Read LAYIDUKURA TESALONIKAW FILANAN 3 Bible Online

TESALONIKAW FILANAN 3 - LAYIDUKURA bible

TESALONIKAW FILANAN 3

¹Ayiwa n balimaw, an b'a nyini aw fɛ ko aw ka Ala dali an ye, waasa Matigi ka kuma ka se yɔrɔ bɛɛ teliya la, ani ka bonya sɔrɔ, i n'a fɔ a tun kɛra aw cɛma cogo min na,

²ani Ala k'an kisi mɔgɔjugu ni mɔgɔkolonw ma, bari mɔgɔ bɛɛ ma sɔn kibaru diman ma.

³Nga Matigi ye kantigi ye, a bɛna jagwɛlɛya d'aw ma ani k'aw tanga juguman ma.

⁴Matigi barika la an jigi b'aw kan ko an ye koo minw nyini aw fɛ, aw b'o kɛra, ani aw fana bɛna to k'o kɛ.

⁵Matigi k'a to aw ka nyɔgɔn kanu i n'a fɔ Ala bɛ mɔgɔ kanu cogo min na, ani aw ka se ka munyuli kɛ i n'a fɔ Krista y'a kɛ cogo min na.

⁶N balimaw, an b'aw dali an Matigi Yezu Krista tɔgɔ la ko aw ka faran ka bɔ aw balimakolonw na, olu minw tɛ taama ka kɛnyɛ n'an ka kalan ye.

⁷Aw ka kan k'an ladege cogo min na, aw yɛrɛ b'o lɔn, bari an tun ma kɛ salabagatɔw ye aw cɛma.

⁸K'an to aw cɛma, an m'a nyini mɔgɔ si fɛ ko a k'an balo, an yɛrɛ le tun bɛ baara kɛ ka sɛgɛn suu ni tile, waasa an kana kɛ mɔgɔ si ka doni ye.

⁹A ma kɛ ko an tun man kan n'o ye. An tun ka kan n'a ye, nga an tun b'a fɛ ka koo le nyayira aw la.

¹⁰K'an to aw fɛ yen, an tun b'a fɔ aw ye tuma bɛɛ ko mɔgɔ min tɛ sɔn baara ma, o tigi kana dumuni kɛ fana.

¹¹An y'a mɛn ko mɔgɔ dɔw b'aw cɛma minw kɛra salabagatɔw ye, u tɛ sɔn ka foyi kɛ fɔɔ kokolonw.

¹²An b'a nyini o mɔgɔ nunu fɛ ani an b'u ladi an Matigi Yezu Krista tɔgɔ la, k'u ka baara kɛ dɔrɔn k'u yɛrɛ ka dumuni sɔrɔ.

¹³Aw kɔni, n balimaw, aw kana konyuman kɛli dabila.

¹⁴Ni mɔgɔ min ma sɔn k'an ka bataki nin kɔnɔnakuma labato, aw k'o tigi to yen, aw kana jɛnnyɔgɔnya kɛ n'a ye tugu, janko a ka maloya.

¹⁵O n'a ta bɛɛ, aw kan'a minɛ i n'a fɔ aw jugu, nga aw k'a ladi i n'a fɔ aw balima.

¹⁶Hɛrɛtigi ka hɛrɛ kɛ aw ye tuma bɛɛ ni cogo bɛɛ la. Matigi ka to aw bɛɛ fɛ.

¹⁷Ne Pɔli le bɛ foli kuma nin sɛbɛnna n yɛrɛ ma. N bɛ to ka n bolonɔ bila ten n ka batakiw bɛɛ la. N bɛ to k'o sɛbɛn ten.

¹⁸An Matigi Yezu Krista ka nɛɛma kɛ aw bɛɛ ye.