Read LAYIDUKURA FILIPIKAW 4 Bible Online

FILIPIKAW 4 - LAYIDUKURA bible

FILIPIKAW 4

¹O le kɔsɔn n balimaw, ne bɛ aw minw kanu, ani ne b'a fɛ ka aw minw ye tugu, ne bɛ nisɔndiya aw minw kɔsɔn, ani aw minw kɛra ne ka jala ye, aw ka jija kosɛbɛ Matigi barika la, ne teriw.

²Ne bɛ Evɔdi ani Sɛtisi dali sɛbɛ la k'u ka bɛn i n'a fɔ balimamusow, Matigi kɔsɔn.

³E min kɛra ne baarakɛnyɔgɔnsɛbɛ ye, ne b'i dali ko i ka u dɛmɛ, bari olu ni ne sɛgɛnna nyɔgɔn fɛ kibaru diman baara la. Ani Kilema fana ani ne baarakɛnyɔgɔn tɔw bɛɛ, olu minw tɔgɔ sɛbɛnna Ala fɛ.

⁴Aw ka nisɔndiya tuma bɛɛ Matigi kɔsɔn. Halibele ne bɛ kɔsegi k'a fɔ aw ye ko aw ka nisɔndiya.

⁵Aw ka kɛ mɔgɔsabalininw ye tuma bɛɛ. Matigi natuma surunyana.

⁶Aw hakili kana nyagami koo si la, nga aw ye Ala dali ani ka barika la a ye, k'aw makoyako bɛɛ fɔ a ye.

⁷O cogo la, mɔgɔw tɛ Ala ka hɛrɛ min koo faamu, ale bɛna aw tanga hamikojugu ma, Yezu Krista barika la.

⁸O bɛɛ kɔ, n balimaw, koo minw kɛra tinyɛko ye, bonya bɛ sɔrɔ min na, ni tilenninya, ni koo gwɛnin, ni koo diman, ani kunkɔrɔtako, ni sɔnnyuman min bɛ na ni tɔgɔnyuman ye, o dama ka kɛ aw ka miiri ye.

⁹Aw ye koo minw dege ne ka kuma ni n ka kɛwaliw la, aw ka jija k'olu kɛ. O cogo la, hɛrɛtigi Ala bɛna to aw fɛ.

¹⁰Aw sera k'a yira ne la sisan ko aw bɛ janto ne koo la, o la, ne nisɔn diyara kosɛbɛ Matigi barika la. A ma kɛ ko ne b'o fɔra ko aw tun tɛ janto ne koo la dɛ, aw tun bɛ janto ne koo la, nga seko tun tɛ aw fɛ fɔlɔ.

¹¹A ma kɛ ko fɛɛn le tɛ ne fɛ, k'o le y'a to ne bɛ kumana ten dɛ. Ka ne to cogo o cogo, ne wasanin lo, bari ne y'o dege.

¹²Ne bɛ se ka n yɛrɛ minɛ dɛsɛ waati la, ani nɔgɔya waati la. Koo bɛɛ la ani cogo bɛɛ la, ne wasanin bɛ, dumu ka fa tuma na ani kɔngɔ tuma na. Fɛɛn bɛ n fɛ wo, fɛɛn tɛ n fɛ wo, n wasanin bɛ.

¹³Krista min bɛ see di ne ma, ale barika la ne bɛ se ka o koow bɛɛ kɛ.

¹⁴Nga, aw ye konyuman kɛ kosɛbɛ, aw y'aw niyɔrɔ ta ne ka sɛgɛn na ni dɛmɛli ye.

¹⁵Aw Filipikaw b'a lɔn kosɛbɛ ko kibaru diman fɔli daminɛwaati la, aw dama le ye ne dɛmɛ n ka baara kɔsɔn Krista kɔmɔgɔw cɛma n bɔtuma na Maseduwani mara la.

¹⁶Ka ne to Tesaloniki, aw ye ne mako nya, bari aw ye ne dɛmɛ sinyɛ caaman.

¹⁷A ma kɛ ko ne bɛ dɛmɛli le nyinina dɛ, ne b'a fɛ dɔ le ka fara aw ka kɛwalinyuman sara kan.

¹⁸Sisan ne makoyafɛn bɛɛ bɛ ne fɛ yɛrɛ fɔɔ a tɛmɛn'a daan kan. Tuma min na Epaforaditi nana aw ka dɛmɛ di ne ma, o tuma na o cayara ka tɛmɛ yɛrɛ, o min kɛra sarakanyuman ye Ala sɔnna o min na, a diyara a ye fana.

¹⁹Ne ka Ala bɛna aw mako nya, ka kɛnyɛ n'a ka fɛntigiya dafanin ye Yezu Krista barika la.

²⁰An Faa Ala tɔgɔ ka tando tuma bɛɛ. Amiina.

²¹Mɔgɔ minw lara Krista la, aw ka olu kelen kelen bɛɛ fo. An balima minw bɛ ni ne ye yan, olu bɛ aw fo fana.

²²Krista kɔmɔgɔw minw bɛ yan, olu bɛɛ b'aw fo, nga aw fobaga tigitigiw, o ye minw bɛ masacɛ ka soo kɔnɔ.

²³Matigi Yezu Krista k'a ka nɛɛma kɛ aw bɛɛ ye.