Read LAYIDUKURA FILIPIKAW 2 Bible Online

FILIPIKAW 2 - LAYIDUKURA bible

FILIPIKAW 2

¹Ni jigitugu bɛ sɔrɔ Krista fɛ, ni jagwɛlɛya bɛ sɔrɔ a ka kanuya la, ni jɛnnyɔgɔnya bɛ aw ni Nii Senuman cɛ, ni nyumanya ni hinɛ bɛ sɔrɔ a la,

²aw k'aw ka miiriya kɛ kelen ye kanuya la, ani k'aw kɔnɔ kɛ kelen ye ka bɛn koo bɛɛ la, o la, ne ka nisɔndiya bɛ taa nya kosɛbɛ.

³Aw kana foyi kɛ ni kɔnɔnajuguya ye, ani yɛrɛbonya ye, nga aw k'aw yɛrɛ majigi k'aw tɔnyɔgɔn filɛ ko a ka fisa n'aw ye.

⁴Aw la, mɔgɔ si kana miiri a yɛrɛ koo la dɔrɔn, aw ka miiri aw tɔnyɔgɔn na fana.

⁵Sɔɔn min tun bɛ Yezu Krista la, o nyɔgɔn ka sɔrɔ aw fana na.

⁶Ale min ni Ala ye kelen ye, a ma sɔn k'o jati.

⁷Nga a sɔnna k'o bɛɛ to yen, ka na jɔɔn cogo ta, ka kɛ i n'a fɔ mɔgɔ, mɔgɔw y'a jati adamaden dama ye.

⁸A sɔnna k'a yɛrɛ majigi ka Ala sago kɛ fɔɔ ka taa se saya ma lɔgɔ yɛrɛ kan.

⁹O le y'a to, Ala ye bonya la a kan kosɛbɛ, tɔgɔ min ka fisa ni tɔgɔ bɛɛ ye, a y'o d'a ma,

¹⁰waasa fɛɛn minw bɛ sankolo kɔnɔ, ni dugukolo kan ani dugukolo jukɔrɔ, olu bɛɛ k'u kunbiri gwan ka Yezu bonya,

¹¹ani bɛɛ k'a fɔ ko Yezu ye Matigi ye, ka bonya la an Faa Ala tɔgɔ kan ten.

¹²Ne ka teriw, aw tun bɛ ne ka kuma labato ka ne to aw fɛ, halibi aw ka taa nya ka dɔ fara o kan, aw ka jija ka baara kɛ aw ka kisili kɔsɔn ni Ala nyasiran ye kosɛbɛ.

¹³Bari Ala ye konyuman min latigɛ, a bɛ aw dɛmɛna tuma bɛɛ k'o kɛli nigɛ don aw la k'a kɛ sebagaya di aw ma.

¹⁴Aw ka koo bɛɛ kɛ, ;nunu;nunu ni sɔsɔli kana sɔrɔ a si la,

¹⁵waasa aw ka kɛ mɔgɔ jalakibaliw ye, ni mɔgɔnyumanw, ani Ala deenw ye, juguya tɛ minw kɔnɔ fewu dinyɛ mɔgɔw cɛma, olu minw ka jugu ani u tilennin tɛ. Aw ka kɛ yeelen ye u cɛma i n'a fɔ lolow.

¹⁶U bɛ se ka kisi kuma min barika la, aw k'o fɔ u ye. N'o kɛra, o bɛna kɛ ne fɛ kunkɔrɔta ye Krista nalon na, o la, ne ye baara min kɛ ani ka sɛgɛn minw munyu, o tɛna kɛ fu ye.

¹⁷Aw ka baara kɛ Ala nyakɔrɔ, o min kɛra aw ka saraka ye aw y'o min bɔ aw ka jigi kɔsɔn. Hali ni ne joli ka kan ka fara o kan, o kɔrɔ ko hali ni ne sara ka fara o kan, ne bɛ nisɔndiya kosɛbɛ ni aw ye.

¹⁸O cogo la, aw fana ka nisɔndiya kosɛbɛ ni ne ye.

¹⁹N'a kɛra an Matigi Yezu sago ye, ne jigi b'a la ko ne bɛna Timote ci aw fɛ, waasa n'a kɔsegira ka na tuma min na, ne ka se ka nisɔndiya aw ka kibaruya kɔsɔn.

²⁰Ale kelen le bɛ hami aw koo la i n'a fɔ ne.

²¹Mɔgɔ tɔ nunu, olu bɛɛ bɛ miiri u yɛrɛ ka koo la dama, u tɛ miiri Yezu Krista ka koo la.

²²A y'a ka mɔgɔsɛbɛya yira cogo min na, aw b'o lɔn, a y'a yɛrɛ di ka baara kɛ ni ne ye, kibaru diman ka nyataga koo la, i n'a fɔ deen bɛ baara kɛ n'a faa ye cogo min na.

²³Ni ne nana nyaa ye ne ka koo la tuma min na, ne jigi b'a la k'ale ci aw fɛ,

²⁴ne jigi bɛ Matigi kan ko yan ni dɔɔni ne yɛrɛ fana bɛna na aw fɛ yen.

²⁵Ne y'a miiri ko a ka fisa ne ka n balimacɛ Epaforaditi ci aw fɛ, ale min kɛra ne tɔnyɔgɔn ye baara nin na ani bondori nin na. Aw tun y'a ci ka na ne dɛmɛ, o min kɛra konyuman ye ne ma.

²⁶A b'a fɛ ka aw bɛɛ ye teliya la, bari a hakili nyagaminin lo ko aw y'a ka bana koo mɛn.

²⁷Tinyɛ na, a tun banana kosɛbɛ fɔɔ a tun bɛ nyini ka sa, nga Ala makarila a la. A ma kɛ ko a makarila ale kelen dɔrɔn na dɛ, a makarila ne la fana, waasa dɔ kana fara ne ka dusukasi kan.

²⁸Ne kɔrɔtɔnin le b'a ci, waasa n'aw segira k'a ye, aw ka nisɔndiya, ani dɔ ka bɔ ne ka dusukasi la.

²⁹Aw k'a minɛ ni nisɔndiya ye balimaya la Matigi kɔsɔn, a daganin lo aw ka o mɔgɔ sugu nin nyɔgɔn minɛ ka nya,

³⁰bari a tun bɛ nyini ka sa Krista ka baara kɔsɔn, a m'a yɛrɛ nii jati fɛɛn ye, aw tun tɛ se ka dɛmɛ min nyɔgɔn kɛ ne ye, a ye o le kɛ ne ye.