Read LAYIDUKURA TIMOTE FƆLƆ 4 Bible Online

TIMOTE FƆLƆ 4 - LAYIDUKURA bible

TIMOTE FƆLƆ 4

¹Nii Senuman b'a fɔ k'a gwɛya ko laban tuma na, mɔgɔ dɔw bɛna u jigi bɔ Yezu Krista kan. U bɛna mɛnni kɛ nanbaranmɔgɔw fɛ, ani ka sɔn jinaw ma.

²U bɛna u yɛrɛ to nanbaranmɔgɔ galontigɛlaw b'u nigɛ olu minw dusukun finnin bɛ.

³O mɔgɔ nunu b'a fɔ ko a daganin tɛ ka furu kɛ. U bɛ mɔgɔw bali dumuni dɔw la k'u man kan k'o dumu. K'a sɔrɔ Ala y'o dumunifɛn nunu dan, minw lara Yezu la, olu ka dumu kɔsɔn, olu minw ye tinyɛ lɔn, u ka barika la Ala ye o dumuwaati la.

⁴Ala ye fɛɛn minw dan, o bɛɛ ka nyi. Foyi si man kan ka fili olu la, nga a daan ye an ka barika la Ala ye k'o dumu,

⁵bari Ala ka kuma ni Ala dali, y'u saniya.

⁶N'i bɛ i balimaw kalan n'o koo ye, i bɛna kɛ Yezu Krista ka baarakɛlanyuman ye. O min labɛnna jiginyuman ni kalannyuman barika la.

⁷Nga i ka ban siirinkolonw ni kumakolonw ma, minw ni Ala ka koo tɛ bɛn. I ka siran Ala nya.

⁸Nafa dɔɔni bɛ farikolo tolon na, nga nafa bɛ Ala nyasiran na kosɛbɛ. Bii ka hɛrɛ ni sini ta bɛɛ bɛ sɔrɔ o la.

⁹O kuma nin ye tinyɛ ye. Mɔgɔ bɛ se k'a jigi la o kan k'o minɛ ka nya.

¹⁰O le y'a to an bɛ baara kɛ ka sɛgɛn ani ka bondori kɛ, bari Ala ye mɔgɔ bɛɛ kisibaga ye, sankofɛrɛ minw sɔnna a ma.

¹¹I ka kan ka o le nyini mɔgɔw fɛ, ani k'u kalan n'o ye.

¹²I kan'a to mɔgɔ si k'i dɔgɔya i ka denmisɛnya kama, nga i ka siranyuman yira u la, i ka kumacogo, n'i ka taamacogo fɛ, n'i ka mɔgɔ kanucogo, n'i ka lanaya, an'i ka mɔgɔsɛbɛya fɛ.

¹³Yan ni ne ka na yen, i ka jija ka Ala ka kuma fɔ jama cɛma, ka u waaju, ka u kalan fana.

¹⁴Ala ye see min d'i ma, i kana farati n'o ye. A y'o min d'i ma kirayakuma fɔwaati la, ani cɛkɔrɔbaw y'u bolo la i kan tuma min na.

¹⁵I ka kan ka olu to i dusu la, k'o minɛ ka nya kosɛbɛ. O la, mɔgɔw bɛɛ bɛn'a ye ko i jijanin lo.

¹⁶I k'i yɛrɛ minɛ ani k'i ka mɔgɔ kalancogo kɔlɔsi fana. E k'i jija o la, n'o kɛra, i bɛna i yɛrɛ kisi ani ka i lamɛnbagaw fana kisi.