Read LAYIDUKURA EFƐZIKAW 6 Bible Online

EFƐZIKAW 6 - LAYIDUKURA bible

EFƐZIKAW 6

¹Matigi nyasiran kɔsɔn denmisɛnw, aw k'aw wolobagaw bonya, o le ka nyi.

²“I k'i faa n'i baa bonya,” (o le ye sariya fɔlɔ ye layidu tara ka la o min kan),

³“janko i ka se ka hɛrɛ ni sijan sɔrɔ dugukolo kan.”

⁴Wolobagaw, aw fana, aw kana fariya aw ka deenw ma fɔɔ u bɛ muruti, nga aw k'u kolo k'u ladi, ani k'u kalan ka kɛnyɛ ni Matigi sago ye.

⁵Jɔɔnw, aw k'aw ka kuntigiw bonya kosɛbɛ ni kɔnɔgwɛ ye, ka siran u nya i n'a fɔ aw b'a kɛ Krista ye cogo min na.

⁶Aw kana o kɛ u nyana dɔrɔn k'aw koo diya u ye, nga aw k'o kɛ i n'a fɔ Krista ka jɔɔnw, ka Ala sago kɛ sɛbɛ la.

⁷Aw ka baara kɛ u ye ni dusukunnyuman ye, i n'a fɔ aw bɛ Matigi ka baara kɛ cogo min na. Aw kan'a kɛ i n'a fɔ aw b'o kɛra mɔgɔ ye,

⁸bari aw b'a lɔn ko mɔgɔ kelen kelen bɛɛ bɛna u ka baaranyuman tɔnɔ sɔrɔ Matigi fɛ, jɔɔn fara hɔrɔnw kan.

⁹Kuntigiw, aw fana k'o koo nyɔgɔn kɛ u ye. Aw kana fariya u ma, bari aw b'a lɔn k'u ka Kuntigi n'aw fana ta ye kelen ye o min bɛ sankolo la, ani ale tɛ mɔgɔ woloma ka bɔ mɔgɔ la.

¹⁰Ayiwa, aw k'aw jija Matigi ka koo la a ka sebagaya dafanin barika la.

¹¹Aw ka Ala ka kɛlɛkɛminanw bɛɛ ta waasa aw ka se ka lɔ ka nya ka Sutana ka nanbaranw kunbɛn.

¹²Bari an tɛ kɛlɛ kɛ ni adamadenw ye, nga an bɛ kɛlɛ kɛ ni dinyɛjugu kuntigiw ye, ani sanfɛ fangatigiw ye, ni setigiw, ani jinaw ye.

¹³O la, aw ka Ala ka kɛlɛkɛminanw bɛɛ ta waasa ni lonjugu sera, aw ka se ka lɔ kelen kan fɔɔ ka se a laban ma.

¹⁴Aw ye jija ka tinyɛ kɛ aw ka cɛsirilan ye ani tilenninya ka kɛ aw ka kɛlɛkɛduloki ye.

¹⁵Aw ye jija ka kibaru diman fɔ, o min ye hɛrɛkuma ye, o ka kɛ i n'a fɔ aw ka sennasanbara.

¹⁶Jigi min b'aw fɛ, aw k'o kɛ i n'a fɔ kɛlɛden ka nigɛkunbɛnnan, ka se ka Sutana ka binyɛ tasumaman bɛɛ faga n'o ye.

¹⁷Aw k'aw ka kisili kɛ i n'a fɔ nigɛfugulan, k'ale biri, ani ka Nii Senuman ka murujan ta o min ye Ala ka kuma ye.

¹⁸Aw ka Ala dali kosɛbɛ tuma bɛɛ Nii Senuman barika la ni dalili sifa bɛɛ ye. Aw ye jija o la kosɛbɛ ka dalili kɛ Ala ka mɔgɔw bɛɛ ye.

¹⁹Aw ka Ala dali ne fana ye, waasa ni ne b'a fɛ ka kibaru diman[5] fɔ tuma min na, ne ka se ka jagwɛlɛya sɔrɔ k'a fɔ ka gwɛ,

²⁰o min kɔsɔn ne kɛra Krista ka lasigiden ye ni n bɛ kaso la. Aw ka Ala dali ne ye, waasa ne ka se k'a ka koo fɔ ni jagwɛlɛya ye i n'a fɔ ne ka kan k'a fɔ cogo min na.

²¹An balimacɛ Tisiki, ale min koo ka di ne ye kosɛbɛ, ani a kɛra Matigi ka baarakɛlasɛbɛ ye, ale bɛna ne ka koo kibaru bɛɛ fɔ aw ye, janko aw fana k'o faamu.

²²O le kɔsɔn, ne b'a ci aw fɛ, janko a k'an ka kibaruya fɔ aw ye, ani k'aw jigi tugu.

²³An Faa Ala n'an Matigi Yezu Krista ka hɛrɛ, ni kanuya ani jigi di an balimaw ma.

²⁴An Matigi Yezu Krista koo ka di mɔgɔ minw ye, n'u b'a kanu sɛbɛ sɛbɛ la, Ala ka nɛɛma kɛ olu bɛɛ ye.