Read LAYIDUKURA FILIPIKAW 3 Bible Online

FILIPIKAW 3 - LAYIDUKURA bible

FILIPIKAW 3

¹Ayiwa n balimaw, sisan kɔni aw ka nisɔndiya Matigi koo la. Ne ye koo minw fɔ aw ye, a man gwɛlɛ ne ma ka kɔsegi olu kan. O bɛ aw fana dɛmɛ kosɛbɛ.

²Aw k'aw yɛrɛ kɔlɔsi wulu nunu na, baarakolonkɛlaw, minw ka kɛnɛkɛnɛko ma kɛ sɛbɛ koo ye.

³Bari mɔgɔ minw ka kɛnɛkɛnɛli kɛra kosɛbɛ ye, o ye anw le ye, an minw bɛ Ala bato Nii Senuman barika la, k'an ka bonya sɔrɔ Yezu Krista barika la, an minw tɛ an jigi la farisogo kan.

⁴Ni mɔgɔ dɔ bɛ miiri ko ale bɛ se k'a jigi la a yɛrɛ kan, ne fana bɛ se k'a fɔ ko ne bɛ se k'o kɛ ka tɛmɛ o tigi kan, bari cogoya bɛɛ la, ne bɛ se ka n jigi la n yɛrɛ kan.

⁵Ne wolola, a tile seeginan loon, n kɛnɛkɛnɛna. Ne kɛra Isirayɛliden ye ka bɔ Bɛnzamɛn kɔmɔgɔw la. Ne kɛra Eburu ye, ne wolobagaw bɛɛ ye Eburuw ye. Ala ka sariya labatoli ta faan fɛ, ne kɛra Farizinyɛ ye.

⁶Ne jijanin tun bɛ Ala ka baara la fɔɔ ka kɛ Krista kɔmɔgɔw tɔɔrɔbaga ye. Ka taa tilenninya ta faan fɛ, ne ye sariya labato fɔɔ jalakiyɔrɔ tun tɛ ne la.

⁷O fɛɛn nunu bɛɛ tun kɛra tɔnɔ ye ne fɛ, nga sisan ne bɛ olu filɛ fɛɛn fu ye Krista kɔsɔn.

⁸Tinyɛ na, ne sera ka n Matigi Yezu Krista lɔn minkɛ, n'o ye koba ye, o le kama, ne b'o koo bɛɛ filɛ fu ye. Ale le kɔsɔn ne sɔnna ka fɛɛn bɛɛ ye k'o to yen. Ani ne bɛ fɛɛn bɛɛ filɛ i n'a fɔ nyamanyama, waasa ne ka kɛ Krista ta ye,

⁹ka jɛn n'a ye. A ma kɛ ko ne tilennin bɛ Ala nyakɔrɔ sariya labatoli kɔsɔn. Nga ne tilennin bɛ a nyakɔrɔ bari ne ye n jigi la Krista kan. O tilenninya nin bɛ sɔrɔ jigi barika la Ala fɛ.

¹⁰Ne bɛ min nyini, o ye nin ye: Ka Krista lɔn, ani k'a ka kununni sebagaya lɔn fana, ka tɔɔrɔ i n'a fɔ ale tɔɔrɔla cogo min na, ani a y'a nii di cogo min na, ne fana ka n nii di ten ka sa,

¹¹waasa ne fana ka se ka kunun.

¹²A ma kɛ ko ne sera koo bɛɛ daan na ka sara sɔrɔ, ka kɛ mɔgɔ dafanin ye dɛ, nga ne bɛ n jija ka taa nya, waasa ne ka se ka kɛ mɔgɔ dafanin ye, bari o le kama Yezu Krista ye ne wele.

¹³N balimaw, ne tɛ miiri ko ne kɛra mɔgɔ dafanin ye ka ban, nga ne bɛ fɛɛn kelen dama le kɛ: Ne tɛmɛna fɛɛn minw kan, ne bɛ ne hakili bɔ olu bɛɛ la, ka jija ka taa nyafɛ.

¹⁴O cogo la ne bɛ boli fɔɔ ka se boli daan na, waasa ne ka sini sara sɔrɔ Ala b'an wele o min kɔsɔn Yezu Krista barika la.

¹⁵An minw kɔgɔra Krista ka sira la, an bɛɛ ka kan ka miiri o cogo le la. N'a kɛra ko aw ka miiriya bɛ cogo wɛrɛ la fɛɛn dɔ koo la, Ala bɛna o gwɛya aw ye.

¹⁶Cogo o cogo, an ye koo minw kɛ fɔɔ ka na se sisan ma, an ka banba ka taa nya n'o koow ye.

¹⁷N balimaw, aw ka kɛ ne ladegebagaw ye, anw ye cogonyuman min yira aw la, aw ka tugu o kɔ i n'a fɔ tɔw.

¹⁸Ne ye nin fɔ ka ban aw ye sinyɛ caaman, ne bɛ kɔsegi k'a fɔ aw ye tugu ni nyaji ye, ko Krista ka saya kuun lɔgɔ kan, mɔgɔ caaman taamacogo ma bɛn o ma.

¹⁹Olu laban bɛna halaki. U kɔnɔbara le kɛra u ka Ala ye. Koo minw bɛ maloya lase u ma, o le kɛra u ka yɛrɛbonyako ye. U bɛ miiri koo minw na, o ye dinyɛ koo dama ye.

²⁰Nga an kɔni, an ka faso bɛ sankolo la. An kisibaga, Matigi Yezu Krista bɛna bɔ o yɔrɔ la ka na, an bɛ ale min nyanafilɛla.

²¹Ale lo bɛna an farikolo dɛsɛnin yɛlɛma, k'a kɛ farisogo ye nɔɔrɔ bɛ min kan i n'a fɔ ale ta nyɔgɔn. A bɛna o kɛ n'a ka sebagaya ye, o min barika la a bɛ see sɔrɔ fɛɛn bɛɛ kan.