Read LAYIDUKURA TESALONIKAW FILANAN 1 Bible Online

TESALONIKAW FILANAN 1 - LAYIDUKURA bible

TESALONIKAW FILANAN 1

¹Ne Pɔli ni Silivɛn, ani Timote bɛ bataki nin ci Ala ka jama ma Tesaloniki, aw minw ye an Faa Ala n'an Matigi Yezu Krista ta ye.

²An Faa Ala, n'an Matigi Yezu Krista ka nɛɛma ni hɛrɛ kɛ aw ye.

³N balimaw, an ka kan ka barika la Ala ye tuma bɛɛ aw koo la, o ka nyi. Bari aw jigi lanin lo Matigi kan kosɛbɛ ani kanuya min bɛ aw ni nyɔgɔn cɛ, o bɛ bonyana ka taa nya,

⁴fɔɔ an b'an yɛrɛ bonya Ala ka jama cɛma aw ka jijali, n'aw ka lanaya kɔsɔn, hali k'aw to nin tɔɔrɔ ni kɔrɔbɔli bɛɛ la o min b'aw kan.

⁵O ye Ala ka kiti tilennin taamasinyɛ ye, o kɛkun ye nin ye: Waasa k'aw kɛ mɔgɔw ye minw ka kan ni Ala ka masaya ye aw bɛ tɔɔrɔla o min kɔsɔn.

⁶A bɛnnin lo Ala k'aw tɔɔrɔbagaw tɔɔrɔ fana.

⁷O cogo la, aw minw bɛ tɔɔrɔ la, a ka hɛrɛ kɛ aw ye i n'a fɔ anw. O bɛna kɛ an Matigi yezu kɔsegituma na n'a bɛn'a yɛrɛ yira ka bɔ sankolo la n'a ka mɛlɛkɛ setigiw ye.

⁸A bɛna na ni tasuma ye, ka mɔgɔw nyaa gwan minw ma Ala lɔn ani minw ma sɔn an Matigi Yezu ka kibaru diman ma.

⁹U ta bɛna cɛn pewu, u yɔrɔ bɛna janya Matigi n'a ka nɔɔrɔ la.

¹⁰Mɔgɔ minw y'u jigi la a kan, a bɛna na o loon na janko olu k'a bonya, ani u ka nisɔndiya a ka koo la, aw fana do sɔnna an ka kuma ma.

¹¹O le y'a to an b'an ka Ala dali aw ye tuma bɛɛ, waasa, Ala y'aw wele kuun min na, aw k'o nya. Ani ka see d'aw ma, aw ka jigi kɔsɔn, aw b'a fɛ ka konyuman min kɛ, aw ka se k'o kɛ.

¹²O cogo la, an Matigi Yezu tɔgɔ bɛna bonya aw kɔsɔn, ani aw fana ka bonya sɔrɔ ale kɔsɔn, ka kɛnyɛ n'an ka Ala, n'an Matigi Yezu Krista ka nɛɛma ye.