Read LAYIDUKURA TESALONIKAW FƆLƆ 4 Bible Online

TESALONIKAW FƆLƆ 4 - LAYIDUKURA bible

TESALONIKAW FƆLƆ 4

¹Ayiwa n balimaw, aw ka kan ka taama cogo min na aw koo ka sɔrɔ ka diya Ala ye, an y'o yira aw la ka ban. Aw yɛrɛ b'o kɛra ka ban, nga an b'aw dali kosɛbɛ tugu an Matigi Yezu tɔgɔ la ko aw ka taa nya ka dɔ fara o kan.

²An y'aw ladi koo minw na Matigi Yezu barika la, aw bɛ olu lɔn.

³Ala bɛ min fɛ, o ye aw dusu saniyako ye, aw kana kakalaya kɛ.

⁴Aw kelen kelen bɛɛ ka to n'aw muso ye cogo bɛnnin na Ala nyakɔrɔ ani ka kɛ mɔgɔsɛbɛw ye.

⁵Aw kana aw yɛrɛ to nigɛjugu bolo i n'a fɔ Alalɔnbaliw b'a kɛ cogo min na.

⁶Mɔgɔ si kana a tɔnyɔgɔn nanbaran o koo la k'a hakɛ ta fana. Bari Matigi b'o koo sifa nunu juru sara, i n'a fɔ an delila k'a fɔ ka gwɛlɛya aw ye cogo min na.

⁷Bari Ala m'an wele kakalaya kama, nga a y'an wele ka kɛ mɔgɔnyumanw le ye.

⁸O le y'a to ni mɔgɔ min ma sɔn o ladili ma, o tigi ma ban mɔgɔ ka kuma na, nga a banna Ala la, min b'a ka Nii Senuman d'aw ma.

⁹Min ye nyɔgɔn kanuko ye, ka sɛbɛ ci aw ma o koo la, aw mako tɛ o la tugu, bari aw y'o dege ka ban Ala barika la.

¹⁰Aw b'o la aw balimaw faan fɛ, minw bɛ Maseduwani mara bɛɛ la. Nga an b'a nyini aw fɛ ko aw ka dɔ fara a kan tugu.

¹¹Aw ka jija ka hɛrɛ nyini, aw ka janto aw yɛrɛ ka koow la, ani ka baara kɛ aw yɛrɛ ma, i n'a fɔ an tun y'a nyini aw fɛ cogo min na,

¹²janko aw taamacogo ka bɛn mɔgɔ wɛrɛw cɛma waasa olu k'aw tɔgɔnyuman fɔ. O cogo la aw tɛna kɛ mɔgɔ si ka doni ye.

¹³N balimaw, mɔgɔ minw sara, an t'a fɛ aw ka to olu ka koo lɔnbaliya la, waasa aw dusu kana kasi i n'a fɔ mɔgɔ tɔw, jigi tɛ minw fɛ.

¹⁴N'an lanin b'a la tinyɛ na ko Yezu sara ka kunun, o cogo la mɔgɔ minw sara k'u jigi lanin to Yezu kan, Ala bɛna olu kunun fana u ka to ni Yezu ye.

¹⁵An bɛ min fɔ aw ye, an y'o sɔrɔ Matigi ka kuma na. An minw bɛna to sii la fɔɔ ka taa se Matigi ka kɔsegi ma, mɔgɔ minw lara Krista la n'u sara, an tɛna kɔn ka taa olu nya.

¹⁶Ni sira dira, mɛlɛkɛ kuntigi ka pɛrɛnkan fɛ ani Ala ka buru kaan fɛ, Matigi yɛrɛ bɛna bɔ sankolo la ka jigi, o tuma na mɔgɔ minw tun lara Krista la ka sɔrɔ ka sa, olu bɛ kunun fɔlɔ.

¹⁷O kɔ, an minw tora sii la, an bɛna kori ka kɔrɔ ta nyɔgɔn fɛ ni olu ye sankaba kan ka taa Matigi kunbɛn. O cogo la, an bɛna to n'a ye tuma bɛɛ.

¹⁸Aw ka to ka nyɔgɔn jigi tugu n'o kuma ye.