Read LAYIDUKURA TIMOTE FƆLƆ 1 Bible Online

TIMOTE FƆLƆ 1 - LAYIDUKURA bible

TIMOTE FƆLƆ 1

¹Ne Pɔli min kɛra Yezu Krista ka ciden ye an Kisibaga Ala sago barika la ani Yezu Krista barika la, ale min kɛra an jigi ye,

²ne bɛ bataki nin ci Timote ma, e min kɛra ne deen tigitigi ye jigi barika la Krista kan. An Faa Ala, n'an Matigi Yezu Krista ka makari i la, ka nɛɛma ni hɛrɛ kɛ i ye.

³Ne taatɔ Maseduwani mara la, ne tun y'a nyini e fɛ ko i ka to Efɛzi, waasa kalanjugu bɛ minw daa la, i k'a fɔ u ye k'u k'o dabila.

⁴U bɛ fɔlɔfɔlɔko minw fɔ u kunfɛ ani mɔgɔw buruju fɔko, i k'a fɔ u ye k'u k'o dabila, a bɛ sɔsɔli le caya. Ala sago tɛ se ka kɛ ten, a bɛ se ka kɛ lanaya le barika la.

⁵O ladikun ye min ye, o ye ka kanuya sɔrɔ min bɛ bɔ dusukun gwɛnin na, ni miirinyuman na, ani jigisɛbɛ la.

⁶Mɔgɔ dɔw jɛngɛnna ka bɔ o sira kan k'u yɛrɛ lafili ni kuma fufafu ye.

⁷U b'a fɛ ka kɛ sariya karamɔgɔw ye, nga u bɛ kuma min fɔra, n'u lanin bɛ u yɛrɛ la o kuma nin koo la, u t'o faamu.

⁸An b'a lɔn ko sariya ka nyi ni mɔgɔw bɛ sariya labato ka nya.

⁹An k'a faamu fana ko sariya ma sigi mɔgɔnyumanw kama, nga a sigira banbagaw le kama, ni mɔgɔmurutininw, mɔgɔjuguw, kojugukɛlaw, Ala nyasiranbaliw, ani minw bɛ Ala tɔgɔ cɛn, ni minw bɛ u faa, walima u baaw faga, ani mɔgɔfagalaw,

¹⁰ni kakalaw, ni cɛɛ minw bɛ nyɔgɔn nyini i n'a fɔ cɛɛ ni muso, ni mɔgɔjagolaw, ni galontigɛlaw, ni minw b'u yɛrɛ kali fu, ani mɔgɔ minw ka kɛta tɛ bɛn ni kibaru diman ye.

¹¹O kalan nin bɛ sɔrɔ kibaru diman kɔnɔ, dubatigi Ala ye o min fɔko kalifa ne ma.

¹²Ne bɛ barika la an Matigi Yezu Krista ye, ale min ye ne jati mɔgɔsɛbɛ ye ka ne woloma ka fanga di n ma k'a ka baara kɛ.

¹³Fɔlɔfɔlɔ ne min tun b'a tɔgɔ cɛn, ka Alanyasiranbagaw tɔɔrɔ, ani ne tun ka fari, nga o bɛɛ n'a ta a makarila ne la, bari ne ka lanabaliya ni kolɔnbaliya le kɔsɔn lo, ne tun bɛ o kɛra.

¹⁴An Matigi ye nɛɛma kɛ ne ye kosɛbɛ, ka jigi ni kanuya di ne ma o min bɛ sɔrɔ Yezu Krista ka jɛnnyɔgɔnya fɛ.

¹⁵Nin kuma ye tinyɛ ye mɔgɔ bɛɛ bɛ se ka sɔn min ma, ko: Yezu Krista nana dinyɛ na waasa ka kojugukɛlaw kisi. Ne tun kɛra mɔgɔjugu ye olu bɛɛ cɛma.

¹⁶Ne min tun kɛra fɔlɔ ye u bɛɛ cɛma, ni Ala hinɛna ne la, a b'a fɛ Yezu Krista k'a ka nyumanya le yira k'o kɛ taamasinyɛ ye mɔgɔw fɛ, olu minw bɛna la ale la ka sini hɛrɛ sɔrɔ.

¹⁷Bonya ni tandoli ka kɛ tuma bɛɛ waati bɛɛ Masa Ala yebali ye, ale min tɛ sa, ani a kelenpe le bɛ yen. Amiina.

¹⁸Ne dencɛ Timote, ne b'a gwɛlɛya i ma ko i ka jija ka baaranyuman kɛ ka kɛnyɛ ni kiraya kuma ka dɛmɛ ye min tun fɔra i koo la ka tɛmɛ.

¹⁹I k'o kɛ ni lanaya, ni dusukunnyuman ye. Mɔgɔ dɔw dɛsɛra o la, o kama u benna.

²⁰Imene ni Alɛkisandiri seen b'o la, ne ye olu minw to Sutana bolo waasa u k'a faamu, k'u man kan ka Ala tɔgɔ cɛn.