'a ka yɔrɔ nyumanya bɛɛ kɛ an ye Krista barika la.

⁴Bari, ale Krista le barika la Ala y'an woloma kabini dinyɛ ma dan fɔlɔ, waasa an ka kɛ mɔgɔnyumanw ye a nyakɔrɔ, jalakiyɔrɔ tɛ minw na kanuya barika la.

⁵Ala tun kɔnna k'a latigɛ k'an kɛ a ka deenw ye Yezu Krista barika la, ka kɛnyɛ n'a yɛrɛ diyanako ye.

⁶An ka Ala tando a ka nɛɛma kɔsɔn a y'o min kɛ an ye, a Deen kanunin barika la.

⁷Ale Krista ka saya barika la an kunmabɔra, an ka kojugu yafara ka kɛnyɛ ni Ala ka makari dafanin ye.

⁸Ala y'o kɛ an ye fɔɔ ka nya ka lɔnniyadafanin ani hakilitigiya d'an ma.

⁹A tun y'o koo dogonin latigɛ kabini fɔlɔfɔlɔ, sisan a y'o yira an na. A tun y'o konyuman nin latigɛ ka kɛ Krista barika la.

¹⁰A y'a latigɛ n'o koo kɛwaati sera tuma min na, a ka fɛɛn bɛɛ lajɛn minw bɛ sankolo la ani minw bɛ dugukolo kan, Krista ka kɛ u bɛɛ kuntigi ye.

¹¹Ale Krista barika la, anw ye niyɔrɔ sɔrɔ a fɛ. Ala y'o latigɛ kabini fɔlɔfɔlɔ la. Ale bɛ koo bɛɛ kɛ ka kɛnyɛ n'a yɛrɛ sago ye. A y'an woloma,

¹²an minw kɔnna k'an jigi la Krista kan, waasa an k'a tando.

¹³Aw ye tinyɛkuma nin mɛn tuma min na, o min ye kibaru diman ye, aw fana lar'a la ka kisi o barika la, ka Nii Senuman sɔrɔ, o min ye taamasinyɛ ye an kan, Ala tun y'o min layidu ta.

¹⁴Ale le b'a yira an na ko an bɛna niyɔrɔ sɔrɔ Ala fɛ n'an kunmabɔra pewu pewu loon min na, janko Ala ka tando!

¹⁵O le y'a to, kabini ne y'a mɛn ko aw jigi lanin bɛ Matigi Yezu kan ani ko aw bɛ Ala ka mɔgɔw bɛɛ kanu,

¹⁶ne ka Ala daliwaatiw la, ne bɛ to k'a dali aw ye ka barika la a ye tuma bɛɛ aw kɔsɔn.

¹⁷An Matigi Yezu Krista ka Ala, min ye Nɔɔrɔtigi ye, n b'ale dali a ka Nii Senuman di aw ma, o min bɛna lɔnniya di aw ma, k'a ka koo gwɛ aw ye aw ka se k'o lɔn kosɛbɛ,

¹⁸ani k'aw hakili yɛlɛ, aw welela fɛɛn min kama, aw ka se k'o faamu. A ye fɛnnyuman min labɛn a ka mɔgɔw ye, aw k'o nafa lɔn,

¹⁹k'a ka sebagaya kabakoman fana lɔn an faan fɛ, an minw jigi b'a kan. O sebagaya kelen nin barika la

²⁰a ye Krista kunun, ani ka sigiyɔrɔ d'a ma arijana na a kinibolo la.

²¹A siginin bɛ fangatigi yebaliw ni kuntigiw ani setigiw ni masaw bɛɛ kunna, ani fɛɛn wɛrɛw minw tɔgɔ bɛ se ka wele bii ani sini, a b'u bɛɛ kunna.

²²Ala y'a sigi fɛɛn bɛɛ kunna, ani a ka jama kunna,

²³o min ye ale Krista farisogo ye, Krista yɛrɛ dafanin bɛ sɔrɔ o min na, ani fɛɛn bɛɛ y'a ta ye.[1]