Read LAYIDUKURA TESALONIKAW FILANAN 2 Bible Online

TESALONIKAW FILANAN 2 - LAYIDUKURA bible

TESALONIKAW FILANAN 2

¹Min ye an ka Matigi Yezu Krista ka kɔsegiko ye, ani an lajɛnko ye a fɛ, n balimaw, an b'aw dali ko

²aw kan'a to mɔgɔ si b'aw lafili gwansan, ani ka siranya bila aw la, ko ale ye kiraya kuma sɔrɔ, walima ka manamanakuma dɔ fɔ aw ye, walima n'u dɔ ye bataki koo fɔ aw ye k'o bɔra an fɛ, n'u b'a fɔ aw ye ko Matigi ka kɔsegi sera.

³Aw kana la u la, bari murutili bɛna kɛ Ala ma fɔlɔ, mɔgɔjugu k'a yɛrɛ yira, ale min labɛnnin bɛ halakili kama.

⁴Ale bɛna wili batofɛn bɛɛ kama k'a yɛrɛ bonya ka taa sigi Alabatosoba kɔnɔ k'a yɛrɛ kɛ Ala ye.

⁵ne tun y'o koo fɔ aw ye tuma min na ka n to aw fɛ yen, aw hakili t'o la wa?

⁶Fɛɛn min b'a bali sisan n'a tɛ se k'a yɛrɛ yira, n'a waati ma se, aw b'o lɔn.

⁷Bari fɛnjugu dogonin y'a ka baara daminɛ ka ban, a tora fɛɛn min b'a bali o ka bɔ a nya dɔrɔn.

⁸O la, mɔgɔjugu nin b'a yɛrɛ yira, an Matigi Yezu bɛn'a halaki a dalafɔnyɔ fɛ, k'a kɛ a bɛ tunu pewu n'a ka nali nɔɔrɔ ye.

⁹O juguman nin bɛna na ni Sutana ka fanga ye, ka kabakoba sifa bɛɛ kɛ fɔɔ ka mɔgɔw nanbaran ni dɔw ye.

¹⁰A bɛna kojugu sifa bɛɛ kɛ janko mɔgɔ minw bɛ halaki sira kan, a ka olu lafili. Olu bɛna halaki bari u ma sɔn tinyɛ koo ka diya u ye, u tun bɛ se ka kisi o min barika la.

¹¹O le y'a to Ala y'a kɛ u filila kosɛbɛ.

¹²O cogo la, mɔgɔ minw ma sɔn tinyɛ ma, ani kojugu ka di u ye, olu ka jalaki.

¹³N balimaw, aw minw koo ka di Matigi ye, an ka kan ka barika la Ala ye aw kɔsɔn tuma bɛɛ, bari a y'aw woloma kabini fɔlɔfɔlɔ, waasa aw ka kisi, aw jigi barika la, o min bɛ tinyɛ kan, ani Nii Senuman barika la, ale min b'aw kɛ Ala ta ye.

¹⁴A y'aw wele o le kama an ka kibaru diman fɔli barika la, janko aw k'an Matigi Yezu Krista ka nɔɔrɔ sɔrɔ.

¹⁵O cogo la n balimaw, an ye aw kalan koo minw na an ye min fɔ aw ye n'an daa ye walima an ye minw kɛ bataki ye k'o ci aw ma, aw ka jija k'o minɛ ka nya kosɛbɛ.

¹⁶An Matigi Yezu Krista yɛrɛ, n'an Faa Ala, min y'an kanu n'a b'an jaa gwɛlɛya tuma bɛɛ, ani ka jiginyuman d'an ma, a ka nɛɛma kɔsɔn,

¹⁷olu k'aw jaa gwɛlɛya, ani ka barika don aw la koo bɛɛ la, baara ni kuma na.