Read LAYIDUKURA EFƐZIKAW 2 Bible Online

EFƐZIKAW 2 - LAYIDUKURA bible

EFƐZIKAW 2

¹Aw minw tun bɛ i n'a fɔ suuw Ala fɛ aw ka murutili n'aw ka kojuguw kɔsɔn,

²aw tun b'o minw kɛ fɔlɔfɔlɔ, ka kɛnyɛ ni adamaden cogo, ani jinaw kuntigi min bɛ sanfɛ ta ye fana, o min bɛ baara kɛ ni mɔgɔmurutininw ye halibi.

³An fana, an bɛɛ tun kɛra i n'a fɔ olu, an tun b'an ta farisogo nigɛlakow fɛ, k'a sago kɛ, ani k'an yɛrɛ ka miiriya kɛ. Ka kɛnyɛ n'an cogo ye, Ala tun bɛ dimi an kɔrɔ i n'a fɔ tɔw fana.

⁴Nga Ala ka nyumanya tɛ ban, an koo diyara a ye kosɛbɛ.

⁵O la, an minw tun bɛ i n'a fɔ suuw Ala fɛ an ka kojuguw kɔsɔn, Ala y'an kunun ni Krista ye. (Aw kisira nɛɛma le barika la.)

⁶Ala y'an kunun ni Krista ye, k'an kɛ mɔgɔ nyanamanw ye k'an kɛ kuntigiw ye ni Yezu Krista ye a ka mara la.

⁷O cogo la, a tun y'a latigɛ k'a ka nɛɛma dafanin kɛ waati nataw la an faan fɛ, o min nyɔgɔn tɛ, a ka nyumanya kɔsɔn Yezu Krista barika la.

⁸Aw lar'a la minkɛ, o le y'a to aw kisira nɛɛma barika la, o tɛ aw yɛrɛ ka seko ye, o ye Ala ka dɛmɛli ye.

⁹O ma kɛ aw ka kɛwali sababu la, janko mɔgɔ si kana se k'a yɛrɛ bonya.

¹⁰An ye Ala bolonɔ ye, a y'an dan Yezu Krista barika la kɛwalinyumanw kama, Ala y'o minw latigɛ kabini fɔlɔfɔlɔ janko an k'o kɛ.

¹¹Aw ma kɛ Zuwifuw ye. Zuwifuw b'aw wele ko kɛnɛkɛnɛbaliw, k'u yɛrɛ wele ko kɛnɛkɛnɛninw, k'a sɔrɔ u ka kɛnɛkɛnɛko kɛra adamaden bolonɔ ye. Aw tun bɛ cogo min na fɔlɔ la, aw k'aw hakili jigi o la.

¹²O waati la, aw tun ma Krista lɔn, niyɔrɔ tun tɛ aw fɛ Isirayɛlidenw cɛma. Ala tun y'a daa di bɛɛn min koo la, aw niin tun t'o la. Aw tun bɛ yen ten, jigi layɔrɔ tun t'aw fɛ, aw tun tɛ Ala lɔn fana.

¹³Aw yɔrɔ tun ka jan Ala la, nga sisan, aw gwɛrɛla a la Yezu Krista kɔsɔn a joli barika la.

¹⁴Bari ale le y'an ka hɛrɛ ye, ale min ye Zuwifuw ni siya tɔw jɛn k'u kɛ kelen ye, ani nyɔgɔnkɔniya min tun kɛra kogo ye u cɛ, a y'a yɛrɛ di k'o ci.

¹⁵A y'a kɛ sariya n'a ka ladiliw bɔra seen kan. O cogo la, a y'a latigɛ ka Zuwifuw ni siya wɛrɛw jɛn k'u kɛ kelen ye a ka jɛnnyɔgɔnya barika la, ka hɛrɛ don u ni nyɔgɔn cɛ,

¹⁶k'u fila bɛɛ jɛn ka kɛ kelen ye, k'u bɛn ni Ala ye, a ka saya sababu la lɔgɔ kan. O yɔrɔ la, a ye see sɔrɔ nyɔgɔnkɔniya kan k'o ban.

¹⁷A nana hɛrɛkuma fɔ aw yɔrɔjan mɔgɔw, ani yɔrɔsurun mɔgɔw ye.

¹⁸Ale sababu la an kelen kelen bɛɛ bɛ se ka se an Faa Ala fɛ, Nii Senuman kelen barika la.

¹⁹O cogo la, aw tɛ lonanw ye tugu, walima jamana wɛrɛ mɔgɔw, nga aw ye Ala ka mara mɔgɔw le ye, Ala ka somɔgɔw.

²⁰Kiraw ni cidenw ye soo juu min sigi, ni Yezu Krista le y'o juu nin kabakuru nyanaman ye, aw lɔra o le kan i n'a fɔ boon.

²¹Ale Yezu Krista barika la kogo tɔɔ bɛ lɔ ka nya, ani ka kɛ Matigi Ala ka soo ye.

²²Ale sababu la, aw fana ni tɔw sera ka lɔ ka kɛ Ala ka boon ye Nii Senuman barika la.