Read LAYIDUKURA TIMOTE FƆLƆ 5 Bible Online

TIMOTE FƆLƆ 5 - LAYIDUKURA bible

TIMOTE FƆLƆ 5

¹N'i bɛ cɛkɔrɔba ladi tuma min na, i kana kuma gwɛlɛman fɔ a ye. Nga i k'a ladi i n'a fɔ i faa. I ka kanbelenw ladi i n'a fɔ i kɔrɔw, walima i dɔgɔw.

²Muso minw kɔrɔla, i ka olu ladi i n'a fɔ i bamusow, muso minw ma kɔrɔ, ka olu ladi i n'a fɔ i kɔrɔmusow walima i dɔgɔmusow, cogo bɛnnin na.

³Mɔgɔ tɛ firiyamuso minw fɛ, i ka olu minɛ ni bonya ye.

⁴Nga ni deenw, walima mamadenw bɛ firiyamuso min fɛ, o deen nunu le ka kan k'a dɛmɛ u ka Alanyasiran kɔsɔn. O cogo la, u bɛn'a yira u wolobagaw la k'olu le ka kan ka lɔ n'u ka koo ye, bari o le ka di Ala ye.

⁵Min kɛra firiyamuso ye sɛbɛ la, mɔgɔ tɛ a fɛ k'a janto a la, ale b'a jigi bɛɛ la Ala kan. A bɛ Ala dali ka dɛmɛ nyini suu fara tile kan.

⁶Nga firiyamuso min bɛ miiri farisogo ka nisɔndiya koo la dama, ale sara ka ban Ala faan fɛ, nga a nyanaman lo farisogo la.

⁷I ka kan ka min fɔ u ye waasa u ka se ka to jalakibali ye, o filɛ nin ye.

⁸Mɔgɔ o mɔgɔ min tɛ janto a ka somɔgɔw la, o tigi ye Krista ka sira bila. Alalɔnbali yɛrɛ ka fisa n'a ye.

⁹I ka kan ka firiyamuso min jati k'a fara firiyamusow kan k'a tɔgɔ sɛbɛn, ale ka kan ka saan bi wɔɔrɔ nyɔgɔn sɔrɔ, ani a ka kɛ muso ye min tun furula cɛɛ kelen dama fɛ.

¹⁰Ani a tɔgɔnyuman ka fɔ a ka kɛwalinyuman kɔsɔn, a ka kɛ muso ye min y'a deenw lamɔ ka nya, ka kɛ lonan ladonbaga ye. A ka kɛ Ala ka jama dɛmɛbaga ye. A ka kɛ mɔgɔ ye min y'a hakili to dɛsɛbagatɔw la ka olu dɛmɛ, ani ka kɛwalinyuman sifa bɛɛ kɛ.

¹¹Nga firiyamuso minw ma kɔrɔ fɔlɔ, i ka ban olu la, bari ni cɛko y'u minɛ tuma min na, u tɛ Krista koo jati tugu, u b'a fɔ ko u bɛ furu.

¹²Ani u b'u yɛrɛ bila jalaki la, bari u y'u ka layidu tanin cɛn.

¹³Ani ka fara o kan, u bɛ kɛ salabagatɔw ye, ka to ka yaalayaala sodaw la. O dama tɛ, u daa ka ca, u daa bɛ don mɔgɔ ka koow bɛɛ la, u man kan k'u daa don minw na.

¹⁴O le y'a to, ne b'a fɔ firiyamusow ye, minw ma kɔrɔ, ko u ka furu ka deenw sɔrɔ ani u ka janto u ka somɔgɔw la, waasa u kana yɔrɔ di an jugu ma a ka se ka kumajugu fɔ an koo la,

¹⁵bari firiyamuso dɔw ye siranyuman bila, ka tugu Sutana kɔ.

¹⁶Muso min lara Krista la, n'a kɛra ko firiyamusow bɛ ale ka mɔgɔw cɛma, ale yɛrɛ k'a janto olu la, a kana u to Ala ka jama kunna, waasa olu ka se ka firiyamusow dɛmɛ, mɔgɔ tɛ minw fɛ.

¹⁷Mɔgɔ minw b'u ka nyamɔgɔya baara kɛ ka nya, olu ka kan ni bonya ye kosɛbɛ, janko minw bɛ waajuli kɛ ani minw bɛ mɔgɔw kalan.

¹⁸Bari a fɔra Ala ka kuma na ko: “Ni misi bɛ sɛnɛ kɛra suman kɔnɔ, i kan'a daa siri[2],” ani “Baarakɛla ka kan n'a ka sara ye.”

¹⁹I kana sɔn ka nyamɔgɔ jalaki, n'i m'a ka koo kɛnin mɛn seere mɔgɔ fila, walima mɔgɔ saba daa la.

²⁰Ni mɔgɔ min ye kojugu kɛ, i k'o tigi jalaki mɔgɔ bɛɛ nyana waasa ni tɔ nunu y'o ye, olu bɛna siran.

²¹Ne b'i dali Ala ni Yezu Krista nyana, ani mɛlɛkɛw, ko i ka koo nunu bɛɛ kɛ, i kana mɔgɔ bɔ mɔgɔ la.

²²I kana teliya k'i bolo la mɔgɔ si kan, k'o tigi don Ala ka baara la. I kana jɛn ni mɔgɔ si ye ka kojugu kɛ. Ele ka to k'i yɛrɛ saniya.

²³I kana to ka jii dama min tugu, i ka to ka duvɛn min dɔɔni dɔɔni i ka kɔnɔdimimisɛnw an'i ka banamisɛnw kɔsɔn.

²⁴Mɔgɔ dɔ ka kojugu bɛ lɔn sanni kiti ka tigɛ, nga dɔw ta bɛ lɔn kɔfɛ le.

²⁵Kɛwalinyuman fana bɛ ye joona, hali minw yeli ka gwɛlɛ, u si tɛ se ka to dogo la.