Read LAYIDUKURA TESALONIKAW FƆLƆ 1 Bible Online

TESALONIKAW FƆLƆ 1 - LAYIDUKURA bible

TESALONIKAW FƆLƆ 1

¹Ne Pɔli ni Silivɛn ani Timote bɛ bataki nin ci Ala ka jama ma, min bɛ Tesaloniki, aw minw jigi bɛ an Faa Ala, ani Matigi Yezu Krista kan, Ala ka nɛɛma ni hɛrɛ kɛ aw ye.

²An bɛ to ka barika la Ala ye tuma bɛɛ aw kɔsɔn, ani ka Ala dali aw ye an ka dalili tuma na.

³Aw lara Ala la ka jija ka baara kɛ a ye, baara gwɛlɛman, kanuya kɔsɔn cogo min na, ani aw bɛ munyuna siniko la cogo min na Matigi Yezu Krista kɔsɔn, an hakili b'o bɛɛ la an Faa Ala nyakɔrɔ.

⁴N balimaw, aw minw koo diyara Ala ye, an y'a lɔn ko a ye aw woloma.

⁵An bɛ kibaru diman min fɔra, an m'o fɔ aw ye i n'a fɔ kuma gwansan dama, nga an y'a fɔ ni Nii Senuman ka sebagaya ye. An ye fɛɛn minw kɛ aw ka nya kama, aw bɛ o lɔn.

⁶Aw kɔni, aw ye an cogo dege ni Matigi ta fana, aw sɔnna Ala ka kuma ma ni nisɔndiya ye o min ye Nii Senuman ta ye, k'aw to tɔɔrɔba cɛma.

⁷O cogo la, aw ka koo kɛra ladegeta ye Ala ka jama fɛ minw bɛ Maseduwani ni Girɛsi mara la.

⁸Ala ka koo bonyana aw fɛ fɔɔ o taara mɛn Maseduwani ni Girɛsi maraw la. O dama fana tɛ, aw jigi bɛ Ala kan cogo min na, o fana bɔra ka se yɔrɔ bɛɛ la, fɔɔ kuun t'a la an yɛrɛ ka kuma a koo la.

⁹Bari an tun sera aw fɛ tuma min na, aw y'an ladon cogo min na, ani ka josɔnko dabila cogo min na ka Ala kelen bato, mɔgɔ bɛɛ b'o fɔra.

¹⁰Aw y'o kɛ ka to ka Ala dencɛ Yezu kɔsegitɔ makɔnɔ, a y'ale min kunun a sanin kɔ. Yezu le b'an kunmabɔ Ala ka dimi nata ma.