Read LAYIDUKURA EFƐZIKAW 4 Bible Online

EFƐZIKAW 4 - LAYIDUKURA bible

EFƐZIKAW 4

¹Ne b'aw dali, ne min bɛ kaso la Matigi kɔsɔn, ko aw k'aw taamacogo bɛn n'aw ka welekun ye,

²k'aw yɛrɛ majigi koo bɛɛ la ka kɛ mɔgɔsabalininw ye, ka munyuli kɛ, ka nyɔgɔn dɛmɛdɛmɛ kanuya la.

³Bɛɛn min bɛ sɔrɔ Nii Senuman fɛ, aw ka banba ka to o la hɛrɛ kɔsɔn.

⁴Farisogo kelen ni Nii kelen le bɛ yen, i n'a fɔ aw welela jigi kelen kama cogo min na.

⁵Matigi kelen le bɛ yen, jigi kelen fana le bɛ yen, ani batizeli kelen le bɛ yen.

⁶Ala kelen fana le bɛ yen, ale lo ye bɛɛ Faa ye, a bɛ fɛɛn bɛɛ kunna, a bɛ baara kɛ bɛɛ kɔnɔ, ani a bɛ ni bɛɛ ye.

⁷Nga a ye nɛɛma kɛ an kelen kelen bɛɛ ye ka kɛnyɛ ni seko ye Krista ye min d'an ma.

⁸A fɔra Ala ka kuma na ko: “A yɛlɛla sanfɛ, k'a juguw minɛ k'u kɛ jɔɔnw ye, ani ka bonyafɛn di mɔgɔw ma.”

⁹N'a fɔra ko a yɛlɛla, o kɔrɔ ko a tun jigira fɔɔ dugukolo jukɔrɔ.[3]

¹⁰Ale min jigira, ale kelen le yɛlɛla ka taa fɔɔ sankolo daan na, janko a ka koo ka se ka koo bɛɛ dafa.

¹¹Ale Krista kelen le ye mɔgɔw bonya ka seko d'u ma, dɔw ka kɛ cidenw ye, dɔw ka kɛ kiraw ye, dɔw ka kɛ a ka kibaru diman fɔbagaw ye, dɔw fana ka kɛ Ala ka sagaw kɔlɔsibagaw ni karamɔgɔw ye.

¹²A y'o kɛ waasa k'a ka mɔgɔw labɛn u ka se ka baara kɛ, janko u ka barika sɔrɔ.[4]

¹³O cogo la, an bɛɛ bɛ se ka jɛn ka kɛ kelen ye an jigi barika la ani Ala Dencɛ lɔnniya barika la, ka kɛ mɔgɔkɔrɔbaw ye, ka kɔgɔ fɔɔ ka kɛ mɔgɔdafaninw ye i n'a fɔ Krista.

¹⁴O la, aw tɛna kɛ i n'a fɔ denmisɛnw tugu, minw tɛ se ka lɔ kelen kan, kalanjugu sifa bɛɛ ni nanbaran bɛ se k'o minw hakili yɛlɛma k'u kunna cɛn, i n'a fɔ kurundennin bɛ cogo min na jii kan.

¹⁵Nga n'an bɛ tinyɛ fɔ kanuya la, an bɛna se ka taa nya fɔɔ ka se ka jɛn ni Krista ye kosɛbɛ, ale min ye Kuntigi ye.

¹⁶Ale barika la farikolo yɔrɔ bɛɛ bɛ nyɔgɔn minɛ ka nya, ka kɛ kelen ye. Bɛɛ n'a ka baara, o cogo la a farisogo bɛɛ lajɛnnin bɛ bonya ka barika sɔrɔ kanuya la.

¹⁷Ne bɛ min fɔ aw ye k'a gwɛlɛya Matigi barika la, o ye nin ye: ko aw kana taama i n'a fɔ Alalɔnbaliw bɛ taama cogo min na u ka miiriya fufafu fɛ.

¹⁸U bɛ dibi la, Ala bɛ hɛrɛ min kɛ, u tɛ o lɔn u ka faamubaliya n'u ka dusugwɛlɛya kɔsɔn.

¹⁹Maloya yɔrɔ ka jan u la, fɔɔ u y'u yɛrɛ bila kakalaya sifa bɛɛ la, u tɛ wasa.

²⁰Nga aw ma Krista ka koo lɔn o cogo la dɛ.

²¹Aw kɔni y'a koo mɛn, aw kalanna o la ka kɛnyɛ n'a ka tinyɛ ye.

²²O la, aw k'aw jogokɔrɔ bila, o min tun ye juguya ni nigɛjuguw ye, olu sababu la, aw tun bɛ fili.

²³Aw ka kan k'aw ka miiriya yɛlɛma,

²⁴ka jogokura ta, ka kɛ Ala jaa ye, ka kɛ mɔgɔtilenninw ni mɔgɔnyumanw ye, o minw bɛ sɔrɔ Ala ka tinyɛ barika la.

²⁵O kama, aw ka galontigɛ dabila! Mɔgɔ kelen kelen bɛɛ ka tinyɛ fɔ nyɔgɔn ye, bari an kɛra farisogo kelen ye.

²⁶N'aw dimina, aw kana kojugu kɛ, aw kana dimi mara fɔɔ ka tilekun don.

²⁷Aw kana donyɔrɔ di Sutana ma.

²⁸Mɔgɔ min bɛ sonyali kɛ, o tigi kana sonyali kɛ tugu, nga o tigi ka baara kɛ ka nya, janko a ka se ka sɔrɔli kɛ ka dɔ di dɛsɛbagatɔw ma.

²⁹Kumajugu kana bɔ aw si daa la, fɔɔ kumanyuman, min bɛ se k'o mɛnbagaw dɛmɛ ani k'u mako nya cogo dɔ la.

³⁰Aw kana Ala ka Nii Senuman dusu kasi, ale min ye taamasinyɛ ye aw kan k'an ka kisilon kɔnɔ.

³¹Aw ka kɔnɔnajuguya dabila, aw kana dimi mara, aw dusu kana bɔ. Aw ka mankan caaman dabila, ka tɔgɔcɛn dabila, ani juguya sifa bɛɛ.

³²Aw ye hinɛ nyɔgɔn na ka konyuman kɛ nyɔgɔnw ye, ka yafa nyɔgɔn ma i n'a fɔ Ala fana yafara aw ma cogo min na Krista barika la.