Read LAYIDUKURA TIMOTE FƆLƆ 3 Bible Online

TIMOTE FƆLƆ 3 - LAYIDUKURA bible

TIMOTE FƆLƆ 3

¹Nin kuma ye tinyɛ ye, ani mɔgɔ ka kan ka sɔn o ma: Ni mɔgɔ dɔ b'a fɛ ka kɛ Ala ka jama nyamɔgɔ ye, o tigi ye baaranyuman le woloma.

²Nyamɔgɔ ka kan ka kɛ mɔgɔnyuman ye, jalakiyɔrɔ man kan ka sɔrɔ a la, muso kelen tigi, hakilitigi, mɔgɔ min b'a ka koo bɛɛ kɛ ka kɛnyɛ. A ka kɛ mɔgɔ ye min bɛ se ka lonanw ladon, ani ka kɛ mɔgɔ ye min bɛ se ka mɔgɔw kalan.

³A man kan ka kɛ dɔrɔtɔ ye, walima mɔgɔ fariman, nga mɔgɔsabalinin. A kana kɛ kɛlɛtigɛla ye, walima mɔgɔ ye min bɛ wari kanu kojugu.

⁴A ka kan ka kɛ mɔgɔ ye min bɛ se k'a yɛrɛ ka soo mara, ani k'a deenw kolo n'u bɛ mɛnni kɛ a fɛ koo bɛɛ la.

⁵Bari mɔgɔ min tɛ se k'a yɛrɛ ka somɔgɔw mara, o tigi bɛna se ka Ala ka jama mara cogo di?

⁶A kana kɛ mɔgɔkura ye fana Ala ka jama cɛma, waasa yɛrɛbonya kana don a la ka kɛ sababu ye Sutana ka jalaki nyɔgɔn ka se a ma.

⁷A ka kɛ mɔgɔ ye min tɔgɔnyuman bɛ fɔ mɔgɔ wɛrɛw fɛ, waasa a kana dɔgɔya sɔrɔ Sutana ka se a kɔrɔ.

⁸Ala ka jama nyamɔgɔw dɛmɛbagaw ka kan ka kɛ mɔgɔsɛbɛw ni kuma kelen tigiw ye, u man kan ka kɛ dɔrɔtɔw ye walima mɔgɔ minw bɛ tɔnɔ nyini tilenbaliya la.

⁹Tinyɛ min bɛ lɔn jigi barika la, u ka kan ka to o le kan, ani ka sɔn o ma ni dusukunnyuman ye.

¹⁰A bɛnnin bɛ k'u sɛgɛsɛgɛ fɔlɔ. Ni jalakiyɔrɔ ma sɔrɔ u la, o tuma na, u bɛ se ka don o baara la.

¹¹Muso minw b'a fɛ k'o baara nyɔgɔn kɛ fana, olu ka kan ka kɛ mɔgɔsɛbɛw ye. U kana kɛ mɔgɔ tɔgɔcɛnbagaw ye. U ka kan k'u yɛrɛ kɔlɔsi kosɛbɛ ani ka tilenninya kɛ koo bɛɛ la.[1]

¹²Ala ka jama nyamɔgɔw dɛmɛbaga ka kan ka kɛ muso kelen tigi ye, min bɛ se k'a ka soo mara ani a ka denbaya.

¹³Mɔgɔ min b'o baara kɛ ka nya, o tigi bɛ tɔgɔnyuman sɔrɔ a ka nyamɔgɔya la, ani a bɛ jagwɛlɛya sɔrɔ ka kuma jigi koo la, an b'o min sɔrɔ Yezu Krista fɛ.

¹⁴Ne bɛ bataki nin ci i ma, ne hakili b'a la ka na bɔ i fɛ yen yan ni dɔɔni.

¹⁵Hali ni ne mɛnna fana, e bɛna se k'i yɛrɛ minɛcogo lɔn Ala ka somɔgɔw cɛma, min ye Ala ka jama ye, min kɛra tinyɛ juu sigiyɔrɔ n'a tintinyɔrɔ ye.

¹⁶An ka Alanyasiran, o ye gundoba ye! A y'a yɛrɛ kɛ mɔgɔ ye ka na, Nii Senuman y'a koo yira k'o gwɛya, mɛlɛkɛw y'a ye. A ka kibaru fɔra siya wɛrɛw cɛma, ani mɔgɔw lara a la dinyɛ kɔnɔ, a kɔsegira ka taa Ala fɛ. Mɔgɔ si tɛ se k'o sɔsɔ.