Read LAYIDUKURA TESALONIKAW FƆLƆ 5 Bible Online

TESALONIKAW FƆLƆ 5 - LAYIDUKURA bible

TESALONIKAW FƆLƆ 5

¹N balimaw, o koo nunu bɛna kɛ waati min na, aw mako t'a la an ka sɛbɛ ci aw ma o koo la.

²Aw yɛrɛ b'a lɔn kosɛbɛ ko Matigi bɛna na loon min na, o bɛna bali mɔgɔw la i n'a fɔ soon bɛ na sufɛ cogo min na.

³Tuma min na mɔgɔw bɛn'a fɔ ko hɛrɛ ni jigisigi bɛ yen, o tuma na, tɔɔrɔ bɛna ben u kan fɔɔ u tɛ se ka bɔyɔrɔ sɔrɔ, i n'a fɔ muso ka tiin bɛ cun a kan cogo min na.

⁴Nga n balimaw, aw ma kɛ Alalɔnbaliw ye minw bɛ to ka dibidibikow kɛ, n'o loon bɛ na bali aw la i n'a fɔ soon.

⁵Aw bɛɛ bɛ Ala lɔn, aw ka koo gwɛnin lo. An ma kɛ Alalɔnbaliw ni dibidibikokɛlaw ye.

⁶O la, an man kan ka sinɔgɔ i n'a fɔ mɔgɔ tɔ nunu. An k'an yɛrɛ kɔlɔsi an labɛnnin ka to nyana tuma bɛɛ,

⁷bari mɔgɔ bɛ sinɔgɔ sufɛ le, dɔrɔtɔw fana b'u ka dɔrɔtɔya kɛ sufɛ le.

⁸Nga an minw bɛ Ala lɔn, an k'an yɛrɛ labɛn, ka jigi ni kanuya kɛ i n'a fɔ kɛlɛdenw ka nigɛ duloki, k'o don an kaan na, ani k'an jigi la an ka kisili kan i n'a fɔ nigɛfugulan.

⁹Bari Ala m'a latigɛ ko a ka dimi ka se an ma, nga a y'a latigɛ ko an ka kisi an Matigi Yezu Krista barika la,

¹⁰ale min sara an kɔsɔn, janko k'an to sii la wo, walima an sara wo, an ka se ka to n'ale ye.

¹¹O le y'a to aw ka nyɔgɔn jigi tugu, ani ka nyɔgɔn dɛmɛ, i n'a fɔ aw b'a kɛra ka ban cogo min na.

¹²N balimaw, mɔgɔ minw b'aw nyafɛ Matigi ka sira la, n'u bɛ jija k'aw ladi, an b'aw dali ko aw ka olu jati kosɛbɛ.

¹³Aw k'u koo diya aw ye, k'u bonya kosɛbɛ, u ka baara kɔsɔn. Hɛrɛ ka to aw ni nyɔgɔn cɛ.

¹⁴An b'a nyini aw fɛ n balimaw, ko aw ka mɔgɔkolonw ladi, ka siranbagatɔw jaa gwɛlɛya, ka barikatanw dɛmɛ, ani ka munyu bɛɛ kɔrɔ.

¹⁵Aw k'aw yɛrɛ kɔlɔsi, aw la mɔgɔ si kana kojugu juru sara ni juguya ye, aw ka konyuman kɛ tuma bɛɛ nyɔgɔn ye ani tɔw ye.

¹⁶Aw ka nisɔndiya tuma bɛɛ.

¹⁷Aw kana Ala dali dabila.

¹⁸Koo bɛɛ la, aw ka barika la Ala ye, bari o le ye Ala sago ye aw faan fɛ, k'aw to Yezu Krista ka jɛnnyɔgɔnya la.

¹⁹Aw kana Nii Senuman ka baara bali.

²⁰Aw kana kiraya kuma lɔgɔbɔ.

²¹Nga aw ka koo bɛɛ sɛgɛsɛgɛ, koo minw ka nyi aw ka sɔn olu ma.

²²Aw k'aw yɛrɛ kɔlɔsi kojugu sifa bɛɛ kɛli ma.

²³Hɛrɛtigi Ala yɛrɛ k'aw kɛ mɔgɔnyumanw ye, juguya si kana sɔrɔ aw la, aw farisogo faan fɛ, n'aw dusukun, ani aw nii, a k'aw bɛɛ mara jalakiyɔrɔ kana sɔrɔ aw la an Matigi Yezu Krista ka nalon na.

²⁴Ala min y'aw wele, ale ye kantigi ye, ale lo bɛna o kɛ.

²⁵N balimaw, aw ka to ka Ala dali an ye.

²⁶Aw ka nyɔgɔn fo ni kɔnɔgwɛ ye.

²⁷Ne b'a nyini aw fɛ kosɛbɛ Matigi tɔgɔ la ko bataki nin ka kalan balimaw bɛɛ nyana.

²⁸An Matigi Yezu Krista ka nɛɛma kɛ aw ye.